• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas Gilmar Pisas – MFK: Kadena Hudisial di Guatemala pa Guatepeor Robo di...

Kadena Hudisial di Guatemala pa Guatepeor
Robo di un Kantidat Grandi di Droga i e Minister Responsabel pa Kuerpo Polisial ta “Muisstil”

Kòrsou, 14 di òktober 2018

Frakshon di MFK a tuma nota awe mainta riba retnan sosial i tambe via di otro medionan notisiero ku a deskubrí un robo di un kantidat grandi di droga na warda di reshèrshi na Garipitoweg i ku e kaso di robo aki ta bou di investigashon di Landsrecherche i Openbaar Ministerio (OM).

Tambe nos por a tuma nota di deklarashonnan di e bosero di OM i tambe un komunikado di prensa di OM, ku por sierto ta karga ku e erornan. Den e komunikado si prensa aki OM ta indiká ku a tuma lugá un robo di droga na e instalashon ariba menshoná di kuerpo polisial i den e mesun komunikado OM ta indiká ku no a hòrta droga, pero ku ta kokaina a wòrdu hòrta. Awor un pregunta simpel i humilde kokaina no ta droga?

Pero manera ya nos a kustumbrá di e bosero di OM ku e ta pone mas atenshon riba su mes show ku riba e informashon ku e mester suministrá na prensa i esaki ta motibu di e erornan aki ku e ta kometé i ta mal informá komunidat i prensa.

E kaso aki ta un hopi serio i no por ta asina ku e Minister responsabel te na momentu ku nos ta redaktá e komunikado di prensa aki no a sali i duna un deklarashon ofisial na pueblo di Kòrsou. Nos no ta interesá pa minister bin konta nos di detayenan di e robo. Pero si nos kier sa riba e parti di responsabilidat di tantu e Minister komo e hefe di kuerpo polisial. Nos kier sa kon ta posibel ku kriminalnan por a haña kaminda liber pa drenta den ofisinanan di kuerpo polisial i bai ku un botin asina grandi di droga. Pasombra pa nos si kokaina ta droga te ainda.

No mas ku algun siman pasa Minister i hefe di kuerpo polisial den un rueda di prensa a indiká ku sifranan masha bunita presentá den “Powerpoint” ku kriminalidat a baha na Kòrsou. Awe nos ta lanta ku e realidat amargo ku ni ofisinanan di kuerpo polisial nos ta un sitio sigur i si baho mundu disidí ku nan ta drenta den instalashonnan polisial pa rekobrá nan pertenensianan no por stòp nan di hasi esaki.

Na mas ku un okashon frakshon di MFK a kuestioná e sifranan ku e Minister aki ta trese dilanti pa ilustrá ku e ta hasiendo un gran trabou komo titular di hustisia, miéntras ku e akshon di robo aki a demonstrá ku kriminalidat a bira mas profeshonal ku e bon trabou ku segun e Minister i hefe di kuerpo polisial nan bin ta ehersé. Nos frakshon a bin ta mustra kon siudadanonan di Kòrsou no tin trankilidat i seguridat den nan mes kas, debí ku na masha hopi okashon nan ta bira víktima di atrako den nan mes kas.

I awor a toka turno na e kas di esnan ku tei pa Sirbi i Protehá nos, manera nan lema ta bisa. Den kas di kuerpo polisial a tuma lugá un atrako brutal i si kuerpo polisial no por protehé na mes kas kontra di atrako, esei ta nifiká ku nan no por protehé kas di ami ku abo komo siudadanonan di Kòrsou.

Na nos konsepto e Minister mester a sali i duna un deklarashon ofisial pa informá pueblo di Kòrsou ta kon bin esnan ku a kometé e akto aki por a yega te kaminda e droga tabata warda, ta un falta grandi di responsabilidat di e Minister ku e no a duna un deklarashon ofisial. Al final ta Minister di Hustisia ta esun polítikamente responsabel pa kuerpo polisial.

Nos no por yega na un otro konklushon ku tantu Minister di Hustisia Quincy Girigorie i hefe di kuerpo polisial Mauricio Sambo mester entrega nan retiro despues di e suseso aki.

Gilmar “Pik” Pisas
Miembro di Parlamento
Frakshon di MFK

Webmaster