• PLAN DI AKSHON
    MFK 2016
  • flag-curacao flag-holanda
Home MFK Frakshon di MFK a entregá kontestanan na koleganan Parlamentario i ta pidi...

Frakshon di Movementu Futuro Kòrsou (MFK) a hasi un petishon na presidente di Parlamento, pa tratamentu aselerá, di e inisiativa di lei entrega dor di MFK pa trese kambio na e “Curaçaose Wegenverkeersverordening 2000”. Ta trata aki di un kambio pa adaptá e porshento di lus ku ta pèrmití penetrá den bo vehíkulo bai na (35%) enbes di e 70% ku awe den lei ta permití.

Despues ku frakshon di MFK a entrega e inisiativa di lei aki, presidente di Parlamento a konkluí den un análisis di e lei kompartí ku nos frakshon 17 di òktober 2017 (https://www.scribd.com/document/373338801/Analyse-17-okt-2017-Ontwerplv-tot-wijziging-van-de-wegenverkeersverordening-Curac-ao-2000) ku no tabata nesesario pa tuma konseho mas serka “Raad van Advies” (RvA), esaki debí ku den pasado ya RvA a duna konseho riba e inisiativa di lei ku tur e similardatnan ku a wòrdu entrega pa eks-miembro di Parlamento pa PNP sr. Humphrey Davelaar. Den un reunion di komishon sentral di Parlamento a sali na kla ku tòg tin nesesesidat pa pidi RvA un biaha mas konseho riba e inisiativa entregá dor di MFK. Tambe durante di e reunion di komishon sentral menshoná a bin preguntanan dilanti di miembronan di Parlamento ku por wòrdu kontesta solamente pa e Ministernan korespondiente.

Analyse 17 okt 2017 – Ontwerplv tot wijziging van de wegenverkeersverordening Curaçao 2000 by MFK on Scribd

For di 15 novèmber aña pasa, frakshon di MFK a aserka e Ministernan konserní pa medio di karta pa duna kontesta riba e diferente preguntanan, solamente Minister enkargá ku e kartera di GMN a reakshoná denter di e periodo akordá entre Parlamento i gobiernu di Kòrsou ku ta denter di 2 luna. Debí ku e término di dos luna ku un Minister mester kontesta preguntanan di miembronan di Parlamento a pasa i MFK ta konsiderá ku no por sigui warda Minister di VVRP i di Hustisia kontesta e preguntanan pa por kontinuá ku tratamentu di e inisiativa di lei aki ora nan haña ta bon.

Pa e motibu ariba menshoná frakshon di MFK a manda pa presidente di Parlamento un nota konteniendo kontestanan koleganan Parlamentario riba preguntanan ku frakshon di MFK mes por a kontesta, kompaña ku un nota di kambio. Pa evitá mas tardansa den tratamentu di inisiativa di lei aki, frakshon di MFK a pidi presidente di Parlamento pa no sigui warda riba kontesta di e Minister di VVPR i Hustisia i pa manda e inisiativa di lei huntu ku tur otro dokumentashon korespondiente mas pronto posibel pa un reunion di komishon sentral di Parlamento pa kontinuá ku e tratamentu.

MFK Brief 8 Maart 2018 – Betreft Initiatiefontwerp Wijziging WVVC2000 by MFK on Scribd

Frakshon di MFK kier mustra ku aki ta trata di e derecho di inisiativa ku Parlamento tin, kual ta ankra den nos Derecho di Estado, kaminda retraso/tardansa dor di negligensia di un Minister den ehekushon di e derecho aki no ta akseptabel.

 

 

 

 

 

 

 

 

 

 

Gerrit F. Schotte

Lider Polítiko i lider di Frakshon di MFK

Kòrsou, 8 di mart 2018,

Webmaster

Leave a Reply