• PLAN DI AKSHON
    MFK 2016
  • flag-curacao flag-holanda
Home Charles Cooper Tin alternativa pa mantené Refineria Isla habri

Tin alternativa pa mantené Refineria Isla habri te ora haña otro operador, pero gabinete Rhuggenaath no ta hasi esfuerso pa e alternativanan aki kristalisá

Frakshon di Movementu Futuro Kòrsou (MFK) sa di por lo ménos un grupo serio enkabesá pa un komersiante yu di Kòrsou ku a entregá un karta ku un proposishon konkreto pa tene nos refineria habri te ora ku haña un solushon riba término largu pa nos refineria por keda drai.

E grupo aki ke i por trese un máksimo di 250.000 barí di krudo pa dia for di Nigeria pa ser prosesá den nos Refineria. No mester paga niun depchi pa esaki. E kompania aki riba nan propio kosto ta trese e krudo Kòrsou. Na refineria Isla e krudo ta wòrdu destilá i prosesá i e produktonan final lo wòrdu entregá na e grupo pa nan por bende esakinan riba merkado internashonal.

Pa e operashon aki refineria ta kobra tur gastu ku mester pa destilá i prosesá e krudo aki. Pues tur kosto di operashon, mantenshon, salario di tur trahadó i di kontratista, etc., un sorto di “Cost Center”.

E grupo en prinsipio kier hasi esaki pa yuda nos gobiernu i nos refineria pa tene kabes riba awa i paga tur trahadónan te ora ku bini ku un solushon struktural. Pero lokual a sosodé te ku awor ta un wega di skùifmentu i a keda manda e grupo aki di kashi pa muraya. Ni sikiera a hasi e esfuerso pa sinta ku e grupo pa wak si ta kos serio i kiko nan por nifiká pa Kòrsou den e situashon ku nos ta aktualmente.

Pa ta mas konkreto e grupo a manda un karta ku nan proposishon pa presidente komisario di RDK señor Gilbert Martina. Esaki a pasa e bala (karta), pa e direktor interino señor Marcelino de Lanooy. Esaki na su turno a pasa e bala (karta) pa direktora di refineria Isla S.A., alegando ku ta refineria Isla ta e operador i ku ta nan tin ku atendé ku e grupo. Den teoria tur tin rason, pero den praktiká kada un tei pa move nan ko’i sinta na bienestar di nos komunidat.

Hopi tristu ku nos no ta mira un esfuerso serio i sinsero di parti di gobièrnu òf esnan ku gobiernu a pone na kabes di e entidat aki ku ta Refineria di Kòrsou. Na lugá di nan hasi un esfuerso mas aya i bai un “Extra Mile” i ta sirbi komo un fasilitado den e solushon. Esnan responsabel pa e trayekto di nos refineria ta simplemente hunga wega di kashi pa muraya ku futuro di hopi famia ku ta riba un hansha pa tene refineria habri pa nan por sigui pone pan riba mesa pa nan famia.

P’esei frakshon di MFK ta denunsia e aktitut aki públikamente pa pueblo di Kòrsou tuma bon nota ku tin yu di tera ku a bini ku un posibel solushon pa e korto plaso, pero e ta wòrdu di boycot dor di otro yunan di tera den posishon haltu na Refineria di Kòrsou.

Ta bon pa e sindikatonan di trahadónan di Refineria tuma nota di e alternativa aki i pone e preshon nesesario riba gerensia di tantu Refineria di Kòrsou i tambe riba gerensia di Refineria Isla S.A., pa asina nan sinta na mesa ku e grupo aki di e komersiante yu di Kòrsou pa wak si nan alternativa di korto plaso ta unu ku di bèrdat ta viabel Si òf Nò.

Pero no ignorá ningun solushon i/òf proposishon ku por tene nos refineria habri.

Kòrsou, 25 di mart 2019

Na nòmber di frakshon di MFK
Charles Cooper
Miembro di Parlamento

Webmaster

Leave a Reply