• PLAN DI AKSHON
    MFK 2016
  • flag-curacao flag-holanda
Home Amerigó Thodé Ta gobièrno Asjes mes a kita Gumbs for di trabou na Novèmber...

TA PARTIDONAN PAIS, PS, PNP I ESUN KU A HORTA ASIENTO DI PAR A KITA GUMBS FOR DI TRABOU NA NOVEMBER 2013

For di dia ku hues a dikta sentensia den e kaso di e ex-hefe di Veiligheidsdienst Curaçao (VDC, ántes VNA) kontra di gobièrnu di Kòrsou riba 2 di febrüari último, polítikonan manera Alex Rosaria di partido Pais, Zita Jesus-Leito di PAR i Omayra Leeflang (ex-PAR) no a pèrdè pa gana i a sali turtur afo pa saka delaster gota di juice polítiko ku nan por saka for di e asuntu aki. Kada un ku nan mes intenshon- i metanan, pero tur kantando e mesun koro di semper: A ta bon, pero Schotte ta malu, B ta bon pero Schotte ta malu, pampuna ta bon, pero Schotte ta malu, mansaliña ta bon, pero Schotte ta malu. Pasa den nan kamber di drumi anochi i lo bo tende nan murmurá den nan soño mesun koro: spiritu ta bon pero Schotte ta malu.

Nos mester chèrchè di e tipo di polítikonan barata aki, pero nos no kier hasi chèrchè si di nos seguridat nashonal ku ta algu hopi serio ni tampoko di e kaso di Gumbs den korte. I sí, ta berdat ku Gumbs a “gana”su kaso den korte, pero bo tin ku analisá e sentensia bon i but’é den e konteksto korekto, i e ora ei e “viktoria” di Gumbs ta resultá di ta kompletamente otro kos kargá dor di responsabelnan manera entre otro Rosaria, ku kier a purba laga pueblo kere ku ta asina. Alex Rosaria no kier biba na Nort-Korea, pero tòg e ta apliká métodonan di e pais ei aki na Kòrsou: e ta kòrta ku sker sierto personanan for di un portrèt di un grupo di hende pa hasi komo si fuera e personanan ei no tabata tei dia a saka e portrèt.

Laga nos buta sierto echonan riba un rij i lo bo mes por konkluí ku e portrèt ta resultá di ta kompletamente otro di e manera ku Rosaria, Omayra i Zita ta pretendé:

Gabinete-Schotte a sinta for di 10-10-10 i a wordu bahá riba 29 di September 2012. E desakuerdo entre e Gabinete i e ex-hefe di VDC/VNA, sr. Edsel Gumbs, a bin redundá den e periodo aki den diferente kaso i sentensia den korte. Por último Gabinete-Schotte a manda riba 14 di ougùstùs 2012¸un karta pa sr. Gumbs den kual ta inform’é di e intenshon di Gabinete pa dun’é retiro. Ta bon pa apuntá ku sigun lei di VDC ta e minister-president i e minister di hustisia ta konhuntamente responsabel pa duna retiro na un hefe di nos veiligheidsdienst (VDC), den e kaso aki sr. Schotte (min-pres) i sr Wilsoe (min. di hustisia). Ta bon pa apuntá tambe ku e desishon di e 2 ministernan tabatin aprobashon kompleto di Raad van Ministers i sosten di e lidernan polítiko di tur e 3 partidonan di koalishon di e tempu ei, inkluso di Pueblo Soberano. I dimas bisa tambe di “Raad van Toezicht di Veiligheids Dienst Curaçao (VDC) ku a saka un konseho riba 12 di Yanüari 2011 bisando:

“Het advies luidt dan ook om, het vorenstaande vooropgesteld, eerst confraterneel te informeren naar mogelijkheden om de heer Gumbs op minnelijke wijze uit de functie van Hoofd VDC te ontheffen en pas indien dat niet mogelijk blijkt een maatregel te nemen”

Pa buta lokual a pasa despues den e kaso di Gumbs den e konteksto korekto ta bon pa rekordá algun akontesimentu kronológiko despues i indiká kua personanan ku tabata karga responsabilidat pa desishonnan tumá i pa maneho. Despues di elekshon di 19 di Oktober 2012 a forma gabinetenan ku tur tabatin sosten di mesun partidonan ku awe ainda ta forma koalishon: partido PS, PAIS, PNP i e traidor di PAR:

Gabinete – Betrian for di 29 di sèptèmber 2012 te ku 31 di desèmber 2012 ku sr. Betrian komo min-pres i alabes min. di hustisia i demas ministernan: Jose Jardim,Chucho Smith i Stanley Bodok i min. Adriaens; Si Gumbs tabata dje íntegro ei dikon no a ponele bek den funshon komo hefe di VDC of dunele un golden handshake manera a duna direktornan di CPA i di Aqualectra?

