• PLAN DI AKSHON
    MFK 2016
  • flag-curacao flag-holanda
Home Amerigó Thodé MFK Thodé: Un bèrgwensa nashonal: Tantu gabinetenan Betrian, Hodge, Asjes, Whiteman 1,...

Inkreibel pero berdat ku tantu Gabinetenan Betrian, Hodge, Asjes, Whiteman 1 i tambe Whiteman 2 den 4 aña di nan gobernashon no por a produsí Maradó di heru (Ijzervlechters) na Kòrsou di moda ku nan por a bai traha den de proyekto di Hospital nobo.

Un gobièrnu ku a indiká ku ta hendenan profeshonal nan ta, ku ta hendenan ku skol i tambe hendenan ku titulo dilanti mei mei i patras di nan nòmber i ku ta nan si sa kon pa goberná e pais aki, awe a desepshoná henter pueblo di Kòrsou.

Spesialmente nos hóbennan ku a stens ku nan lo ta e proménan yamá pa por bini na remarke pa un trabou i asina baha e desempleo haltu ku tin bou di nos hubentut i nos hende grandinan, nos hóbennan i pueblo ta testigu ku tur loke e gobièrnu aki a papia i a primintí a kai na awa i nos pais ta bolbe haña otro sla devastador di e gobièrnu aki.

Frakshon di MFK ta konvensí ku e tipo di trabounan aki nos mes por prepará i produsí e hendenan aki riba nos merkado.

Nos tin sigur ku nos skolnan di fishi mes por produsí e tipo di fishinan aki den un tempu masha kòrtiku. Dor di pone un kuríkulo na e skolnan enkuestion i laga e skolnan prepará e alumnonan pa e fishi aki por bira realidat, i despues pone nan na trabou pa nan funshoná sin ningun klase di problema òf difikultat.

Pero si den e kaso aki bo tin un gobièrnu sin vishon, un gobièrnu ku no ta traha planifiká konforme nan skema di trabou i pa kolmo tambe sin un maneho, bo no por spera nada otro i na drechi di e gobièrnu aki. Bo mes lo no por kere ku e gobièrnu aki lo a bini ku un plan.

E gobièrnu aki tabata na altura kaba for di basta aña ku lo bini un konstrukshon di un hospital nobo i ta nan mes a hasi e eskoho for di 4 aña pasá ku nan lo a bai traha e hospital aki den Otrobanda, i ku lo bai tin mester di e tipo di fishi aki riba merkado pa por a laborá riba e tereno di hospital nobo..

Frakshon di MFK ta di opinion ku den e kaso aki gobièrnu a laga hopi di deseá, bo por maginábu ku den kuater aña nan no por a produsí loke mester awe riba merkado ta kon bo ta kere ku awor si esaki ta bai sosodé.

Ta hopi difísil i tambe imposibel di kere ku den e sinku lunanan ku a sobra e gobièrnu aki, ku nan gobernashon sostené pa partidonan PS, PAIS, PAR, PNP i tambe esun ku a hòrta asiento bai kuné for di PAR ta bai bini ku un plan ku asin’aki por solushoná e problema di trahadónan lokal ku e fishi di maradó di heru. Ya esaki a bira otro kaso pèrdí pasombra e kontratista ya kaba ta menasa gobièrnu ku claim nan mionario pa tardansa di e proyekto.

Pa kolmo algu insólito ku e gobièrnu aki mes algun dia pasá a pone moratorio riba merkado enkuanto di pidimentu di pèrmit di trabou pa ekstranheronan, awó nan mes na nan turno mester a kibra ku esaki i duna awe pèrmitnan di trabou na kontratista ku ta trahando e hospital nobo pa importá ekstranhero komo Maradó di heru for di Turkia pasombra lamentablemente nos pais mes no tin e tipo di trahadónan aki riba merkado.

Buska nan pa tira falta riba otro si nan ta bon pero ora yega nan bùrt ku pueblo ta spera ku nan si ta bai hasi algu pa baha e desempleo bou di hubentut i tambe bou di hende grandinan ku nan mes a krea nada no ta sosodé i nos ta sigui al òrden di dia.

Awó ku tin ku importá trahadó for di Turkia e gobièrnu aki ta sigui dispidimentu sènnan innesesariamente paso no solamente tin ku paga nan salario, pero tambe nan vuelo, nan estadia i nan hotèl.

Frakshon di MFK tin sigur ku nos por a skapa e sèn aki i invertí e lokual ku nos por a skapa den nos komunidat ku tantu tin mester di esaki.

Atentamente,

Amerigó C.M. Thodé

Kòrsou, 3 di aprel 2016

marado di heru

Webmaster

Leave a Reply