• PLAN DI AKSHON
    MFK 2016
  • flag-curacao flag-holanda
Home Monique Felida Karnaval di Kòrsou 2015 no esun di mas mihó

Gobièrnu komo supsidiario mayó no mester hunga “struisvogel politiek”

No ta un sekreto públiko ku espektativa pa ku selebrashon Karnaval di Kòrsou 2015 tabata haltu mirando ku e aña aki tabata e di 45 edishon di nos karnaval.

Pero al final nos tin ku bisa ku tantu e partisipante/artista i e pueblo engeneral no a selebrá karnaval manera a spera ku lo a selebrá e di 9 lustro di e fiesta kultural di mas grandi di nos pais.

Laga nos kuminsá na nos festival di tumba ku e aña aki tabatin un kantidat hopi abou di artistanan partisipante. Asta ta biba e pensamentu ku si e tendensia aki sigui, esta ku e kantidat di partisipante sigui baha, lo mester hasi e anochinan di tumba ménos.

Hasiendo un investigashon chikitu por yega na e konklushon ku e gastunan pa ku partisipashon na e festival di tumba aki ta hopi haltu i esaki ta un di e faktor nan ku ta pisa hopi i ku ta stroba e desaroyo di e festival aki. Tantu AMAK (Asosashon di Músiko i Artista di Kòrsou) i Gobièrnu tin ku hasi un investigashon kon por yuda tantu e artista/kantante komo e agrupashon nan musikal pa tene e gastu nan mas abou si enbèrdat e dos organisashon nan aki ta di akuerdo ku festival di tumba ta un di e festival nan kultural den nos region Karibe mas grandi i di un nivel haltísimo i pa di 45 biaha kontinuo. Mirando e balor kultural di Festival di tumba Gobièrnu no por sinta man krusá i laga e festival aki dal pasonan atras. Gobièrnu mester salbaguardiá tur loke ta di balor kultural pa nos pueblo i festival di tumba ta un di nan sigur.

Pa loke ta aktividatnan karnavalesko ku tin promé ku e marchanan di karnaval nos tin ku bisa ku ta un man yen so di aktividat por papia di ganashi despues di nan aktividat.Esaki nan den mayoria kaso ta aktividatnan ku ya ta un tradishon. Asta tabatin aktividatnan ku a keda kanselá i tambe algun ku a terminá ku un saldo negativo ku konsekuensia ku si e aktividat tabata pa haña fondo pa un grupo di karnaval, e grupo a hañ’é den mas problema finansiero. Asta e organisashon ku a haña e enkargo pa organisá selebrashon di karnaval a kanselá algun aktividat. I si hasi un konteo tabatin muchu ménos aktividat (sea jump up òf jump in) e aña aki. Aki tambe mester bin un evaluashon pasó pa hopi aña kaba nos tabata papia di merkadeá karnaval di Kòrsou no komo selebrashon di e marchanan di karnaval so pero simannan di aktividatnan karnavalesko ku ta kulminá ku nos marchanan di karnaval. Pa loke ta nos marchanan di karnaval nos mester kuminsá na felisitá e organisashon ku tabata enkargá ku selebrashon di karnaval 2015 pa kumpli ku e tarea di Gobièrnu pa bini ku insentivo pa skolnan i òf lidernan di kualke organisashon pa lanta un grupo di karnaval di mucha i hoben.Tabata bisto ku esaki a engrandesé karnaval di mucha ku mas grupo pero den mesun rosea nos tin ku bisa ku mester evaluá e proyekto aki. Ta un bèrdat ku tabatin gruponan eksistente ku a haña ménos mucha den nan grupo di kual nan mayornan a skohe pa hinka nan den un grupo ku e kontribushon ta mas abou dor di e supsidio ku e gruponan aki a haña di e organisashon organisadó di karnaval.

Tambe ta bon pa remarká ku mester evaluá e produkto final ku e gruponan aki ta trese dilanti. Algun di nan mester di yudansa pa loke ta nan kreashon pasó si nos kier ta kritiko tin algun di nan a lusi ménos bunita ku otronan. Mester evaluá ku sea e lider mester di guia pa trese un kreatividat mas bunita i akabá (no luho) dilanti òf si e lider aki no ta apto pa ta pará na kabes di un grupo di karnaval.

Pa loke ta nos marcha di karnaval di adulto nos mester felisitá e gruponan ku a partisipá den karnaval 2015 ku apesar ku ekonomia di Kòrsou no ta pasando den su mihó momentu a sa di trese hopi kreatividat bunita dilanti. Esaki apesar ku e kantidat di grupo a baha i konsekuentemente e kantidat di partisipante tambe a baha. Ta di apresiá ku tòg pueblo por a disfrutá di un marcha bunita. Ta p’esei ta inaseptabel ku premiashon tabata asina pober na loke tabata e diferente kategorianan. Mester mira premiashon komo un estímulo na e gruponan. Si kada bes ta bisa ku karnaval ta karesé di karosa, bar i roadpiece ta inkomprendibel ku e aña aki no tabatin premio pa esakinan. I ta dia di premiashon por a tuma nota ku a baha e kantidat di kategoria loke a trese un disgustu i desepshon grandi serka e gruponan ku a spera riba sikiera un nominashon komo apresio pa nan trabounan desplegá pa ku marcha di karnaval.

I nos ke bai juist den diskushon di supsidio ku Gobièrnu ta duna i si esaki ta yega si òf no pasó den pasado nos a bisa ku si komo organisashon organisadó bo sa delantá ku loke gobièrnu ta duna komo supsidio no ta alkansá pa organisá e fiesta di karnaval den su totalidat sea bo ta negoshá esaki ku Gobièrnu òf bo no ta tuma e enkargo. Di otro banda Gobièrnu no mester hunga “struisvogel politiek” paso pa hopi aña kaba ta bon konosí ku e supsidio no ta yega i ku semper esnan responsabel pa organisá karnaval ta terminá ku debe. No papia mes di doño nan di gruponan di karnaval.

Ta ora pa bin un evaluashon ku tur stakeholders pa nos ban wak kon ta sigui. I nos no ta spera ku ta den te den luna di novèmber 2015 ta kuminsá papia di karnaval i ta e ora ei ta sa ken òf kua organisashon lo haña enkargo pa organisá karnaval 2016.

I si enbèrdat Gobièrnu ta mira fiesta di Karnaval komo un balor agregá na nos fiestanan kultural, un atrakshon turístiko i mas ku tur kos un apoyo na nos ekonomia ta awor mester bin un evaluashon di kon kosnan a kana pa ku aña 2015 i kon ta sigui den 2016. I introdusí un aftrekpost pa kompanianan por deskonta nan aporte na aktividatnan kultural for di nan aangifte di belasting fin di aña i asina brinda espacio pa e apoyo finansiero di parti komèrsio na seú i karnaval tin sentido i engrandesé tur nos fiestanan kultural.

Pasó karnaval 2015, e di 45 edishon no tabata loke nos a spera ora bo ta selebrá 9 lustro di bo karnaval.

Monique Koeyers-Felida

Miembro di Parlamento (MFK)

 

IMG_0508

 

 

Webmaster

Leave a Reply