• PLAN DI AKSHON
    MFK 2016
  • flag-curacao flag-holanda
Home Charetti Eduarda Parlamento ta un Órgano di Kontrol i no di Sosten

Eror ta algu humano i ta un señal ku nos ta vulnerabel i ku nos no tin tur kontesta i ku nos tin mester di otro. Kaminda tin hende ta traha eror por wòrdu kometí. Ta dependé di nos reakshon si e eror aki por keda transformá den un oportunidat pa krese òf bai atras. Tin eror ku nos mes por solushoná i asta tin eror ku nos mester tene sekreto. Tin eror ku ta asina bisto ku ni maske bo ke bo no por tene sekreto. Pa e tipo di erornan aki hopi biaha bo mester di yudansa di otronan pa un solushon. Aki bo ta krese òf kibra, bo abilidat pa rekonosé bo eror i pidi yudansa lo konta muchu mas pisa ku e eror mes kometí. Tin biaha bo tin ku kibra pa bo krese.

Tur hende ke bai dilanti, tur hende ke viktoria, pero hasta un atleta promé ku e kuminsá kore ta hinka rudia. E tentashon pa kulpa otro di bo eror òf tene nan responsabel pa no solushoná bo eror, no ta bai kita òf kompensá bo falta di disponibilidat pa ta humilde i rekonosé un fayo. Kada miembro di parlamento ta wòrdu elegí pa vigilá interes di pueblo di Kòrsou. Ta p’esei den nos sistema, parlamento tei pa kontrolá gobièrnu. Sostené un gobièrnu no ta nifiká tapa nan fayo òf keda sin señalá nan fayonan. Na final un tata ku ta stima su yunan, mes ta esun ku ta koregí su yunan. Si den salida aki, nos ta vota pro kosnan robes, nos ta vota kontra kosnan bon, djis pa sostené un gobièrnu i nos no ta defendé interes di e pueblo ku a skohe nos, nos ta robes.

Permití un minister den funshon yama miembronan di parlamento frus òf splika ku den otro pais nan lo a wòrdu asesiná kaba, ta ilustrá unda divishon a hiba nos dushi Kòrsou.

Permití pa e konseho di Ministernan keda huramentá, sin pèrkurá pa e parlamento keda intakto atras, ta un akto iresponsabel. E solo echo ku nunka promé esaki no a sosodé mester a sende un lus serka e gobièrnu ku a wòrdu huramentu. No aserka e sobra miembronan pa yuda remediá esaki ta un akto di orguyo i pretendé ku nada no a bai robes ta un insulto pa e inteligensia di konosedónan. Asta un bobo mes ora bo insult’é, su kueru ta pika. E orguyo semper a bai promé ku kaida.

Esaki ami ta siña mi yunan, promé ku bo splika bo eror, pidi pordon. Esei riba su mes ta habri porta pa tur hende sigui konfia bo. Un gobièrnu mester gosa di konfiansa i konfiansa bo no por imponé òf demand’é, bo tin ku gana esaki. Parlamentario Eduarda kier konfia, pero e pueblo no a skohe mi pa konfia, ma wòrdu skohe pa kontrolá i koregí esun nan ku ta goberná mi pais.

Tin 40.000 hende ku no a bai vota i nos tin 1459 dia mas pa konvensé nan ku nos ta digno di ehekutá e tarea di Kontrolá i Koregí, manera pueblo a enkargá nos.

Un Felis Aña 2017, Pueblo di Kòrsou.

Sra. Charetti Eduarda-Francisca

Miembro di Parlamento (MFK)

Tel. 515-6162

Kòrsou, 3 di yanüari 2017            

                    

 

Webmaster

Leave a Reply