• PLAN DI AKSHON
    MFK 2016
  • flag-curacao flag-holanda
Home Jacinta Constancia Resúmen 2015 – Movementu Futuro Kòrsou, Trabounan hasí pa Jacinta Constancia

Parlamentario pa MFK ta habri aña 2015, rekordando komunidat di Kòrsou kon e gobièrnu aktual a primintí e pueblo ku lo bai tin “Speransa i Konfiansa” i ku e gobièrnu ta dispuesto pa hasi tur loke ta na su alkanse pa duna pueblo di Kòrsou loke e meresé. Sra. Constancia den mes un rosea a trese dilanti ku ora bo mira bèk awe, e gobièrnu no a kumpli ku ni 10% di e palabrashonnan hasí na e pueblo na kabamentu di 2012. E gobièrnu a trese kosnan negativo so den e 25 luna di gobernashon: “desòrdu, deskonfiansa, intrankilidat, desunion i falta di invershon nan nobo den nos pais” ta djis algun tópiko ku sra. Constancia a menshoná den su karta fechá 14 di yanüari 2015. Den e karta aki sra. Constancia a hasi uso di su derecho konforme e Reglamentu di Órden di Parlamento pa hasi pregunta na e Ministernan di Gabinete Asjes ku un total di 388 pregunta. IMG_1349-1 JC

Mayoria di e preguntanan tin di haber ku promesanan ku a wòrdu hasí na pueblo i ku nunka no a mira lus di dia òf implementashon den e sistema gubernamental. Awe 1 aña despues por bisa ku e gobièrnu no a kumpli ku ni un “handjevol” di tur lokual a wordú primintí den pasado. Pueblo i tambe komersio ta sufriendo ketubai den 2016.

Den e luna di febrüari 2015 ta pasa algu remarkabel den Parlamento na momentu ku Promé Minister sr. Ivar Asjes ta manda e “F-Word” den direkshon di Parlamentario di MFK sr. Amérigo Thodé durante un Reunion Públiko. Sra. Jacinta Constancia ku tabata presente i tabata na turno pa hiba palabra mesora a puntra presidente di Staten sr. Franco ku si ta pèrmití pa usa e tipo di lenguahe ey den sala di parlamento, pasó e forma di prosedor di sr. Ivar Asjes no solamente ta un falta di rèspèt pa miembronan di Parlamento, pero ta un bòftá den kara di pueblo di Kòrsou. Un biaha mas Frakshon di MFK ta trese pruebanan dilanti ku e Gabinete di Asjes ta leu for di ta “Shouru Proof”.

IMG_2354-2 JCUn problema grandi pa hopi aña kaba ta e problemátika di kas pa pueblo aki na Kòrsou. Sra. Jacinta Constancia a trese e tópiko aki bèk dilanti na yüli 2015 despues ku ela mira ku e ministernan konserní, ku ta sr. Earl Balborda i sra. Suzy Camelia-Römer no ta hasiendo nada pa e 3200 famianan ku tin e deseo pa bira doño di e kasnan di èks woningsbedrijf SEMAKO ku despues di siere a bira Fundashon Kas Popular (FKP). Pa motibu di falta di vishon i direkshon di e Ministernan aki mas ku 3000 famia ta keda perhudiká. Frakshon di MFK ta di opinion ku nos mester yega huntu na un vishon i direkshon final pa asina e pueblo por benefisiá i por bira doño di su propio kas. Mester kaba ku tur diskushon i stòp di hasi polítika barata na bienestar di nos pueblo ku meresé lo mihó di su mandatarionan. Sra. Jacinta Constancia a indiká ku e lo keda sigui tur e desaroyonan rondó di e kaso “SEMAKO” pa asina e 3200 famianan por logra bira doño di nan propio kas.

