• PLAN DI AKSHON
    MFK 2016
  • flag-curacao flag-holanda
Home Gerrit Schotte Deklarashon di lider di MFK, sr. Gerrit F. Schotte 11 di òktober...

Deklarashon Gerrit F. Schotte – 11 di òktober 2016

Promé ku tur kos, mi ke yama Dios Todopoderoso danki pa a guia mi i bendishoná mi ku e forsa inkansabel ku ta yuda mi tur dia di nobo pa sigui ku e lucha na bienestar di mi Pais.

Tambe mi ke yama danki na tur e 8854 votadónan ku a depositá nan konfiansa den mi. Apesar di tur e kalumnia, atakenan personal, negativismo i asta un kaso hudisial, nan ta kere den mi persona, den nos vishon komo organisashon i nan a hasi mi e lider ku mas voto personal. Danki di kurason.

Danki na tur e 12.671 votadónan ku a depositá nan konfiansa den MFK. Danki.

Teniendo nos votadónan na kuenta, mi ke partisipá pueblo en general pa medio di esaki, ku ami Gerrit Schotte ta dispuesto di dal un stap atras pa asina Kòrsou haña e gobièrnu ku pueblo realmente a skohe p’e.

at8a7200

E mandato ku e pueblo a reflehá den urnanan na Kòrsou dia 5 di òktober ta unu klaro, esaki ta pa nos sinta i yega na un gobièrnu ku realmente ta traha na bienestar di kada un di nos.

Tres partido a saka 4 asiento MAN, MFK i PAR. Nos ta e di dos forsa polítiko ku 168 voto di diferensia for di e ganadó. Sinembargo, ya pa 3 elekshon e kampo sosial-iskierdista ta esun ku mas voto i asiento tin.

Lo ta inkomprensibel ku den un gobièrnu nobo MFK no ta aden, i ta hopi straño ku e partido ku tin 4 asiento i 168 voto mas ku MFK i ku a sinta den oposishon 4 aña i a biba e doló di e pueblo ta konsiderá ku pueblo ke un gobièrnu formá ku 3 partido ku a goberná e último 4 añanan, tresiendo nos na un parálisis ekonómiko, kreando pobresa i desempleo. Esaki sin ku na ningun momentu a hiba un kombersashon orientativo ku MFK pa konsiderá otro tipo di formashon.

MFK ta un movementu polítiko di muhé i hòmbernan prepará pa atendé ku gobernashon i kla pa trese un kambio berdadero i profundo ku lo trese empleonan nobo, bon pagá, pa nos siudadanonan, ku lo trese seguridat bèk den nos komunidat i tambe un sistema di mihó edukashon ku nos hóbennan meresé.

 

at8a7214

MFK ta un organisashon ku vokashon di ta un Gobièrnu, komprometé ku bienestar di su pueblo. Ta e di 2 forsa ku a risibí mas voto i esaki mester hiba nos na reflekshoná i pensa kon pa aportá pa konstruí un mihó pais.

A wòrdu bisa públikamente ku ami Gerrit Schotte lo ta un opstákulo pa negoshá ku MFK i tambe pa MFK ta den Gobièrnu, apesar ku pueblo di Kòrsou evidentemente ta pensa i a vota diferente.

E opstákulo akí lo ta debí na e persekushon polítiko ku a sigui den mi kontra. Nos ta konfia den Dios ku pronto esaki lo wòrdu resolvé i ku mi señora i ami lo keda liber di tur akusashon.

Sinembargo, m’a disidí di anunsiá públikamente awe ku, pa MFK por forma parti di un gobernashon nobo tendiendo e deseo di nos votadónan i tambe e tim di MFK na kuenta, mi ta dispuesto di dal un stap atras for di mi enkargo públiko.

Mi úniko ophetivo ta di kontribuí na formashon di e gobièrnu ku pueblo realmente a skohe. Mi no ke pa ami ta e opstákulo akí, i miéntras mi ta resolvé mi situashon personal, mi ke laga MFK aportá na nos Pais manera nos a propagá den e programa di nos organisashon.

Ban wak si awor tin otro argumento pa no laga boluntat di pueblo reflehá den gobernashon i ku ta palabrashonnan entre partidonan previo na elekshon ta prevalesé riba deseo real di pueblo.

at8a7205

 

Mi no tin mayor interes  sino bienestar di mi pueblo. Ku hopi sinseridat mi ta bisa boso ku ami no ke ta e opstákulo. Mi ta stima Kòrsou, i tur su hendenan. Mi ta resistí di pensa ku nos ta un pueblo kondená na frakasá i na biba den pobresa.

Paso esaki no ta bèrdat. Nos tin tur kos den nos mannan pa kambia rumbo di nos  pais. Mi a kumpli ku trese MFK na e mihó resultado ku un presensia grandi den nos parlamento, pero no opstante esaki awe ami ta dal e promé stap, ta ora di pensa ‘grandi’.

Mi ke trankilisá nos votadónan ku esaki no ke men ku Gerrit Schotte ta laga boso desampará òf defroudá, al kontrario mi famia i ami ta sinti nos mas fuerte i determiná ku promé, pa sigui ku e lucha pa un mihó Kòrsou.

Un bes mas danki na Dios Todopoderoso pa permití mi ta aki, na mi famia, mi señora mi yunan i bosnan ku a vota pa mi i pa nos organisashon. Danki tambe na esnan ku no a hasi esaki, pa permití mi awe dal un stap dilanti den mi propio bida.

Webmaster