• PLAN DI AKSHON
    MFK 2016
  • flag-curacao flag-holanda
Home Amerigó Thodé Resúmen 2015 – Movementu Futuro Kòrsou – Trabounan hasí pa Amerigo Thodé

Thodé ta habri aña 2015 rekordando Pueblo di Kòrsou ku MFK tin un kompromisio ku e pueblo, pa konstruí un Kòrsou Sano, Salú i Sigur i ku un “Mihó Kòrsou ta Posibel”. Parlamentarionan di MFK lo keda funshoná komo e wowo, orea i nanishi di e pueblo pa vigilá i alertá nan riba desishon i lèinan ku ta wòrdu apliká, kual lo tin konsekuensianan negativo, sea finansiero òf soshal-ekonómiko pa e pueblo.

Tabata e promé djaluna di aña 2015 ora Thodé a trese algun punto sumamente importante dilanti. E lèinan fiskal desastroso pa e pubelo ku Gabinete Asjes a aprobá den 2014 a drenta na vigor. Thodé a menshoná tur e lèinan aki un pa un.

  • Zonbelasting – Awor mester bai paga belasting pa hasi uso di solo pa generá koriente.
  • Bronbelasting – Siudadanonan mester bai paga impuesto riba interes di sèn ku nan tin di spar na banko.
  • Subida di OB na 9%
  • Medida di “Alivio” ku nunka a yega – Gabinete Asjes a primintí pueblo ku tur luna e lo bai keda, algu mas di sèn den su pòtmòni. Lamentablemente e klase trahadó lo bai wòrdu afektá dor di e medida fiskal aki Thodé a indik.
  • Onroerendgoedbelasting – Mester bai paga mas belasting den e sistema nobo riba bo propiedat: tereno òf kas.

IMG_0819Ku tur esakinan sr. Amérigo Thodé ke trese dilanti ku pueblo mes por konkluí ku e gobièrnu aki no ta dunando e pueblo nada bèk manera ela primintí den 2014.

Un punto hopi interesante ku Thodé a trese dilanti na yanüari 2015 ta ku Hospital Nobo lo bai kosta mas ku 100 mion florin èkstra. Awe, eksaktamente un aña despues esaki a bira un realidat i tur kos ta indiká ku e “meerwerk” lo por asta surprasá un montante riba 200 mion florin. Pueblo ta esun ku lo mester bai paga esaki bèk! Primanan di seguro lo bai subi drástikamente den 2017.

Den febrüari 2015 sr. Thodé ta hasi su mes e siguiente pregunta: “Alex Rosaria: 100% shouruproof of 200% shouru?” Hopi kos inhustu ta pasando na e momentu ey den nos komunidat. Alex Rosaria i su partido ta okupá nan mes full time ku yagmentu riba hende, drechamentu di nan pastechi i akomodá amigunan i no tin eskrúpulo pa hasi esaki na mal òrdu si mester. E korementu ku Adriaens pa habri kaminda pa nombra amigu na CAH mes ta un di e ehèmpelnan ku Amérigo a trese dilanti i tambe e ta mustra kon a stroba e mesun Adriaens pa bira direktor di CTDB, paso ta un amigu di PAIS mester haña e posishon aki.

Asina vários otro kasonan dudoso manera FDRS, seramentu SEDREKO, despilfaro di plaka den CPA, monopolio CPS, perdidanan den UTS i maneho descabeya den Aqualectra ta sali na kla. Awor a sali na kla tambe kiko e palabranan P.A.I.S. ta nifiká: “Partido Antisosial I Shouru”!!!

Den e mes un luna aki Thodé a trese e kaso di Gumbs (èks hefe di VDC) dilanti. E gobièrnu di Asjes ku ta sintá na e momentu ey, sostené dor di PNP, PS, PAIS i miembro independiente Sulvaran ta laga parse ku Schotte ta esun kulpabel pa e “definitieve ontslag” di sr. Gumbs. Pero ta Gabinete Asjes a vota i bai di akuerdo pa manda un karta di retiro “wegens ongeschiktheid” pa Gumbs, fechá 28 di novèmber 2013.IMG_2569

Kon bin a bai di akuerdo ku esaki i dikon ta keda schuif e kos den sapatu di Schotte? MFK ta para 100% tras di e karta ku Gabinete Schotte di ougùstùs 2012 ku e intenshon pa duna sr. Gumbs retiro.

