• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas Primintí sin kumpli

Karnaval a pasa te Seú tambe a pasa, Nada ainda di parti di Gobièrnu pa ku kareteranan malisimo na Banda Bou

Dado momento nos komo habitantenan di Banda Bou, no sa mas kiko mester hasi pa promesanan hasi atraves di e último añanan i kumpli ku Banda Bou. For di 2010 mi a bini ta eksigí di parti di Ministernan di Tráfiko, Transporte i Planifikashon Urbano di turno, pa nos kareteranan malisimo na Banda Bou. Tabata eks Minister Sr. Charles Cooper ku a hasi e preparashon di e kaminda di Westpunt te ku Karke, pa despues di hopi reunion den Parlamento, kaminda sigur mi persona a bolbe toka e tópiko ei i eksigí trato igual, eks Minister Sr. Balborda a inisiá e proyekto.

Falta masha hopi mes pa ku e proyekto ei ta manera nos di Banda Bou ta deseá, pero riba esaki lo mi hasi preguntanan separadamente for di e komunikado aki. Nos di Banda Bou, ta sumamente desepshoná ku e aktitut di Minister di Tráfiko, Transporte i Planifikashon Urbano aktual Sra. Camelia-Römer, debí ku e la bisa nos ku despues di Karnaval e lo duna inisio na e Proyektonan di tantu Kaya Próspero Popo Royer i tambe e kaminda di Westpunt na altura di Wakawa direkshon Westpunt. Karnaval a pasa te ku Seú tambe a kaba di pasa, nos no a mira nada di e promesa hasi dor di e Minister aktual hasi na e Pueblo di Banda Bou. Dia 10 aprel 2016, lo tin Seú di Banda Bou, nos lo mester bolbe trafiká riba e mesun karetera malu ei ku ya ma menshoná pa Karnaval último ei.

No solamente nos, minister a bisa komo Parlamentario ku lo duna inisio na e proyektonan ei, pero tambe menshoná esaki na organisashon VIBA, ku tambe a lanta pa sali na fabor di e habitantenan di Banda Bou ku mi ta masha agradesido na nan. Nan ta los for di Polítika i tambe nan ta duna nos ku ta polítikonan di Banda Bou, un forsa pa nos sigui sali pa e derecho ku nos habitantenan di Banda Bou tin, paso obviamente nos tambe meresé. Nos sigur aworakí a realisá ku awe mas ku nunka nos bos tin mas sosten den Parlamento, paso e parti di ku habitantenan di Banda Bou, ta hende pasivo no ta reklamá nada i ta tuma tur kos pasivamente a pasa pa historia.

Ta lamentabel ku nos mester a sinta tende Minister anunsiá tantu proyekto na e área pariba i den nan ningun niun di e proyekto na Banda Bou ku ta pending. Akaso nos no ta paga belasting? Akaso nos no meresé un trato igual?

Tur hende sigur ku a bini Banda Bou pa dianan di fiesta por a mira, kon malu nos kareteranan ta. E asina yama Wèg naar Westpunt, na haltura di Wakawa bai direkshon Westpunt, Kaya Próspero Royer i tambe e kaminda di Sta Cruz direkshon Lagun i Kenepa, ta kayanan ku práktikamente a bira intrafikabel ku kualke vehíkulo i tambe na pia. Por a mira tambe klaramente videonan riba retnan sosial kon malu nos kareteranan ta. Por a mira e reakshonnan tambe ku habitantenan di Banda Bou, ta hopi fada ku e trato i ta hopi desidido pa akshona pa desishon kai pa drecha e kareteranan aki inmediatamente.

Ta pesei mi ke hasi un apelashon humildemente na Minister sra. Suzy Camelia-Römer, pa tuma un desishon awor pa drechamentu di nos kayanan na Banda Bou promé ku ta lat.

Nos tambe meresé un trato igual.

 

Na nòmber di frakshon di MFK

Gilmar “Pik” Pisas

Kòrsou, 28 di mart 2016

IMG_7467

Webmaster

Leave a Reply