• PLAN DI AKSHON
    MFK 2016
  • flag-curacao flag-holanda
Home Gerrit Schotte EKONOMIA I EMPLEO PA KÒRSOU

Djaluna 29 di ougùstùs,

Riba dia di ayera Movementu Futuro Kòrsou, den nos rueda di prensa ku a tuma lugá na su sede di kampaña, a presentá e kompromiso ku nos tin ku pueblo di Kòrsou. Nos prioridat mas grandi pa e próksimo gobièrnu ta e kreashon di fuentenan nobo di empleo ku kuponan di trabou bon pagá i digno pa nos pais.
E sifra di desempleo ta na un punto hopi alarmante di 14,9% kontrali na proyekshonan ku tabata demostrá un bahada den desempleo. Un di kada sinku habitante di nos isla no tin trabou, algu hopi grave pa tur famia i pa desaroyo di nos pais.

Analisando e proyekshon di kresementu di e GDP den e próksimo añanan, Kòrsou lo tin un kresementu mínimo di bou di 1% den e siguiente añanan, di akuerdo ku e rapòrt di Fondo Monetario Internashonal.
Otro riesgo grave ta e tema di nos debe nashonal. Den solamente 4 aña, e gobièrnu aktual a krea un debe di 2.4 bion florin, kual ta representá ku kada mucha ku nase, si a hasi nada, ya kaba tin un debe di 85 mil florin.

Den e último añanan empleonan i ekonomia di nos pais no a wòrdu kuidá, un di e kasonan aki ta e situashon di hotèl Marriott. 250 famia kurasoleño a wòrdu lagá sin sosten ekonómiko. Motibu pakiko MFK a sinti e nesesidat di konvoká un rueda di prensa pa informá pueblo di e situashon aktual i tambe nos akshonnan pa mehorá bida di kurasoleñonan.

MFK lo traha inkansabelmente pa kuida empleonan eksistente i generá fuentenan nobo di trabou. Nos lo hasi’é ku e kombinashon i e esfuersonan di tur sector, manera ésun empresarial, emprendedónan, invershonistanan i gobièrnu.

MFK ta bai krea e kantidat mas grandi di empleo ku hamas a wòrdu kreá den historia. Den solamente 4 aña, kuponan nobo di trabou lo wòrdu generá pa medio di diferente strategia gubernamental ku lo duna un impulso gigantesko na nos ekonomia.

E gobièrnu MFK lo enfoká su mes riba trese famianan nobo emprendedó pa biba un bida isleño mientras nan ta kombertí nan mes den fuentenan di empleo direkto atrabes di e negoshinan ku nan ta emprendé den nos pais.
Otro punto hopi importante ta e oumento di turismo ku un 200%, desaroyando e inkrementando e volumen di turismo internashonal riba nos isla. Nos lo logra esaki brindando fasilidatnan na invershonistanan, ku un kambio real na nivel atministrativo, legal i teknológiko.
Nos lo traha pa baha OB di 9% pa 6% pa produktonan ta mas barata, benefisiando asina tantu konsumidónan komo bendedónan.

DSC_5020

Lo planteá e esfuerso di mas grandi den historia pa krea un verdadero Agro-Industria lokalmente, promoviendo e inkremento di produkshon avíkola i agríkola, di ganaderia i di peska.
Nos lo kombatí frontalmente e micro kartelnan ku no a pèrmití nos ekonomia krese na un velosidat máksimo. Ku inisiativanan privá i emprendedó, nos lo pone nos GDP krese bira por lo ménos 2% durante e próksimo 4 añanan.

Siendo un gobièrnu fasilitadó i elektróniko, nos lo trese fasilidat na e prosesonan di outorisashon i permit ku lo no tuma mas ku 72 ora pa ésunnan ku ta deseá di invertí den Kòrsou. Tambe ku fasilidat den e prosesonan di kontratashon i ku insentivonan fiskal, nos lo generá konfiansa i stabilidat riba nos isla.
Den MFK nos ta konvensí ku esaki ta e kaminda korekto, lógiko i necesario. Kombinando produkshon, ekonomia i kreashon di empleo, Kòrsou lo kombertí su mes realmente den un pais kompetitivo i rèndabel, un pais di ophetivonan grandi. Un pais equitativo i hustu, ku igualdat di oportunidatnan i trabou pa tur hende. Un berdadero kambio den kalidat di bida di kada kurasoleño.

Webmaster