• PLAN DI AKSHON
    MFK 2016
  • flag-curacao flag-holanda
Home Amerigó Thodé Hulanda ta pèrsistí pa kita outoridat (lei di sanshon 1997) for...

Gobièrnu aktual ta yuda den esaki dor di keda sin bisa nada den direkshon di Hulanda, manera ya a bira un kustumber di nan

Frakshon di MFK ta tumando nota ku e fenómeno di lèi di sanshon (SanctieLv.) a bolbe bira tópiko pasombra Parlamento di Hulanda ke pasa awor esaki komo un lèi di reino (Rijkswet) den su parlamento, den un stail di imponé esaki pa Kòrsou, no opstante ku Parlamento dos (2) biaha kaba a vota kontra di e lèi en kuestion.

Aunke ku nos órgano di konseho Raad van Advies a indiká bon kla ku Kòrsou no mester bai di akuerdo pa aseptá e lèi aki, e partidonan di PAIS enkabesá pa Alex Rosaria, PAR ku Zita Leito, PNP ku Humphrey Davelaar i esun ku a hòrta e asiento di partido PAR bai kuné ku ta Glenn Sulvaran ta para ariba pa sigui instrukshonnan di Hulanda pa sigui ku e sanshonnan di Union Europeo, aunke ku nan ta bon bon na altura ku nos pais no tin nodi di sigui ya ku nos no ta miembro di Union Europeo. Frakshon di MFK a para duru i bisa kaba ku bou di ningun forma nos lo bai aseptá e lèinan di Union Europeo pasombra ya kaba nos pais segun nos “Staatsregeling” (Konstitushon) un desishon di Nashonnan Uni tumá bou di kapítulo VII ta mara Kòrsou outomátikamente i ku tambe segun nos lei vigente di 1997 kaba tin un kuadro pa ehekutá sanshonnan di Nashonnan Uni.

Ta bini aserka ku konforme nos Statüt ku ta e lèi mas haltu den Reino, den art. 25 ta reglá tambe ku no por mara ni perhudiká niun di e Islanan den Reino ora ta trata di akuerdonan internashonal ekonómiko i tambe esnan finansiero ku un di nos lo por tin i ku nan e momento ey sanshonan no lo konta pa nos. Asina a sosodé den pasado kaba ora Hulanda a djòin sanshonnan kontra Jamaica i Cuba, nos komo Kòrsou no a sigui esakinan.

Si Hulanda ta haña ku nan tin ku sigui sanshonnan ku Union Europeo dikta i imponé pa nan pasombra nan ta miembro, esei ta keda nan prerogativa i nan pleno derecho di hasi esei pero no mester t’asina ku outomátikamente esaki tin ku konta pa nos pais. Nos ta un pais outónomo den Reino i Hulanda mester respetá nos punto di bista i respetá Statüt.

 

Amerigó C.M. Thodé

Miembro di Parlamento di Kòrsou (MFK)

Willemstad, 21 di mart 2015

#gfs2016 #unkambiosigur2016 #mfk2016 #elekshon2016

thode_amerigo

Webmaster

Leave a Reply