• PLAN DI AKSHON
    MFK 2016
  • flag-curacao flag-holanda
Home Gilbert Doran Gilbert Doran: Minister Alcala-Walle no ta Kumpli ku su Palabra!

Minister Alcala-Walle no ta kumpli, e Minister a primintí ku lo drei bek e desishon inkorekto ku a tuma pa ku transporte eskolar, pero te awe nada di e kambio

Nos ta sigui haña keho di mayornan, studiantenan i tambe shofùrnan di bus nan chikí ku tabatin na nan enkargo pa transporte eskolar. Ku e Minister konserní no a hasi nada te ainda, manera e mes a primintí pa aliviá e situashon di chaos ku e minister mes a krea na momento ku su persona a pone gran parti di transporte eskolar den man di ABC Busbedrijf.

Komo Parlamentario mi persona Gilbert Doran a saka un karta ku pregunta na Minister Zita Jesus-Leito, ku ta e Minister enkargá ku ABC Busbedrijf, indikando na dje mi preokupashon i tambe e afekto ku tin riba e studiantenan pe echo ku nan ta yega hopi biaha lat skol i/òf nan ta yega kas hopi lat kompará ku ántes. Esaki pa motibu ku a kita e transporte eskolar i parti karchi pe studiantenan por hasi uzo di transporte públiko i manera nos a indiká den nos karta na Minister e kambio aki a trese un desòrdu total i no ta kontribuí na nos studiantenan. Konvoi nan ta pasa yen, loke ta pone ku nan ta yega skol lat òf tin ku paga un bus ku nan mes sèn pa nan por yega skol, meskos ta pasa ora ku nan Sali skol mèrdia.

Nos a tuma nota ku Minister Alcala-Walle a indiká públikamente den un entrevista na un radio emisora, ku lo drei bek e desishon aki. Pero pa nos gran sorpresa nos mester bisa ku ketu bai nos ta wòrdu aserka pa mayornan, studiantenan i tambe shofùrnan di bus/konvoi, ku e mesun e inkietut riba transporte eskolar, e situashon a keda  meskos, no a bin kambio.

Na nòmber di mayornan, studiantenan i tambe shofùrnan di bus/konvoi, nos kier puntra Minister Alcala-Walle públikamente;

Ki dia ta intenshon di Minister sra. Alcala-Wallé pa manera bo mes a indiká pa drai bek e desishon tuma dor di bo persona relashoná ku transporte eskolar? òf esaki tabata un promesa falsu di bo parti sra. Minister?

Nos ta spera ku pronto nos lo por tende un fecha konkreto di Minister Alcala-Walle pa asina e pesadia i doló di kabes di mayornan, studiantenan i tambe shofùrnan di bus/konvoi por yega na un final.

Atentamente

Gilbert Doran
Parlamentario pa Frakshon di MFK

Kòrsou 23 di òktober 2018

Webmaster

Leave a Reply