• PLAN DI AKSHON
    MFK 2016
  • flag-curacao flag-holanda
Home Gerrit Schotte Presentashon na Prensa di e Lista Elektoral, Kandidatonan i Plan di Akshon...

Awe ta un dia grandi pa Movementu Futuro Kòrsou (MFK) i Pueblo di Kòrsou en partikular, esaki debí ku MFK a presentá na prensa i Pueblo di Kòrsou nos di tres lista elektoral den seis aña di eksistensia. Asina pueblo por sera konosí ku esnan ku ta forma parti di e ekipo ku dia 30 sèptèmber próksimo ta bai traha pa Kambia Nos bida.

Ku sentimentu miksto nos di MFK a presentá nos lista elektoral, esaki debí ku nos ta sinti nos mes ku e obligashon pa informá nos komunidat di un situashon monetario bastante preokupante. Esaki debí na un maneho finansiero/ekonómiko ku ta wòrdu pinta komo e mihó maneho ku a wòrdu hiba durante di e último añanan, pero e maneho aki lo bai kosta nos den futuro. Ekspertonan finansiero/ekonómiko ta pronostiká ku den 2018 pa 2019 lo nos ta bai tin un kaida di reservanan di divisas, ku por tin konsekuensia desastroso pa nos Kòrsou. E kaida di divisa aki lo afektá tur sektor den nos komunidat i nos situashon lo bira muchu mas malu ku e ta aktualmente.

Nos di MFK kier a djis alerta Pueblo di Kòrsou riba e situashon aki pa e no ta un sorpresa pa ningun hende. Kualkier gabinete ku bai goberná Kòrsou despues di 30 sèptèmber próksimo, lo bai haña nan mes konfrontá ku e problema aki i mester ta alerta pa minimalisá e daño ku esaki por okashoná. Esaki ta e efekto sekundario ku bo ta haña ora un pais tin un maneho finansiero/ekonómiko desastroso.

Plan di akshon 2016-2020: https://www.scribd.com/document/320010837/Plan-Di-Akshon-MFK-2016-2020

Pero tin lus na final di e tùnel, pasombra MFK ta alerta pero tambe nos ta tene kuenta den nos plan di akshon ku posibel solushon nan pa nos por minimalisá e daño ku e bahada di divisas aki lo por trese kuné. Puntonan ku ta den nos plan di akshon ku lo mester yuda karga un maneho muchu mas koherente i transparente ta  introdushon di E-Goverment, baha e O.B di 9% bek na 6%., stimulá krio di bestia, peska i agrikultura, eliminá e famoso belasting riba solo, krea un skol nashonal profeshonal di arte, fortifiká i traha na kresementu di nos turismo i hopi mas ku den e próksimo simannan nos lo komuniká ku bosnan.

Pueblo di Kòrsou, 30 di sèptèmber ta aserkando, e kambio ta bo(so) por trese, pa asina nos tur por Kambia Nos Bida i traha na un mihó Kòrsou. Nos di MFK ta konta ku bo(so) apoyo i nos ta spera ku e kandidatonan ku awe ta riba nos lista elektoral ku a wòrdu skohe despues di un proseso riguroso scrutinashon i training lo sa di konta ku bo(so) apoyo i konfiansa.

Ban Kambia Nos Bida, ban vota masalmente pa e lista blanku, pa asina kada un di nos eksperensia e kambio ku tantu nos ta anhelá.

Mensahe Gerrit Schotte Rueda di prensa by Gerrit Schotte on Scribd

Memorandum situashon Finansiero 2016 by Gerrit Schotte on Scribd

Plan Di Akshon MFK 2016 by Gerrit Schotte on Scribd

Webmaster