• PLAN DI AKSHON
    MFK 2016
  • flag-curacao flag-holanda
Home Charetti Eduarda -Karta habri di Parlamentario Charetti Eduarda-Francisca na Pueblo di Kòrsou-

5.6 mion pa un Bachelor Opleideing ku no a bai destaho públiko

Semper mi a wòrdu siña ku loke ta bon ta bon i loke ta robes no ta bira bon ni maske kuantu bo ignorá òf spliká esaki. Despues di un reunion ku a kaba te den oranan di mardugá ayera nochi, mi a bai kas i bolbe repasá nos leinan di kompatibilidat i maneho finansiero.

Pa esun ku tambe ke hasi esaki e paginá riba wep di Kontraloria General ta duna bo e oportunidat aki. Djis bishitá www.rekenkamercuracao.cw i buska Landsverordening Finacieel Beheer.

Prinsipalmente artíkulo 10 tabata mi dilema, kiko legisladó kièr a logra ku e artíkulo aki ? Di kiko e kièr a protehá e komunidat ? Despues di a skucha Minister Demishonario di Hustisia Sr. Navarro su kontestanan riba mi preguntanan mi a konkluí ku no tin niun manera ku un hurista di e kalidat di Sr. Navarro por ta ignorá nos leinan òf no komprendé di e forma aki.

Mi pregunta mas simpel tabata

Sr. Presidente, Landsverordening | Financieel beheer Artikulo 10 insiso 1 ta bisa :

  1. Opdrachten tot het uitvoeren van werken en het doen van leveringen of dienst- verrichtingen ten behoeve van het Land waarvan de geraamde waarde gelijk is aan of groter is dan NAf 100.000, worden in het openbaar aanbesteed. In afwijking van de eerste volzin worden alleen opdrachten tot het uitvoeren van civiel technische werken, waarvan de geraamde waarde gelijk is aan of groter is dan NAf 250.000 in het openbaar aanbesteed.

Insiso 5 di e mesun artikulo 10 ta duna e siguiente posibilidat :

  1. De Minister van Financiën kan in het Landsbelang, in een met redenen omklede beschikking, beslissen dat wordt afgezien van de in het eerste en tweede lid bedoelde openbare aanbesteding respectievelijk offerte procedure.

Sr. Presidente, Sr. Minister ta disponé di un beschikking di Minister di Finansa, kaminda esaki a splika kua ta e interes di pais ku a pone bai di akuerdo ku un oferta so, en bes di un destaho públiko pa 5.6 mion ?

Sr. Minister Demishonario Navarro su kontesta tabata ta ku e la haña un aprobashon verbal di Minister di Finansa i ku esei mes ta sufisiente. Verbal…ku boka, e Minister a pretendé ku 5.6 mion por wòrdu duna sin kumpli ku loke lei ta eksigí, djis ku boka, manera kos ku ta for di bo pòtmòni mes e ta sali. Stail di, amigu fia mi 10 florin.Tambe e la bisa di ta straña ku e echo ku e no a tene un destaho públiko violando e artíkulo ariba menshoná ta motibu di diskushon. Segun Minister Navarro ku esaki tabata komun promé ku 10.10.10 i ta awor e ta birando un kos no komun. 5.6 mion ta wòrdu saka for di e fondo di kriminalidat, e mes un fondo ku afpakteam ta depositá tur sèn ku wòrdu konfiská for di esnan ku violá lei, i ta duna esaki na un persona ku no a bai un destaho públiko violando lei.

E aktonan aki no ta wòrdu hasi den skuridat òf dor di hendenan ku no sa mihó. Aparentemente no tin mester di skonde ni splika di kon ta violá lei si bo ta konta ku un mayoria mínimo di 11 den parlamento. Parlamento e mes un órgano ku a wòrdu skohe pa protehá interes di e siudadano komun ku ta lucha pa haña 56 sèn pa kumpra pan tur dia. Parlamento ku nunka por ta pro violashon di un lei ku e mes a krea. Danki Dios mi tin Dios, sino awe lo mi a pèrdè tur speransa di un kambio berdadero den e pais aki i e konfiansa ku un mihó Kòrsou pa mi yunan ta posibel.

