• PLAN DI AKSHON
    MFK 2016
  • flag-curacao flag-holanda
Home Sithree van Heydoorn Reklamo di nos komunidad riba DATA di celular 3G / 4G /...

Reguladó (BTP&U) no tin kontrol riba data ku kompanianan di telekomunikashon ta ofresiendo na usuarionan

Frakshon di Movementu Futuro Kòrsou (MFK), despues di a keda aserka dor di diferente hóben i mayornan, ku e reklamo ku Data (Internet) ku nan ta kumpra riba telefòn mobil ta kaba hopi lihé, nos a bai wak e situashon aki mas a fondo i a konstatá lo siguiente;

BTP&U ku ta e reguladó pa entre otro telekomunikashon, no tin kontrol ni riba e kantidat di MB i tampoko e preis ku ta wòrdu ofresé na usuarionan di UTS i Digicel pa uso di Data. Ku otro palabra BTP&U no ta kontrolá na e momentunan aki, si e preis ku ta wòrdu kobra i tambe e kantidat si e MB (data) ku un kliente ta risibí ta korekto.

data usage

Tin algun telefòn mobil ku ta bin ku un app, kual ta permití e usuario pa kontrolá su uso di Data. Debí ku e app aki ta un app general, BTP&U mester laga hasi un investigashon si e “parameter” nan ku e app aki ta uza pa registrá uso di data ta kuadra ku e “parameter” nan ku ta wòrdu usa pa UTS i Digicel i òf nan mes komo reguladó di telekomunikashon. Kisas e dos kompanianan aki mester laga traha nan propio app i pa despues ku reguladó kontrolá i sertifiká esaki, e app por wòrdu pone na disposishon di e usuarionan, pa asina nan por tin kontrol riba e uso di e Data ku nan ta kumpra.

Si mira loke UTS i Digicel ta ofresé na nan klientela, bo ta ripara mesora ku tin un diskrepansia den MB i preis. I ta e diskrepansia aki, ta un di e aspektonan ku BTP&U mester kuminsa investigá i splika dikon tin e diferensia aki. E kliente ku ta kumpra su data mester wòrdu garantisá ku e preis ku e ta paga ta ekivalente na e kantidat di MB ku e ta risibí. Meskos tambe e mester por kontrolá uso di e data ku e ta risibí for di e kompania di telekomunikashon.

3g-4g-lte-modelUso di e diferente aplikashon manera “Whatsapp”, “Instagram”, “Facebook”, Twitter etc etc pa medio di Data (Internet) i yamadanan di telefòn hasiendo uso di Internet (IP) ta kresiendo di un forma rápido, debí ku tur hende ta buska e medio mas kumbiniente ku e mundu teknológiko ta ofresé pa spar sen. I no ta nada straño pa Frakshon di MFK ku entradanan di UTS a bin ta kai atras nos a indiká esaki hopi aña pasa kaba. Ta pesey tambe na aña 2003 e gobièrno di Antias e tempu ey a indiká na UTS ku e monopolio di liña fiho lo termina den 10 aña paso e kompetensha lo bini for di diferente angulo i liña fiho via kabel lo bira opsoleto i esaki a sosode tambe.

Pero durante di e último 10 pa 15 añanan ku a transkurí, UTS no a hiba un maneho antisipando riba e desaroyonan teknológiko pa asina por a kontrolá e pèrdidanan ku e kompania lo por hiba. Mas bien UTS a drumi riba e desaroyonan i otronan ku a drenta den merkado despues, si a implementa e teknologia nobo nan aki i na preis nan mas kumbiniente.. Si tin un kos ku nos tur por ta sigur di dje ta, ku den próksimo añanan ku ta bai bin, nos lo bai eksperensia hopi kambio teknológiko mas, ku lo bai afektá entradanan di kompanianan di telekomunikashon pero tambe e forma ku e usuario lo bai komuniká ku otro.

Nos ta spera ku Gobièrno lo aktua rápido riba e aspekto di adapta lei pa por kontrola/regula DATA tambe, ku ta un preokupashon grandi serka e usuarionan. Si Gobièrno no duna oido na e preokupashon aki di Pueblo, nos di Parlamento lo tin ku prepara un proposishon pa trese e kambio aki den lei di telekomuniakshon, pa asina garantisa ku hoben i mayornan i tur usuario ta risibi e Data ku nan merese di risibi i na e preis pagabel kompara ku merkadonan regional. .

Na nòmber di frakshon di MFK.

 

Sithree A. van Heydoorn

Miembro di Parlamento

(+5999) 540-9714

Kòrsou, 24 yanüari 2016

Sithree van Heydoorn - Staten

 

 

 

 

 

 

 

 

 

#MFK2016 #KAMBIO2016 #GFS2016 #SVH2016 #KAMBIOSIGUR2016

Webmaster

Leave a Reply