• PLAN DI AKSHON
    MFK 2016
  • flag-curacao flag-holanda
Home Sithree van Heydoorn Roadshow di minister di VVRP, sin un planifikashon na drechi ta perhudiká...

Nos por tuma nota ku den e último simannan ku e minister enkargá ku VVRP, den rekta final di e periodo di gobernashon, ta hibando un roadshow ku plaka di pueblo pa bende su mes den e kampanja polítiko ku nos ta aden.

Aparte di ta usa sèn di pueblo pa saka probecho polítiko, planifikashon i ehekushon di e proyektonan ku e minister ta kuminsá kuné ta laga masha hopi di deseá i ta perhudiká abitantenan di e diferente barionan i skolnan ku denter di korto tempu ta bai habri nan portanan atrobe.

Tera Kora - 1 (1)

Tin masha hopi reklamo riba e rotònde na Sta. Rosa ku a keda sumamente bunita, pero ku no a kontribuí na solushoná e fluho di tráfiko ku tin den e oranan drùk, manera mainta, mèrdia i atardi. Kontrario abitantenan di e area ta haña ku awor nan tin ku para mas largu den tráfiko, ku promé ku a konstruí e rotònde. Tambe na Banda Abou tin reklamo kon awe na Tera Kora abitantenan no por drenta nan propio kura sin destruí nan outo, riba via públiko tambe Ambulans i outonan di polis no por duna asistensia na drechi pa motibu di infrastruktura apliká robes.

Tera Kora - 2 (1)

Meskos nos a wòrdu aserka pa diferente abitante di barionan di Kustbatterij, Steenrijk, Cherasil i Monte Verde, ku ta hopi disgustá ku e forma i e temporada ku a skohe pa kibra tantu Oosterbeekstraat i Grebbeliniweg. E minister a opta pa den un area di apénas 300 meter, pa kibra kayanan pa renobashon dilanti di tres skol. Nos no mester lubidá ku den e próksimo 11 dianan e skolnan aki su portanan ta habri pa un aña eskolar nobo.

Grebbelinieweg - 1 (1)

A kibra kaya dilanti di eks Zwijssen College i skol Pedro Luis Brion, pa ta mas eksakto tres siman pasa a kibra Grebbeliniweg. Te awe e kaya ta para kibra sin ku ningun trabou ta tumando luga. A kibra dilanti di eks skol Sta. Rosa de Lima na Oosterbeekstraat i trabounan ta kana masha poko poko i e trabounan lo no termina promé ku skol kuminsá. Ku un bon planifikashon lo a hasi Oosterbeekstraat promé i despues kuminsá ku Grebbeliniweg, asina e trabou ta mihó planeá i ta minimalisá e molèster pa e abitantenan i outomobilistanan i muchanan ku tin ku kuminsá skol. Abitantenan ta puntra dikon no a kuminsá e trabounan aki un luna promé ku aña eskolar a termina, debí ku un luna promé ya diferente klas a kaba ku eksámen i e fluho di studiante i tráfiko ta ménos.

Grebbelinieweg - 2 (1)

Pero na e momento aki ta mas importante ta pa e minister bende su mes elektoralmente, inisiando un kantidat di proyektonan pa krea e impreshon ku ta hasiendo un trabou èkstra ordinario pa pueblo di Kòrsou. Danki Dios e pueblo aki a demonstrá den elekshonnan anterior ku nan no ta vota pa un partido òf minister ku ta drecha kaya, pasombra miéntras ku tin sèn kualke minister ku ser pone na kabes di VVRP lo drecha kayanan di Kòrsou.

Grebbelinieweg - 3 (1)

Minsiter di VVRP mester kuminsá un roadshow kaminda e ta informá pueblo den e último kuater añanan ku a transkurí ku su partido tin e kartera di VVRP, kuantu kas nan a konstruí pa pueblo. Kas pa pueblo ta un di e nesesidatnan di mas grandi den nos komunidat. Kiko pueblo ta hasi ku kayanan bunita i abitantenan no tin un dak riba nan.

kabes. Abitantenan ta inskribí na mes na FKP i ta drenta den un sistema di puntuashon ku tur hende sa ku e sistema di puntuashon aki ta un frakaso total i ku esaki nunka no a funshoná na bienestar i benefisio di esnan ku ta den nesesidat di un kas.

Ta p’esei dia 30 di sèptèmber próksimo ora nos bai urna pa vota pa nos “Ban Kambia Nos Bida”. Un di e promé desishonnan ku e gobièrnu forma pa MFK lo tuma ta pa eliminá e sistema di puntuashon ku tin na FKP. Nos lo aktivá un plan maestro pa kuminsá rápidamente ku konstrukshon di kas pa pueblo, pasombra ta esaki ta prioridat i un di e nesesidatnan di mas grandi serka un grupo grandi di siudadanonan di Kòrsou.

Nos ta spera ku promé ku skol kuminsá e minister lo atendé ku e desishon deskabeyá ku su ministerio a tuma pa kibra Grebelliniweg i Oosterbeekstraat kaminda tin tres skol ubika.

 

Sithree van Heydoorn
Miembro di Parlamentu
Tel. 540 9714

 

Kòrsou, 31 di yüli 2016

 

Webmaster

Leave a Reply