Un persona ku ta malusá su posishon komo hefe di VDC, ku mester ta imparsial i íntegro pa aparentemente yuda un partido ku na 2010 kontrali na loke nan a spera no a drenta!
Den e di dos kuartal di 2015 situashonnan straño ta presentá pa loke ta trata CPS i Ministerio di Ekonomia, kaminda Minister Stanley Palm na e momentu ey ta na mando. Pueblo di Kòrsou por a mira kon e koalishon di partido PAIS, esun ku a hòrta asiento di PAR ku ta Glenn Sulvaran, PNP i pa straño ku por zona Partido Pueblo Soberano ta papia di eliminá monopolio pero ku ta nèt nan a alargá e monopolio ku CPS/AGT te ku aña 2021, miéntras ku e Gabinete di Gerrit Schotte a manda un desishon di AVA (Doño) pa CPA i a duna instrukshon na CPA pa indiká CPS/AGT ku lo no tin monopolio mas i esaki a sosodé na 9 di mèi 2011. Parlamento den un moshon di 17 di mèi 2011 tambe a ratifiká na Gobièrnu pa kita e monopolio aki ku tin den haf, ku ta e ardu importante den desaroyo ekonómiko pa nos komunidat. Thodé a indiká ku defuntu Helmien Wiels (q.e.p.d.) a bòltu den su graf ora ela tende su amigu Jaime Cordoba di su mes partido traishoná e kousa i entrega e monopolio un biaha mas na esnan ku semper e tabata kontra pa sigui prolongá monopolio kune.

IMG_2769Den e di dos parti di 2015, Banko Sentral a publiká su sifranan, esaki a bira aún mas un konfirmashon ku e gobièrnu di Gabinete Asjes formá pa profeshonalnan manera nan a bisa ku nan ta, un biaha mas ta demonstrá ku nan ta sin vishon, sin direkshon i ku pronóstikonan kompletamente deskabeyá. Resultadonan tabata mustra ketu bai ku enbes ku mester tabatin un kresementu den nos ekonomia esaki tabata kompletamente kontrali di tur nan mes un pronóstiko ku nan mes a indiká. Miéntras tantu ku e lider di partido PAIS, sr. Alex Rosaria ta emití un komunikado den yüli 2015, papiando di un situashon ekonómiko di Gresia, e realidat ta mustra kontrali: “Korsou a konosé un kaida di ekonomia di -1.1% den 2014 I asta un kaida di -0.5% den e promé kuartal di 2015. Ta fásil ta konkluí ku atrobe Alex Rosaria ku su partido PAIS ke sende lus na kaya, miéntras ekonomia di su kas mes tabata tin 31 luna den sukú.

Miéntras ku aña 2015 ta yegando na su fin, sr. Thodé ta poné na altura di un otro skandal ku ta kla pa bai sosodé. E biaha aki ta Minister van der Horst ta esun kulpabel ku ta bai purba regla pastechi pa su kompinchinan aktuando sigun e maneho di shouru di Partido PAIS. Van der Horst tabata planiando den sekreto un retiro masivo den nos sistema gubernamental.

No ménos ku 70 trahadó ku ta laborando ku dignidat tur dia pa por kria nan famia. Lo mas deskabeyá shouru ta ku e retiro aki no ta pa spar sèn, pero netamente pa remplasá nan ku “uitzendkracht”, kual probablemente ta di un kompania di un amigu òf pa benefisio personal.

Durante un entrevista na un radio emisora konosí Thodé a bisa lo siguiente: “Remplasando e empleadonan aki ku “uitzendkracht” lo kosta gobièrnu mas sèn pa luna, e úniko motibu ku nos por pensa ku e minister kier tuma e akshon aki ta pa sea benefisiá un bon amigu di dje òf e kier regla un pastechi pe, òf pa su benefisio personal. Ta alarmante kon un gabinete ku a mata nos pueblo ku medida ainda tin kurashi pa kontinuá lastimá nos pueblo ku tipo di aktonan sin moral asina aki”.

Tur kos ta indiká ku despues ku Thodé i MFK a sali den públiko ku e kaso rondó di e retiro masivo aki, e minister konserní a skohe pa laga tur kos para i kita e kos shouru aki for di riba mesa!

Den 2016 MFK i su Parlamentarionan lo sigui TUR desaroyo i stapnan di e aktual Gabinete.

Webmaster

Leave a Reply