• PLAN DI AKSHON
    MFK 2016
  • flag-curacao flag-holanda
Home MFK Movementu Futuro Kòrsou (MFK), djasabra 29 di ougùstùs último a tene su...

Tur miembro a haña un invitashon pa partisipá na e Asamblea General, nos mester remarká ku mas ku dos tersera parti di miembresia tabata presente i asina konforme statuto e Asamblea General ku presensia di e kantidat di miembro aki a tumá lugá.

E atardi a wòrdu habri pa presidente di MFK señor Amerigó Thodé, ku kanto di himno nashonal di Kòrsou.

Sr. Amerigó Thodé den su diskurso a informá miembronan presente riba diferente tópiko di interes pa MFK. Sr. Thodé a proponé na sala pa lanta un “stuurgroep” pa kampaña elektoral i tambe un komishon ku lo bai revisa statuto i reglamento di kas di MFK. E proposishonnan aki a wòrdu aprobá pa aklamashon dor di presentenan.

Sr. Orlando Elizabeth den su funshon di sekretario a informá miembronan di e diferente aktividat nan i komishon nan ku ta hasiendo diferente trabou pa krea strukturanan pa prosesonan interno den MFK.

Sr. Sithree van Heydoorn tesorero di MFK a presentá na sala e relato finansiero di aña 2014 i tambe e tesorero a informá sala kon ta finansiá e operashon di MFK i tambe riba e aspekto finansiero di e diferente fundraising nan ku ta tuma lugá.

Komishon di kaha a presentá relato di e trabou ku nan a ehersé pa ku kontròl di e sifranan di aña 2014. Konseho di komishon di kaha na sala, tabata pa duna aprobashon na e relato finansiero di aña 2014. Sala pa aklamashon a aprobá e relato finansiero i asina tesorero i bestür a haña discharge pa aña 2014.

E kulminashon di e reunion tabata presentashon di e lider polítiko di MFK, ku na un manera kla a splika presentenan e trayekto polítiko ku MFK ta kana. Sr. Schotte a duna un presentashon amplio di e posishon polítiko di MFK i a mustra riba e parti nan fuerte di e movementu polítiko pero tambe a diskutí amplio riba aspektonan ku meresé atenshon pa mehorashon. Sr. Schotte a elaborá riba e programa di akshon di MFK, “Un Kòrsou Sano, Salu i Sigur” i a proponé pa organisá dianan di estudio pa aktualisá e programa di akshon aki.

Despues di e presentashon di Sr. Schotte a sigui elekshon pa un direktiva nobo. Promé ku a pasa pa e votashon, sr. Schotte a entrega sr. Amerigó Thodé un plakat di rekonosimentu i a gradisí sr. Thodé pa e sinku aña nan ku su persona a fungi komo presidente di MFK.

Den e elekshon a skohe un direktiva nobo kual lo bai wòrdu presidí pa drs. Dorothy Pietersz-Janga, den e promé reunion di direktiva di djaluna próksimo konforme statuto lo repartí e sobra puestonan di direktiva.

E Asamblea General a terminá ku un resolushon final ku sala a aprobá, kaminda ta duna bestür di MFK diferente tarea ku mester wòrdu ehekutá pa fortifiká e posishon di MFK.

Bestür di MFK ta sumamente orguyoso di e forma ku miembresia a partisipá den e Asamblea General aki, kaminda di un forma serio miembronan a trese puntonan dilanti ku lo yuda den kresementu di MFK.

Di Parti di bestür di MFK nos kier a gradesí tur miembro tantu esnan ku tabata presente komo esnan ku pa motibunan konosí serka bestür no por tabata tei presente pa un eksitoso Asamblea General kaminda a vibra positivismo i un ambiente di un famia uni.

Despues di e asamblea famianan di miembronan a presentá na sede di MFK pa por a sigui un charla di dokter Isbely Cooper i tambe ing. Charles Cooper ku a trata e tema di “Metabolismo, Salu i Bienestar”. E presentenan a sali satisfecho ku e informashon nan balioso ku nan a risibí for di e charla aki.

MFK lo sigui traha pa un Kòrsou Sano, Salu i Sigur, pasombra nos tur ta konsiente ku un “Mihó Kòrsou ta Posibel”.

Na nòmber di direktiva di MFK

drs. Dorothy Pietersz-Janga

Presidente

(+599-9) 511-9027

Kòrsou, 30 di ougùstùs 2015

Webmaster

Leave a Reply