• PLAN DI AKSHON
    MFK 2016
  • flag-curacao flag-holanda
Home MFK MFK a entrega ayera un proyekto di lei pa trese un kambio...

Tur persona ku un pèrmit di estadia pa mas di sinku aña sin interupshon tambe lo por partisipá na elekshon

Despues di a tene diferente konsulta i tambe a hasi e investigashon nan nesesario, frakshon di MFK huntu ku su asesornan hurídiko a formulá un proyekto di lei pa trese un kambio den nos kódigo elektoral (Kiesreglement).

https://www.scribd.com/doc/303807965/MFK-a-entrega-un-proyekto-di-lei-awe-pa-trese-un-kambio-den-nos-Ko-digo-Elektoral

E kambio aki den nos kódigo elektoral lo bai trese kuné ku tur ekstranhero ku ta residensia pa mas ku sinku (5) aña na Kòrsou lo por partisipá na elekshon. Esaki semper teniendo na kuenta ku e ekstranhero ta dispone sinku aña konsekutivamente sin interupshon di un pèrmit di estadia.

E formulashon aki pa adaptá nos kódigo elektoral, no ta nada nobo den reino, na Hulanda ya pa basta aña e kambio aki a wòrdu inkorporá den e kódigo elektoral Hulandes, asina dunando e posibilidat na ekstranheronan ku mas di sinku (5) aña ku un estadia legal pa por partisipá na elekshon.

Loke e kambio di lei aki ta trese kuné, ta ku kontrali na e proseder ku tin awor aki, kaminda un grupo di imigrante ku debí na nan nashonalidat i ku na momentu ku “van rechtswege” nan risibí nan pèrmit di estadia, hopi bes apénas despues di un par di luna (2 òf 3) ku nan ta riba nos Isla, ya ta bin na remarke pa partisipá den e proseso elektoral i sin tin ningun konosementu/afinidat di nos kultura i polítika, awor e ekstranhero ku no por vota pa motibu di su nashonalidat tambe ta wòrdu inkluí den e proseso elektoral, semper ku e ta kumpli ku e rekerimentunan manera ya menshoná.

Sinku (5) aña bibando den nos sosiedat pagando belasting i aportando na nos ekonomia ta mas ku sufisiente pa un ekstranhero tamba a siña konosé nos kultura. E ekstranhero aki despues di tin sinku aña biba na Kòrsou ta apto pa formulá su opinion riba aspektonan polítiko den nos sosiedat i por duna su kontribushon den e proseso elektoral tambe, meskos ku e ta duna su kontribushon riba aspektonan fiskal den nos komunidat.

MFK ta spera ku e kambio di lei aki lo duna un kontribushon na e proseso di integrashon di ekstranhero nan den nos komunidat. Frakshon di MFK ta spera di por konta ku un sosten di mayoria den Staten pa aprobá e kambio di lei aki, den nos kódigo elektoral pa asina e ekstranhero ku ta kontribuí di un forma legal den nos komunidat tambe por partisipá den e proseso elektoral.

Si frakshon di MFK no logra di haña un mayoria pa aprobá e kambio di lei aki aworaki, konta ku na momentu ku MFK gana e elekshon aki i tin representashon di un mayoria, nos lo aprobá e lei aki tòg.

united color - vote

Webmaster

Leave a Reply