• PLAN DI AKSHON
    MFK 2016
  • flag-curacao flag-holanda
Home Jacinta Constancia Gobièrno no a konstruí kas pa Pueblo

Molestiá pueblo kobrandonan bruto i awó ta resultá ku atministrashon finansiero ta kana kompletamente robes den FKP i FPP

No ta 134 kas mester pa alivia un lista di espera di 7000 hende pero 1000 kas konstruí pa aña mester. Den dokumentonan ku nos a risibí den nos brivenbùs, nos por a tuma nota ku e atministrashon den Fundashon Kas Popular (FKP) i Fundashon Fiansa Popular (FPP), ta asina for di òrdu ku e akountent ku ta enkargá pa kontrolá e atministrashon di e dos fundashon nan aki, hasta ta pensa di entrega bek e trabou di kontrol ku a nan a wòrdu enkargá kuné, debí na desòrdu den e atministrashon.

Durante di e último kuater añanan ku a transkurí e kantidat di siudadano ku ta inskribí na FKP pa un kas di pueblo a sigui oumentá te na 7000 persona, miéntras ku FKP praktikamente no ta konstruyendo kas pa aliviá doló di e pueblo. Ketu bai ta aplikando un sistema di punto ku durante di añanan e sistema aki a demonstrá ku e no ta funshoná i hasta personanan ku a yega e kantidat máksimo (500) punto pa haña un kas, ta keda pega awor riba un lista di espera nobo debí ku no tin kas pa entrega na nan ku a yega e kantidat di punto máksimo.

A laga limpia Wechi mas di sinku (5) biaha pa kuminsá ku konstrukshon di kasnan pa pueblo, pero te ku awe ningun kas no a wòrdu konstruí. Barionan ku nos a bishita kaminda tin kas di FKP, habitante nan ta sklama pa mantenshon di e kasnan, tambe nos a konstatá ku tin masha hopi kas di FKP ku no ta habitá mas pero ku no ta wòrdu mantené òf renobá pa personanan ku ta riba e lista di espera por bai den e kasnan aki.

Ora bo tuma nota di e memo di Price Waterhouse Cooper na bestür i gerensia di FKP i FPP, bo ta komprondé ta dikon e lista di espera ta sigui krese, bo ta komprondé ta dikon siudadanonan ku yega na e máksimo puntuashon no por haña kas i dikon no ta hasi mantenshon na kas nan eksistente.

E forma for di òrdu ku e kompania di akountent ta reportá ku e atministrashon di FKP i FPP ta aden ta loke a pone nos yega na e konklushon ku ta imposibel pa e dos fundashon nan aki por operá na un nivel ku nan por kumpli ku e meta pa kua na a wòrdu lanta. E kompania di akountent tin vários aña ta pidi gerensia di e dos fundashon nan aki pa drecha nan atministrashon pa akountent por duna nan na final di kada aña un deklarashon di akountent riba e sifranan kontrolá. Pero maske kuantu e kompania di akountent a hala atenshon di tantu gerensia komo bestür nada no a sosodé.

Konsekuensia di e mal maneho atministrativo aki ta ku pueblo di Kòrsou ta esun ku ta sufri e konsekuensianan. Kasnan no ta wòrdu konstruí pa por wòrdu entrega na famianan ku ta desesperá pa por tin un kas pa nan biba aden. Kuantu tempu lo dura pa bestür di FKP i FPP tuma e akshon nan nesesario pa pone e atministrashon na òrdu pa asina por kuminsá konstruí kas pa pueblo haña.

Pregunta na minister i bestür di FKP ta;

Si no ta kapas pa hiba un bon atministrashon finansiero, FKP ta kapas pa konstruí kas pa e pueblo aki? Kuantu aña mas mester warda pa kuminsá konstruí kas pa aliviá un di e dolónan di mas grandi di e pueblo aki?

Aki 4 luna den a kambionan sigur ku lo tuma lugá despues di 30 di sèptèmber 2016, MFK si no lo basilá pa anunsiá ku den e próksimo 4 añanan lo traha kada aña 1000 kas riba terenonan ku Gobièrnu ta doño di dje i tambe den e proyekto di Oostpunt nos lo los desaroyo pa asina eliminá e maneho di spar punto i aloká e mas di 7000 famianan den un kas pa nan por biba.

 

Atentamente,

Jacintha Constansia
Miembro di Parlamento (MFK)
Kòrsou, 29 di mei 2016

PwC memo 23 Maart 2016.pdf

Webmaster

Leave a Reply