• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas Frakshon di MFK no ta partisipá den weganan polítiko

Frakshon di MFK no ta partisipá den weganan polítiko di gabinete Rhuggenaath i e 12 Parlamentarionan ku ta sostené e gabinete aki

Frakshon di MFK no a partisipá na reunion di Parlamento pa instituí un komishon pa evaluá lei di screening. Esaki debí ku frakshon di MFK dia 27 di mei 2019, a manda un karta pa tur lider di frakshon den Parlamento ku e petishon pa komo Parlamento revisá tantu e lei di “Lei di Screening” i “Lei di Finansiamentu di Partidonan Polítiko”. Ta di lamentá ku ta solamente un frakshon a reakshoná riba e karta aki di frakshon di MFK.

Riba e sistema di Parlamento pa registrá dokumentonan di Parlamento, frakshon di MFK a tuma nota ku gabinete Rhuggenaath dia 13 di yüni 2019, ta instituí un komishon di evaluashon pa medio di un Dekreto Nashonal ku e tarea pa revisá e lei riba Integridat di Kandidato Ministernan (Landsverordening Integriteit kandidaat Ministers).

Den e dekreto aki ta duna e komishon e tarea pa evaluá e lei ariba menshoná basa riba algun kriterio i ku denter di 2 luna e komishon mester reportá loke ku nan a konstatá (por sierto ku 13 di ougùstùs e término di 2 luna ta vense)

Frakshonnan den Parlamento a skohe pa no tuma akshon i inisiativa pa e revisá e lei aki, pero e frakshonnan aki a opta pa laga gobièrnu lanta ku un komishon i asina ekskluí Parlamento for di evaluashon di e lei aki, ku a wòrdu trata eksklusivamente pa nos lider polítiko Gerrit Schotte i awe ku e lei a kòrta Minister di e gabinete aki nan tur ta nèrvioso.

Awe 12 di ougùstùs, presidente di Parlamento ta yama un reunion públiko pa instituí un komishon temporal di Parlamento pa revisá e lei aki. Frakshon di MFK no por kaba di komprondé kon gobièrnu ta instituí un komishon pa medio di un Ordenansa Nashonal pa evaluá e lei aki i awor Parlamento tambe kier bin ku un komishon temporal pa tambe hasi evaluashon di lei di Integridat di Kandidato Ministernan.

Un biaha mas presidente di Parlamento i frakshonnan ku ta sostené gabinete Rhuggenaath ta mustra nan inkapasidat pa funshoná den Parlamento. Si ya gobièrnu tin un komishon di evaluashon, ta tarea di Parlamento pa warda riba un posibel adaptashon di e lei aki pa trata esaki den un reunion di komishon sentral i pa despues den un reunion públiko pa trese kambionan ku Parlamento ta desea.

Nos no ta komprondé i nos no ta partisipá den ningun komishon di Parlamento ku no tin sentido di eksistensia. Frakshon di MFK tei pa kontribuí na desaroyo di Kòrsou i no pa gasta sèn di pueblo i tene reunion di Parlamento ku no tin un balor agregá.

Gilmar Pisas
Lider di Frakshon di
Movementu Futuro Kòrsou

Webmaster

Leave a Reply