• PLAN DI AKSHON
    MFK 2016
  • flag-curacao flag-holanda
Home Amerigó Thodé Alex Rosaria ku su partido PAIS ke sende lus na kaya, miéntras...

Insólito wak den un matutino ku lider di partido PAIS sr. Alex Rosario ta emití un komunikado papiando di situashon ekonómiko di Gresia. Esaki ta insólito teniendo na konsiderashon ku na 2014 Kòrsou a konosé un kaida di ekonomia di -1.1% i -0.5% den e promé kuartal di 2015, ku otro palabra Kòrsou su ekonomia ta totalmente paralisá.

Partido PAIS ku ta enkargá ku kartera di ekonomia na Kòrsou pa e último 31 lunanan den representashon di minister Steven Martina i awe minister Stanley Palm ta prekupá ku Gresia miéntras na Kòrsou su partido i gobièrnu su maneho ekonómiko ta un desaster pa Kòrsou.

Awó ku Banko Sentral tambe a kaba di publiká su sifranan, esaki a bira aún mas un konfirmashon ku e gobièrnu di Gabinete Asjes forma pa profeshonalnan manera nan a bisa ku nan ta un biaha mas ta demonstrá ku nan ta sin vishon, sin direkshon i ku pronóstikonan kompletamente deskabeyá anunsiá na komienso di 2013 i awe resultadonan ta mustra ketu bai ku enbes ku mester tabatin un kresementu esaki ta kompletamente kontrali di tur nan mes un pronóstiko ku nan mes a indiká.

Pa kolmo awor enbes ku Lider di partido PAIS wak e desaster ku e i su Ministernan a krea den nos pais, e ta bezig ta bai tira un bista riba otro kontinente ku lo no tin ningun efekto riba nos ekonomia òf turismo. Miéntras ku serka di kas si tin situashonnan ku ta afektá nos ekonomia, manera esun di Venezuela. Situashon na Venezuela na e momentunan aki ta di tal forma ku esaki ta afektá nos turismo, futuro di nos refineria, ku negosiashonnan na e momentunan aki ta kompletamente paralisá ku outoridatnan di Venezuela. Esaki ta trese ku’ne ku konsekuentemente esaki tambe lo tin un impakto grave den futuro, den nos ekonomia. E aktitut deskabeyá di e Gobièrnu di Gabinete Asjes sin vishon aki ta buta ku nos lo bai paga un preis ekonómiko hopi karu den futuro si e maneho aki no kambia di un manera drástiko.

Pero aparentemente lider di partido PAIS no ta mira esei, e no ke atendé ku Venezuela i ta purba hunga interesante dor di papia riba ekonomia di Gresia enbes di indiká pueblo di Kòrsou ki dia e i su gobièrnu i su minister di Ekonomia, huntu ku esun ku a bai kaba i e nobo ku nan tin pensa di buta, ta mustra nan profesionalismo i krea kuponan di trabou na esnan ku ta desempleá i tambe na esnan ku a pèrdè trabou pa motibu di e medidanan ku e gobièrnu aki forma pa partido PAIS, PS, PNP i tambe esun ku a hòrta asiento bai kuné a implementá na 2013, indikando ku tumando medidanan aki esaki lo laga e ekonomia krese .

Awor, e minister di partido PAIS ta riba un “world tour travel” sin logra nèt nèt nada, e úniko logro ku e i su partido tin riba nan nòmber ta kaida di nos ekonomia manera nunka Kòrsou no a konosé promé, lokual ku Frakshon di MFK i su lider Polítiko sr. Gerrit Schotte a bisa basta ratu kaba. Ta straño ku nan no a bisa ku ta pa falta di Schotte ekonomia a bai atras, paso ta esei so falta. No ta Frakshon di MFK ta bisa, ta sifranan ofishal ta demostrando kaida di ekonomia, miéntras resultado den kaya ta indikando ku no ta awor aki sino ya pa hopi tempu kaba pueblo i komersiantenan ta sintiendo esaki.

Ironia di bida ta kon den presupuesto di pais Kòrsou na aña 2013 i 2014 e gobièrnu di Gabinete Asjes a gaña komunidat ku ekonomia lo krese ku 1.5% i 2.1%, pero e loke nos ta eksperenshando ta kaida i mas kaida i nada otro.

Pueblo ta sufriendo bou di e maneho ekonómiko robes ku a wòrdu planeá den salanan di Renaissance 3 di òktober 2012 i awe ke hasi manera no ta esnan gobernando tin e pais kaminda e ta.

Gobièrnu a informá e komunidat ku e anan aki esta 2015 lo bira aña di rekuperashon i ku pueblo lo bai sinti esaki direktamente den su saku i hasta e gobièrnu a pidi e pueblo trahadó pa warda su slipnan di moda ku nan mes por a hasi komparashon pa wak kon dilanti nan a bai.

Loke ku nos ta mira ta ku preisnan astronomikamente haltu tur kaminda riba produktonan di nesesidat, i tambe produktonan den e makutu básiko ku gobièrnu a propaganda ku tantu fervor ku no lo tin impuesto riba nan, negoshinan serando tur kaminda kreando mas desempleo, penshonadonan sklamando ku otro palabra forsa di kompra ta sigui kai, Invershonnan stanka (tur hende wardando mihó tempu pa invertí), tur esaki nan i mas a konsekuensha di e maneho ekonómiko malu i desastroso di Gabinete Asjes i partido PAIS.

Ta esaki ta e danki ku pueblo di Kòrsou a haña di un gobièrnu ku a propaganda ku ta profeshonal nan ta ku tin tur sorto di titulo dilanti meimei i patras di nan nòmber pero e realidat di e trabounan ku nan mester hasi tas sero.

TA FASIL MUSTRA RIBA OTRO MIENTRAS ORA TA BO TURNU BO HASIE PIÓ

 

Amerigó Thodé

Miembro di Parlamento di Kòrsou

Frakshon di MFK

IMG_0341

 

Webmaster

Leave a Reply