• PLAN DI AKSHON
    MFK 2016
  • flag-curacao flag-holanda
Home MFK Movementu Futuro Kòrsou ta skohe pa un kara nobo debutá den sala...

Ku e retiro di Sra. Koeyers-Felida for di Parlamento di Kòrsou, ta trese kuné ku Movementu Futuro Kòrsou (MFK) mester asigná e puesto aki na un otro persona.

Konforme e lista elektoral ku MFK a partisipá kuné na elekshon di 2012, e próksimo kandidato pa okupá e funshon aki ta Sra. drs. Dorothy Pietersz-Janga na puesto number 6, aktualmente Dorothy ta funshoná komo presidente di MFK. Debí na su relashon serkano ku su pashèntnan di Banda Abou komo dòkter di kas e no ta haña ku ta prudente pa e drenta Staten na e momentonan aki.

Despues di Dorothy, na puesto number 7 ta sigui Sr. Rudney Garmes eks diputado di turismo i ekonomia i eks miembro di Parlamento. Aktualmente Rudney ta funshonando komo asesor di frakshon di MFK den parlamento i Rudney a opta pa kontinuá den e funshon ku e ta okupando aktualmente pa sigui duna su aporte asina na e frakshon di MFK.

Puesto number 8 riba e lista elektoral a ser okupá pa drs. Zulaika Mook, kende aktualmente ta okupando e puesto di Sektor Direktor na ministerio di Ekonomia, drs. Mook ta un eks-miembro di MFK i su persona a informá MFK ku debí na su funshon ku e ta okupá den gobièrnu e no ta interesá pa drenta Parlamento.

Konsekuentemente Lider Polítiko i Direktiva di MFK a hasi un apelashon riba Sr. Sithree Adalbert van Heydoorn pa okupá e puesto vakante pa MFK den Staten.

Sr. van Heydoorn ta empleá pa e último 28 añanan na Aqualectra. Sithree tin mas ku 15 aña aktivo den sindikato na Aqualectra. Pa un periodo di un aña Sithree a okupá e puesto di direktor interino di FWNK i durante tres aña i mei komo komisario enkargá ku e maneho di Buskabaai N.V., tambe e tabata durante 4 aña komisario na Core N.V.

Sithree ta un miembro di MFK, for di inisio di organisashon polítiko, aktualmente e ta okupando e posishon di sekretario general di e direktiva di MFK.

Konosiendo e tipo di persona ku Sithree ta i e kalidat i kantidat di trabou ku su persona a bin ta ehersé den nos organisashon polítiko, nos no tin duda ku MFK, no solamente a skohe un kara nobo pa debutá den Parlamento, pero tambe un persona ku lo sabi di representá i sali na interes di Pueblo di Kòrsou.

Direktiva, Lider Polítiko, Miembresia i Frakshon di MFK den Staten ta yama Sithree bon bini i nos ta deseá bo forsa i sabiduria pa yuda konstruí un Mihó Kòrsou.

 

Direktiva di Movementu Futuro Kòrsou

Pa medio di su Lider Polítiko

Gerrit Fransisco Schotte

Kòrsou, 11 di novèmber 2015

Logo MFK NEW 01Sithree van Heydoorn MFK

Webmaster

Leave a Reply