Pa esun nan ku no por a sigui e reunion òf no ta komprendé loke a pasa, aki ta sigui un relato kòrtiku di e testigu i representante públiko ku bo a skohe pa defendé bo interes den parlamento.

  1. Minister a aserka un konosí di dje, esposo di un figura polítiko pa hasi un investigashon den polis.
  2. Pa e investigashon aki e persona en kuestion a risibí riba 300.000,- florin.
  3. Pa e e investigashon aki no tabatin destaho públiko konforme lei.
  4. Minister mes a skohe e persona ku e konosé ariba menshoná.
  5. Den e investigashon aki e persona a bisa Minister komo konklushon ku mester mehorá e estudio di polis, i krea algu ku e mes no a yega di duna nunka.
  6. Ba rei kaba, Minister a bolbe duna e persona aki e trabou ku e mes a krea sin bai destaho públiko.
  7. E estudio aki lo kosta nos komunidat 5.6 mion florin.
  8. Di kon asina karu ? Paso e persona di minister su eskoho no tin un universidat operando na Kòrsou. Awor e mester bai hür sala, paga dosente i finansiá e operashon aki for di nada.
  9. Pero keda kòrda ku e Minister ta demishonario, e no tin sosten mas den parlamento i no por firma nada nobo tampoko. Pero 11 parlamentario ku a kaba di sali un elekshon ganando konfiansa di pueblo i huramentá dilanti gobernador ku nan lo vota segun nan konsenshi sin preshon òf rekompensa algun a sostene e minister.

E 10 otro koleganan a ofresé e 11 parlamentarionan aki un otro alternativa. Un moshon ku ta bisa, e kos aki ta straño e no ta hole bon, e no ta urgente, pa nos no kima nos dede aprobando violashon di nos leinan di bon gobernashon i maneho finansiero, WANTE. Laga kontraloria general investigá i si tur kos ta ok dal bai. Lamentablemente e moshon aki no por a skapa partidonan ku ta bai forma un gobièrnu nobo di kima nan dede i bira kómplise di krea presedente di violá lei di maneho finansiero i bon gobernashon. Tur a vota kontra, i a produsí un moshon huntu ku ta bisa ; Minister dal bai, no ta nada ku abo mes komo minister di hustisia, ta violá lei, bo tin nos sosten pa evitá ku nos gobièrnu ta pèrdè sosten.

Pero tin dos bon notisia si. E promé bon notisia ta ku kontraloria general mes por investigá riba inisiativa propio i mi ta urgiendo nan pa hasi esei. 5.6 mion den un pais ku a sufri tantu medida pa baha gastu ta un bòfta den nos kara. 5.6 mion ku a wòrdu kita for di hendenan ku a violá lei, i awor ta duna un organisashon esaki sin bai un destaho publiko, esaki ta un wega peligroso.

E di dos bon notisia ta ku fout ta humano, i e ser humano por koregí su fout. Mi ta hasi un apelashon na mi koleganan parlamentario personalmente, no tras di liña di partido òf miedu pa gobièrnu no forma. Personal individualmente ku futuro di bo yunan den mente i kurashi pa krea un pais diferente, para e proyekto aki den tratamentu di presupuesto i wak pa bo konsenshi ta limpi. E reunionnan sekreto ku tabatin entre partidonan ku ta bai forma gobièrnu durante e pousa nan den Parlamento, no ta sekreto pa Dios.

Charetti Eduarda-Francisca

Miembro di Parlamento (MFK)

Kòrsou, 7 di desèmber 2016        

charetti-eduarda-francisca-2016                        

Webmaster

Leave a Reply