Komo èks Minister di Salubridat, sra. Jacinta Constancia ta tuma eliminashon di asbèst hopi na serio i ke mira trabounan riba e área aki bai sigun lèi ta stipulá na bienestar di e trahadónan su salú. Na fin di òktober 2015, siñalnan ta drenta serka sra. Jacinta Constancia ku di un forma un poko straño ta atendé ku un proyekto di pa eliminashon di asbèst riba tereno di RDK i ku e gerensha di RDK a invitá kuater kompania spesialisá den e proseso pa eliminá asbèst riba un área ku ta pertenesé na Refineria di Kòrsou (RDK) aya na ISLA.
IMG_1360-3 JCKosnan tabata bayendo kompletamente robes ku e kompania ku e gerensia di RDK a otorgá e trabou despues di e proseso di “destaho” ku no a bai mucho transparente. Tabatin prekupashon grandi ku e kompania skohé dor di e gerensia lo a pèrmití trahadónan bin den kontakto ku asbèst inapropiá butando nan situashon di salú na peliger. Pa e motibu aki sra. Constancia a manda un serie di pregunta na e Minister responsabel ku tin e kartera di Refineria di Kòrsou.

Despues ku sra. Jacinta Constancia a manda e karta pa Minister, e no a sinta ketu i ela sigui tur desaroyo rondó di e kaso misterioso aki. Den e di 2 siman di sèptèmber 2015 a bin sali na kla ku e kompania ku e gana e destaho públiko pa eliminá e asbèst riba e tereno di RDK ta yenando aparentemente e barínan ku tera enbes di asbèst. Medionan di Komunikashon e siman ey a batisá e fenómeno aki komo “Asbèst Gate”. Tur hende tabata papia riba e tópiko aki. MFK un biaha mas ta hasi su trabounan den oposishon manera mester ta i lo keda vigilá e trabounan di e Gabinete aktual ku wowonan di falki.

Ku e gobièrnu aktual no tin e pueblo di Kòrsou na pechu i no tin niun sorto di vishon kon pa atendé ku pobresa i nesesidat di hende a resultá den kabamentu di aña 2015 despues ku Gabinete di Asjes lo a tuma desishon pa stòp e proyekto di Kuminda Kayente na skolnan. Esaki despues ku nos grandinan a haña e sla di mas duru ku nan BVZ (basisverzekering). Sra. Constancia no por a sinta ketu i wak kon nos muchanan lo bai sufri bou di un otro medida mas ku Asjes i su Ministernan ta bai implementá. IMG_0835-5 JCJacinta e indiká ku ora para proyekto di kuminda na skol, empresarionan ku ta sòru sigur pa mas ku 600 mucha i hóben risibí kuminda na skol lo no por sigui ku e proyekto aki i tampoko lo no tin trabou pa e hulp-moedersnan ku ta sòru pa nos muchanan risibí kuminda kayente tur dia na skol. Sra. Constancia a mustra ku e si tin e proyekto aki na pechu dor di bisa lo siguiente den medionan di komunikashon:

“Den époka ku ami a fungi komo diputado na aña 2003 mi a heredá e proyekto di sr. Charles Cooper e tèmpo ei i mi a sigui ku e bunita proyekto aki, pasobra no ta importante ken a inisiá e proyekto pero mas bien e balor importante ku e proyekto tin pa nos mucha i hóbennan ku meresé di kome un kuminda fuerte (kayente) 1 x pa dia. Kon por ta posibel ku un gobièrnu ku su èks lider a propagandá di ta para pa e yu di Kòrsou, desaroyo di muchanan entre 0-4 aña, a propagandá ku lo introdusí “Lèi Bion” di sr. Inderson, tambe sra. Minister Larmonie-Cicilia ku a borotá for di fin desèmber 2014 ku e lo buta “1000 hóben na trabou” awe ta skohe pa kita hende for di trabou manda kas i para proyekto di kuminda kayente. Nos por konkluí e ora ei ku tabata promesanan bashí.

Komo parlamentario pa Movementu Futuro Kòrsou, mi ta spera ku Minister di SOAW sra. Larmonie-Cicilia kuminsá asumí su responsabilidat den su kartera i stòp di kulpa otro minister pa su frakasonan i pa realmente kumpli ku e grupo den nesesidat pa nan mira realmente e parti soshal reflehá den e maneho aktual”.

Kòrsou, 31 yanüari 2016

IMG_3641-4 JC

Webmaster

Leave a Reply