• PLAN DI AKSHON
    MFK 2016
  • flag-curacao flag-holanda
Home Gerrit Schotte Huntu ku Amerigo Thodé tin 5 sospechoso mas ku mester wòrdu sentensiá

Ban wak ku Ministerio Públiko i Korte di primera instansha ta atendé nan meskos ku Thodé di MFK

E sentensia di djabièrnè 8 di yanüari 2016 kontra di parlamentario di MFK Amerigo Thodé a demostrá un biaha mas kon hustisia di klase ta funshonaá den nos sosiedat. Pueblo di Kòrsou, kada dia di nobo ta haña e pruebanan ku O.M. i Korte di Hustisia tin un solo meta, esta pa eliminá i/òf trata di tur forma pa mancha miembronan di MFK.

Pero den tur kos malu tin algu bon, ku e sentensia di awe hues a habri kaminda pa hasi denunsia na Ministerio Públiko kontra 3 otro parlamentario i kolaborador di frakshon ku hasi nan mes kulpabel di e mesun echonan di kual ta akusá kolega Amerigo.

Aparte ku a pidi abogado di Amerigo pa mesora bai den “beroep” riba e sentensia diktá djabièrnè último, por spera ku den kurso di otro siman lo entregá keho kontra parlamentarionan Rosaria, Franco i Koeiman, tambe lo entregá un keho kontra sr. A. Manuel kolaborador di e frakshon di partido Pais ku a drenta den e reunion ku e no tin nada di hasi den dje i a saka potret i publiká esakinan i tambe sr. A. Bakker presidente di CFT.

Partido PAIS ta publika 5 sept 2014 kontenido di reunion di komishon di finansasRelato di Partido Pais riba reunion komishon finansiero di Parlamento, 5 di septetmber 2014

Persconferentie-Cft

Presidente di CFT dunando prensa tur informashon papia den Komishon finansiero na sèptèmber 2014

Meskos ku Amerigo Thodé e sinku personanan aki a duna deklarashon den prensa ku ta regardá tópikonan ku a wòrdu tratá den e reunion aki, kaminda representantenan di pueblo supuestamente lo mester tene informashon sekreto pa Pueblo di Kòrsou. Awo ta e momentu pa Ministerio Públiko demonstrá na pueblo di Kòrsou ku nan ta imparsial i íntegro i ku di bèrdat nan no ta un organisashon polítiko den nos sosiedat. Nos di MFK i un gran mayoria di Pueblo di Kòrsou ta bai sinta trankil den nos stul di zoya i wak kon Ministerio Públiko ta bai trata e sinku kehonan aki. Nos ta bai vigilá ki dia lo trata e kasonan aki den korte i sentensiá e sinku personanan aki ku a kometé e mesun violashon di lèi ku supuestamente Amerigo a violá.

Imaginá bo Pueblo di Korsou, ku hues den su konsiderashon ta yega na e konklushon ku Amerigo mester a pidi presidente di CFT outorisashon pa hasi deklarashon riba finansa públiko di pueblo di Kòrsou ku hustamente e ta yama komo representante di pueblo di vigilá na su nomber i tambe ku ta regardá puntonan ku a wòrdu tratá den e reunion aki. Ku otro palabra e hues aki kier mina e outoridat di Parlamento di Kòrsou i halsa CFT riba nos Parlamento. Esaki ta un konsiderashon sumamente peligroso i hasta anti demokrátiko kaminda kier trata na sera boka di representantenan di Pueblo den Parlamento.

Manera ya indiká e último palabra no a wòrdu papià ainda den e kaso aki i pa nos di MFK e kaso aki a bira un kaso di prinsipio i mas ainda un kaso kaminda nos di MFK ta bai buska no solamente pa demonstrá ku Amerigo no a hasi nada robes, pero tambe pa salvaguardiá nos “Trias Politika”, separashon di poder i kaba ku Hustisia ku ta jag riba MFK i su miembronan.

Pueblo di Kòrsou MFK i Amerigo ta konta ku bo(so) sosten moral pa huntu nos por para e trapamentu di nos derechinan konstitushonal i pa den 2016 huntu nos bai trese e kambionan ku lo ta na benefisio di Pueblo di Kòrsou.

 

Direktiva di Movementu Futuro Kòrsou

Pa medio di su Lider Polítiko

Gerrit Fransisco Schotte

+5999 512-1277

Kòrsou, 10 di yanüari 2016

 

#KAMBIO2016 #GFS2016 #MFK2016

new-justice not blind

 

 

Webmaster

Leave a Reply