• PLAN DI AKSHON
    MFK 2016
  • flag-curacao flag-holanda
Home Sithree van Heydoorn van Heydoorn – MFK: Gabinete Whiteman ta sigui neglishá maneho di deporte

E biaha aki ta turno di e deporte natashon, ku ta víktima awor di mal maneho

Te ku dia di awe gabinete Whiteman, no a hasi reparashon nesesario na e pisina di SDK ni na pisina Benny Leito. Den un bishita ku nos a realisá na e dos komplehonan aki, nos por a konstatá ku no tin ningun avanse den konstrukshon i/òf reparashon ta tumando lugá pa e pisinanan aki por funshoná di forma optimal.

Na e pisina di SDK nos a konstatá ku e area ku ta kondusí na e pisina aki ta kompletamente sera i no tin ningun trabou ta tumando lugá pa asina por pone e pisina aki operashonal bek. Despues di a bishita e pisina na SDK, nos a hasi un bishita na pisina Benny Leito na Rif. Nos a konstatá ku na pisina Benny Leito di e dos pisinanan ta un di nan so ta operashonal, pero e kolo di e awa ta mustra hopi sushi. Esaki ta trese preokupashon serka nos, pa e awa aki no ta kontaminá manera tabata e kaso ku e pisina na SDK i kousa malesa serka e hóben nan ku ta hasi uso di e pisina aki.

Grandi tabata nos sorpresa na pisina Benny Leito, ora nos a tuma nota ku di e dos pòmpnan ku tin pa distribuí i limpia e awa den e dos pisinanan na e kompleho aki, unu ta funshoná i e otro ta daña. E pòmp ku ta funshonando ta un “Bòm di Tempu” ku un ora pa otro por eksplotá. Hinter e sistema di pòmp aki ta frusa, di un forma ku ta imposibel pa hasi reparashon. Gobiernu mester laga remplasá e pòmp aki, pa evitá kualkier desgrasia i pa mayan nos no lamentá.

For di òktober di aña pasa mayornan a bati alarma, i for di nan propio saku mayornan a kubri gastunan pa laga un laboratorio na Hulanda analisá e awa di e pisina na SDK. E análisis aki a revelá ku e awa tabata kontaminá ku bakteria, i tabatin muchanan ku e bakteria aki a afektá i te awe e muchanan aki ta bou di tratamentu médiko. Durante reunion di presupuesto, desèmber aña pasa e dos minister nan enkargá ku deporte a primintí ku lo atendé e problemátiko aki, pa e deportistanan no wòrdu perhudiká. Awe despues di seis luna e situashon a keda meskos i pa e próksimo lunanan lo no bin un solushon pa e deportistanan aki i pa e skolnan ku ta hasi uso di e pisinanan aki tampoko.

Ta duele pa nos konstatá kon e gobiernu aki a neglishá deporte, e negligensia aki sigur no ta sirbi interes di nos deportistanan. No ta deporte di natashon so a wòrdu perhudiká durante di e último kuater aña nan aki, pero hinter e kadena deportivo a bin ta sufri pa desishon nan emoshonal i ku tabatin komo úniko meta pa tuma represaya kontra sierto dirigentenan deportivo. E represayanan aki a traha di forma kontrali i esnan ku a wòrdu perhudiká ta nos deportistanan, hóbennan ku tin e deseo pa progresá i sobresalí den e deporte ku nan ta praktiká ta esnan ku awe ta e víktimanan di desishon nan aki.

Den e korto tempu di eksistensia di FDDK nos por konstatá ku e úniko kos ku a kambia pa deporte na Kòrsou ta e nòmber di e organisashon enkargá ku deporte, e fundashon nobo aki su man i pia ta mara meskos ku tabata e kaso ku Sedreko i Fundashon Fasilidat nan Deportivo Kòrsou. Nan no tin sufisiente finansa i outoridat pa por aktua den tipo di situashon nan manera esun di e dos pisinanan aki i tambe den desaroyo general di deporte aki na Kòrsou.

Pa medio di esaki frakshon di MFK kier hasi un apelashon riba gobiernu di Kòrsou, ku tin dos minister enkargá ku deporte, pa resolvé e situashon di e pisinanan aki pa asina e deportistanan por praktiká nan deporte preferí mas pronto ku ta posibel. Ta un inhustisia ta kometiendo kontra di e hóben nan aki, ku tur dia di nobo ta lamentá ku nan no por praktiká.

Na nòmber di frakshon di MFK,

Sr. Sithree “Cey” van Heydoorn

Miembro di Parlamento pa MFK

Webmaster

Leave a Reply