• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas Partido Pueblo Soberano a bolbe laga Pueblo di Banda Bou na Kaya

Fèlt di Bala di tantu Lagun i Sta Cruz te awe ta wardando pa pone lus na e terenonan ei

Nos tur ta kòrda ku kuantu fanfara, èks minister presidente Sr. I. Asjes di PS, a anunsiá dos proyekto na Banda Bou, kual tabata rekonstrukshon di e vèlt di baseball na Lagun i e fèlt di futbòl na Sta Cruz. Gobiernu a pasa propaganda na radio i na televishon diariamente pa informá di e rekonstrukshon di e dos proyektonan aki. Pero te ku dia di awe e dos proyektonan aki no a keda kla.

Mi no por keda sin remarká ku bou di maneho di Pueblo Soberano, deporte práktikamente a disparsé na Kòrsou. Tur loke Pueblo Soberano a mishi kuné òf a inisiá den gobernashon, práktikamente no a keda kla òf nan a hasi nan mas pió di loke nan tabata.

Dos ehèmpel klásiko ta e sala multi-funshonal na Barber i e Pisina na SDK. Tur hende por pasa wak e desaster okashoná dor di desishonnan, basa riba emoshon di e partido Pueblo Soberano. Awor akí nan a subi e trein di kampaña pa drecha e tereno di bala na Koral Specht, ban spera ku esaki no resultá den un otro desaster, ku hamas lo terminá teniendo na kuenta e “track record” di Partido Pueblo Soberano. Un proyekto no ta mara na fase inisial so, aparentemente ta esei so Partido Pueblo Soberano konosé. Inisiá e proyekto lag’é para kaba na nada, esaki no ta bon gobernashon.

Dos otro ehèmpel ta nos tereno di bala na Lagun i e fèlt di bala di Sta Cruz. E fèlt di Lagun a wòrdu rekonstruí i práktikamente a keda meskos paso einan mester a bin un plan kaminda e tereno lo mester a haña yerba artifisial i hopi atributo mas. Pueblo di Banda Bou no sa si e proyekto ei ta te einan e la keda. Pasombra no sa ki plan Partido Pueblo Soberano tin pa ku deporte despues di a destitui for di e puesto di Promé Minister na mal òrdu di Sr. Ivar Asjes.

Di dos problema ta e tereno di Sta Cruz, despues ku a rekonstruí esaki práktikamente a konstruí muraya di betòn ménos ku un meter for di e liña di e tereno di bala, ku lo ta un milager so por skapa e hungadónan di bala, pa nan no leshoná nan mes na e muraya ei.

Aserka ta bini ku for di aña pasa tur dos tereno ta wardando e LUSNAN pa sende debí ku e proyekto a wòrdu entrega dor di e kontratista i tabata wardando riba gobièrnu pa atendé e traspaso i pa nan por a regla e koriente na nòmber di e organisashon ku a tuma enkargo di e tereno.

Den reunion públiko di parlamento desèmber 2015, mi a trese esaki dilanti i Minister Ben Whiteman a kontesta, ku esaki lo wòrdu regla mas lihé posibel. Ma lubidá di puntr’e kua aña, paso te ku awe no tin koriente riba e tereno di bala di Sta Cruz ni esun di Lagun. Kasi niun ekipo na Banda Bou no tin koriente na nan tereno ku ta pone ku klupnan di futbòl ta wardando for di aña pasa e lusnan di e tereno di bala di Sta Cruz sende. Anto e ekiponan di baseball i softball ta wardando riba esun di Lagun. Nada no a pasa te ku awe.

Loke Partido Pueblo Soberano ta hasi riba e área deportivo aki mester keda konsiderá komo “Poison Ivy” Tur loke e partido aki mishi kuné e ta destruí

Minister Whiteman enkargá ku deporte e pregunta na bo persona ta simpel.

Ki dia e lusnan di terenonan di LAGUN komo di Sta Cruz ta sende?

E manera ku Pueblo Soberano a trata Pueblo di Banda Bou riba e área deportivo aki, ta pone mi hasi mi mes e pregunta “Ta ku ki kara Pueblo Soberano lo por bin pidi e pueblo di Banda Bou voto. FOEI!

Na nòmber di frakshon di MFK

 

Gilmar “Pik” Pisas

Miembro di Parlamento pa MFK

+5999-5252463

Kòrsou, 23 febrüari 2016

Pisas - 3 resumen

Webmaster

Leave a Reply