• PLAN DI AKSHON
    MFK 2016
  • flag-curacao flag-holanda
Home Sithree van Heydoorn Reforma, Un Mihó Kòrsou ta Posibel

Reforma, Un Mihó Kòrsou ta Posibel
For di 6 aña pasa MFK, ku vishon den gobernashon a bisa
ku un di e solushonnan pa un gobernashon stabil na Kòrsou ta, REFORMA

Movementu Futuro Kòrsou (MFK) a tuma nota di e diskushon riba retnan sosial relashoná ku representashon di e kantidat di votonan ku e Parlamentarionan ku tin aktualmente den Parlamento ta dispone di dje i e komparashon entre representashon di koalishon i oposishon den Parlamento. Ta bon pa nos refreská mente di tur hende, ku elekshon na Kòrsou ta pa skohe miembronan di Parlamento i no Ministernan.

Nos por mira for di e tabla riba Facebook ku e diesdos Parlamentarionan ku ta sostené e gobièrnu aktual ta dispone huntu di 3.250 voto, miéntras ku e nuebe Parlamentarionan ku ta den oposishon ta dispone di 14.877 voto. Oposishon ta dispone di kuater biaha mas tantu voto ku e diesdos Parlamentarionan ku ta sostené koalishon.

MFK for di aña 2013 a kuminsá ku un kampaña pa mustra, ku entre otro ku nos sistema elektoral tin hopi defisiensia. E komparashon ariba menshoná ta demonstrá esaki un biaha mas, esaki tabata un di e motibunan ku na aña 2013, MFK kuminsá ku un kampaña pa bin ku un Reforma den diferente area di gobernashon i tambe den nos sistema elektoral.

Durante di e kampaña aki MFK a kolekta mas ku diestres mil voto di yunan di Kòrsou ku tabata di akuerdo ku mester bin un Reforma na Kòrsou,  manera ya menshoná no solamente pa e parti elektoral mester a bin un Reforma, pero tambe pa otro sektornan den e aparato gubernamental.

Esaki ta e vishon ku MFK a bin ta demonstrá pa ku gobernashon di Kòrsou. Durante di un manifestashon djasabra último nos por a tuma nota ku un periodista ku ta bringa i sali na interes di pueblo di Kòrsou tambe a presentá su idea kon e ta kere, ku mester Reforma nos sistema elektoral i gubernamental, pa asina Kòrsou por tin un trankilidat polítiko.

Naturalmente esaki ta yena nos ku di MFK ku orguyo, pa mira ku loke nos lider polítiko Gerrit Schotte a mira seis aña pasa komo un di e kambionan na bienestar di Kòrsou, ta manifestá su mes atrobe i ta wòrdu presentá na pueblo di Kòrsou komo un solushon pa trese trankilidat i representashon di un mayoria real den nos gobernashon.

Di e mes un forma aki nos lider polítiko a mustra ku e medidanan ku eks Minister Jardim tabata tuma den e gobièrnu ku a goberná di 2012 pa 2016 lo trese un kolèps den nos ekonomia i ku finansieramente esaki lo bai afektá Kòrsou, pero a trata na desakredita e atvertensianan di MFK i awe nos por mira e konsekuensianan.

Meskos ta e kaso den e gobernashon aktual kaminda MFK a atvertí ku e medidanan ku Minister Gijsbertha a proponé lo ta devastador pa nos ekonomia i nos poblashon.

MFK ketu bai ta para tras di un Reforma, pasombra si awe Kòrsou a implementá e diferente Reformanan, nos lo tabata dispone di un klóusula di “Impeachment”, kaminda ku pueblo lo por a pidi un referendum i kore ku gabinete Rhuggenaath i nos no tin mester di sigui ku e sufrimentu ku e gabinete aki a trese pa pueblo di Kòrsou te ku aña 2021 ora bin elekshon.

Nos ta kontentu ku poko poko pero sigur, mas lider den nos komunidat ta mira ku MFK i su Lider Gerrit Schotte ta hasi polítika pa medio di análisisnan profundo i ku un vishon pa semper pueblo di Kòrsou sali benefisiá.

Reforma ta bibu bibu serka nos di MFK, for di aña 2013 nos a bin ta boga pa e kambionan aki ku lo ta na bienestar di kada siudadano i di Kòrsou en-general.

Reforma, un mihó Kòrsou ta posibel.

Willemstad 31 di mart 2019,
Sithree van Heydoorn
Kolaborador di frakshon pa MFK

Webmaster

Leave a Reply