• PLAN DI AKSHON
    MFK 2016
  • flag-curacao flag-holanda
Home MFK Pueblo su siman di sita ku frakshon di MFK

Mas di 70 sita ku Parlamentario i Lider Polítiko sr. Gerrit Schotte i tambe Parlamentario sr. Charles Cooper a tuma lugá e siman tras di lomba

Ku un lista di espera di mas di 120 persona pendiente pa un sita ku e lider polítiko di MFK òf un otro miembro di Parlamento pa MFK e siman tras di lomba a skucha mas di 70 famia. 

Pa mas di 7 aña for di inisio di eksistensha di nos organisashon Polítiko Movementu Futuro Kòrsou kada 2 siman nos lider Polítiko ta sostené sitanan ku pueblo ku ta solisitá esaki atraves di e kantor prinsipal di MFK (# 724-7766) na saliña. Nos organisashon polítiko a organisá su mes di tal forma ku nos sede ta habri tur dia den siman di djaluna pa djabièrnè di 8 or di mainta te 5or di atardi ya pa 7 aña konsekutivo. Algu ku den polítika na Kòrsou nunka a sosodé, tradishonalmente sedenan ta habri ora e partido ta partisipando den Gobièrnu i òf ora tin kampaña elektoral i nunka tabata asina ku e organisashon polítiko su sede ta habri sagradamente tur dia pa akseso na nan, ku MFK esaki si ta e kaso.

Dunando oido i atenshon na e preokupashon di nos hendenan e siman aki a atendé mas di 70 sita ku diferente problemátika, ku e prome 15 sitanan di djaluna nos mester bisa ku tur e bishitantenan a haña nan guia, konseho òf solushon pa nan preokupashon i asina e siman a sigui desaroyá su mes tambe ku tur e otro sitanan. Nos parlamentarionan ku vasto eksperensha òf konosementu di materia tabata sa di konsehá òf yuda ku e problema opviamente te kaminda nos por.

E problemanan ku mas a bin dilanti ta esnan ku MFK ya a señalá den nos programa di Gobernashon (Elekshon) 5 di Òktober 2016 i tambe 28 di aprel 2017, ku ta e problemátika di

  1. Kasnan soshal, ku te na momento ku Gobièrnu no kuminsá konstruí 1000 kas pa aña nos lo no sali for di sirkulo problemátiko di demanda di kas miéntras no ta konstruyendo nada konforme e demanda.
  2. Oportunidat di trabou, kuponan di trabou ku a disparsé den e último añanan i ku ta esensial pa sobrebibensia i desaroyo di e míles i míles di kabesnan di famia awe sin trabou. Falta di kresementu ekonómiko i parálisis ekonómiko tin mas di 10,000 hende awe sin trabou.
  3. Enseñansa, hopi mayor ku problema pa nan yunan sigui desaroyá nan mes, lugá pa kore Stage ku no tin, kupo pa sigui studia òf pa kuminsá haña edukashon i tambe klaridat i transparensha den tur lokual ta nos enseñansa ta un reklamo general.
  4. Problema ku tereno Huurgrond pa Erfpacht, hopi petishon na Domeinbeheer sin avanse den un tempu rasonabel, pa falta di kapasidat pa hopi tempu kaba tin hopi petishon na Domeinbeheer pa transformá Huurgronden den Erfpacht sin ku ta atende esaki den un tempu rasonabel (Solushon práktiko ekipá e dept. ku personal adishonal pa kaba tur e petishonnan aki den lapso di 3 luna i introdusí maneho pa un petishon asina keda kla mas tarda den 3 luna.) 

E último problema Huurgrond pa Erfpacht ku ta bin dilanti ku frekuensia den e sitanan ku nos ta sostené ta unu ku por trese un impakto ekonómiko satisfaktorio tambe, un maneho nobo di títulonan di tereno lo trese kuné un skuifmentu positivo den fiansanan hipotekario ku lo move e obra di man di fishi na gran eskala bek den nos pais, ku lo trese tambe un sirkulashon di airu fresku den konstrukshon.

 

 

E siman ku no tin sita ku pueblo nos ofisina i Parlamentarionan ta usa pa kanalisá e problematikanan presentá ku a ainda no tin un respuesta i òf un konklushon na e situashon, asina esakinan tambe ta kla ta tuma kontakto ku esnan ku tabata tin e sita pa informá nan di e status di nan petishon.

Movementu Futuro Kòrsou

Willemstad, Kòrsou 16 di yüli 2017,

 

 

 

 

Webmaster

Leave a Reply