• PLAN DI AKSHON
    MFK 2016
  • flag-curacao flag-holanda
Home Jacinta Constancia Parlamento a aproba “Enkuesta Parlamentario” riba konstrukshon di Hospital Nobo

MFK ta felisitá pueblo di Kòrsou, ku riba proposishon di frakshon di MFK, Parlamento a bai di akuerdo pa bin un “Enkuesta Parlamentario” riba konstrukshon di HNO

Riba inisiativa di Movementu Futuro Kòrsou(MFK) huntu ku frakshonnan di Kòrsou di Nos Tur (KdNT) i Movementu Progresivo (MP), dia 6 di òktober 2018 a entrega na Presidente di Parlamento un petishon pa Parlamento tene un “Enkuesta Parlamentario” riba konstrukshon di HNO.

Frakshon di MFK mester bisa ku ta un echo ku e kambio di e sitio di konstrukshon di HNO i tambe e mal maneho hiba den konstrukshon di HNO, ta resultado awe ku e aspekto finansiero tabata un debakel ku lo bo bai pisa riba presupuesto di gobiernu di Kòrsou i ku lo tin su konsekuensianan tambe pa e tarifa na públiko ku HNO lo mester bai kobra.

Teniendo na kuenta ku Parlamento ta un instansia outónomo i ku Parlamento ta esun ku ta dispone di e asina yama “Budget Recht”, frakshon di MFK no por a haña su mes den e proposishon di Minister Camelia- Römer pa gobiernu bai investigá e trayekto di konstrukshon di HNO.

Ta tarea di Parlamento pa kontrolá gobiernu (lesa Ministernan) i e embergadura di e konstrukshon di HNO ku un kosto adishonal di mas ku 200 mion florin, ta un kaso hopi serio i Parlamento mester asumí su responsabilidat.

Basa riba esaki frakshon di MFK a aserka frakshon di KdNT i MP pa a entrega konforme artíkulo 110 di Reglamentu di Ordu i artíkulo 59 di Areglo di Estado, na Parlamento e petishon pa un “Enkuesta Parlamentario”, pa asina Parlamento por inisiá ku un investigashon konforme e “Ordenansa di Enkuesta” (Lv. Enquete Regeling) riba e trayekto di konstrukshon di HNO.

Ku aprobashon awe di Parlamento pa bai di akuerdo ku un “Enkuesta Parlamentario”, frakshon di MFK kier felisitá na promé lugá pueblo di Kòrsou ku ta bai haña sa unda su sèn a bai den konstrukshon di HNO. Nos kier felisitá frakshon di KdNT i MP ku for di prinsipio a duna sosten pa bin e “Enkuesta Parlamentario”. Meskos nos kier felisitá lider polítiko di MFK, Gerrit Schotte pa su trabou inkansabel riba e proposishon di e “Enkuesta Parlamentario” aki.

Nos ta spera ku den un korto tempu Presidente di Parlamento lo yama un reunion di komishon sentral pa kuminsá ku e preparashonnan pa e “Enkuesta Parlamentario”.

Awe un biaha mas pueblo por mira ku MFK ta mas “Serka di Pueblo” i nos si ta skucha batimentu di kurason di pueblo di Kòrsou i defendé bosnan interes manera un pueblo humilde meresé.

Kòrsou 26 di mart 2019,

Jacinta Constansia
Parlamentario pa
Frakshon di MFK

Webmaster

Leave a Reply