• PLAN DI AKSHON
    MFK 2016
  • flag-curacao flag-holanda
Home Gerrit Schotte Independensia di Parlamento a wòrdu trapa dor di Gobièrnu di Kòrsou

Hèrmènt di kontrol di Parlamento ku ta Kontrolaria General (ARC) a wòrdu buta lam dor di Gabinete Rhuggenaath

Ku e akshon di gobièrnu pa para e kaso den korte di ARC kontra di UTS e Moshon di 9 di desèmber 2014 ku 17 voto PRO kaminda a aprobá pa Kontrolaria General (ARC) hasi un investigashon profundo den UTS a bai den ko’i sushi (https://www.scribd.com/document/360620360/Moshon-II-Aproba-OV-9-dec-2014-Investigashon-di-ARC-riba-UTS). UTS ta e mesun kompania di gobièrnu ku den e dianan aki a anunsiá ku bendishon di gabinete Rhuggenaath ku lo bai manda 280 mama i tata di famia kas.

UTS a pèrdè miónes di florin na Sürnam, St. Kitts i diferente otro aventuranan den region, negoshinan mal hasi i sin tene kuenta ku desaroyonan teknológiko, tarifanan di internèt super haltu ku ta motibu ku mas ku 50% di kasnan na Kòrsou no ta dispone di un konekshon di internèt. Miéntras ku internèt no ta un luho mas, sino un medio edukashonal.

Asina nos por kontinuá menshoná kosnan inkorekto ku a tuma lugá bou di maneho di e gerente aktual, pero gobièrnu ta skohe pa protehé e gerente i para e posibilidat di un kontrol di parti di esnan ku tin ku kuida interes di pueblo.

Un Promé Minister responsabel mester aktua na interes di pueblo, sr. Gilmar “Pik” Pisas dia 31 di mart 2017, dunando rèspèt na e moshon ku mayoria den Parlamento a aprobá pa laga investigá UTS, sr. Pisas a permití ARC pa bai den “Cassatie” despues di a haña konseho hurídiko positivo i tambe ora Korte di Kasashon (Hoge Raad) a aprobá dia 28 di aprel 2017 e petishon pa apelashon mirando ku tin sufisiente base pa atendé e petishon di kasashon di ARC kontra UTS.

Karta di Kontroloria General 29 di sèptèmber 2017: https://www.scribd.com/document/360620245/Karta-Di-Alg-Rekenkamer-29-September-2017-Na-Staten

Dia 27 di sèptèmber último, Gabinete Rhuggenaath ta drei bek e desishon di sr. Pisas i ta skohe pa tira e moshon di Parlamento di Kòrsou di 9 di desèmber 2014 den ko’i sushi, ki sentido tin pa Parlamento reuní den debatenan maratóniko pa debatí kon ta manehá propiedatnan di Pueblo ku ta pèrdè miónes di florin sin duna ningun kuenta i rason anto gobièrnu ta aprobá pa para e desishon aki pa asina blòkia kontrol den e N.V. aki.

Ta ora tin kos di skonde ta blòkia kontrol, ta ora tin kos robes ta sosodé ta blòkia kontrol. Ta kontra di korupshon, pero no ke kontrol den UTS, ta papia di transparensia pero ke obra den skuridat. Pueblo tin derechi di sa tur lokual ta sosodé den su kompanianan, paso ora kos bai malu ku e kompanianan ta sèn di pueblo for di presupuesto ta usa pa drecha nan finansieramente.

Lo no ta un sorpresa pa frakshon di MFK ku e moshon akseptá siman pasa pa kontrolá e benta di Kas di Kòrsou pa medio di un investigashon di ARC tambe gobièrnu lo no laga esaki tuma lugá no opstante ku Parlamento a disidí pa laga hasi un kontrol.

Ku e koalishon di PAR-MAN i PIN definitivamente nos demokrasia a pèrdè kontenido i Parlamento a pèrdè su karakter independiente. Agènda di reunion den Parlamento ya ta wòrdu traha a base di e agènda di gobièrnu i no ta duna rèspèt na preokupashon di miembronan di Parlamento di Kòrsou, reunion ta tuma lugá ora Ministernan nan por i ke.

Ta dirigí Parlamento su trabou i outoridat for di Fort Amsterdam 17.

MFK ta spera ku trahadónan di UTS i nan representashon sindikal lo no akseptá, ku un biaha mas ta sakrifiká empleadonan pa un solo hòmber por kontinuá ku un maneho sin vishon i ku bendishon di gobièrnu pa no laga kontrolá su maneho.

Kòrsou, 3 di òktober 2017

Gerrit F. Schotte

 

Webmaster

Leave a Reply