Gabinete – Hodge for di 31 di desèmber 2012 te ku 7 di yüni 2013 ku sr. Hodge komo min- pres. i sr. Navarro di partido PAIS komo minister di hustisia i sobra ministernan Steven Martina, Etienne van der Horst, Ben Whiteman, Sherwin Josepha (despues reemplasa dor di Jean-Marie Francisca), Rubia Bitorina, Earl Balborda, Jose Jardim. Si Gumbs tabata dje integro ei dikon no a ponele bek den funshon komo hefe di VDC of dunele un golden handshake manera a duna direktornan di CPA i di Aqualectra?

– Gabinete – Asjes for di 7 di yüni 2013 te awe 9 di febrüari 2015 ku Asjes komo min-pres. i e mesun sr. Navarro di PAIS komo minister di Hustisia i sobra ministernan Stanley Palm, Etienne van der Horst, Ben Whiteman, Jean-Marie Francisca (awe R.D Larmonie-Cecilia), Irene Dick, Earl Balborda, Jose Jardim. Si Gumbs tabata dje integro ei dikon no a ponele bek den funshon komo hefe di VDC of dunele un golden handshake manera a duna direktornan di CPA i di Aqualectra

Awor kiko realmente a pasa ku e kaso di Gumbs durante tur e gabinetenan aki despues ku Gabinete-Schotte a baha riba 29 di September 2012, lagando a tras e karta di 14 di ougustus 2012 indikando na Gumbs e intenshon pa duné retiro?

Riba 27 di ougùstùs 2013 (despues di mas ku un aña!) Gumbs ta entregá su verweer (defensa) kontra di e intenshon pa duné retiro serka su bevoegd gezag, ku tabata den e kaso aki miéntras tantu e Ministernan Asjes (min-pres) di PS i Navarro (min di hustisia) di PAIS. E ministernan aki, no opstante e ‘verweer’di Gumbs a mantené e desishon pa duna sr Gumbs retiro, primeramente basá riba su ongeschiktheid/onbekwaamheid i a partisipá esaki na Gumbs den un karta fechá 28 di novèmber 2013. Ta kontra di e retiro aki di Asjes i Navarro, sr. Gumbs ta entregá ‘bezwaar’ serka korte na aprel 2014, kual kaso finalmente a bin terminá den e veredikto di korte di 2 di febrüari 2015.

Awor ta konosí ku despues ku Gabinete-Schotte a wordu bahá na 29 di September 2012, sr. Gumbs a keda den kombersashon/negosiashon ku e tur e gabinetenan ku a sigui, sea esunnan di Betrian, Hodge i Asjes, pa logra rekobrá/mantené su posishon na VDC, lokual ta sali na kla tambe den e veredikto.

Ta remarkabel ku ni Gabinete Betrian ni Gabinete Hodge ni Gabinet Asjes no a disidi di tuma e desihon pa buta sr. Gumbs bek na VDC , anulando su retiro. I sigun lei tur 3 Gabinete tabatin tur outoridat pa laga Gumbs bolbe bek. Betrian i Hodge por a partisipá na sr Gumbs, si nan tabata deseá esei, ku no ta e intenshon mas pa dun’é retiro, pero nan a opta pa

mantené e intenshon pa mand’é kas. Ministernan Asjes di PS i Navarro di Partido PAIS di Alex Rosaria ku a huramentá riba 7 di yüni 2013 ta risibí riba 27 di ougùstùs 2013 e ‘bezwaar’di Gumbs kontra e intenshon pa retir’é. Nan por a disidí ku e ‘bezwaar’ ta fundá i poné Gumbs bek na VDC, pero a opta pa no sigui den e direkshon aki. Al kontrario nan a disidí di duna retiro definitivo i a partisipá esaki riba 28 di novèmber 2013 na sr. Gumbs. Ta un konklushon so por ta posibel: e retiro na sr. Gumbs pa óngeschiktheid/onbewaamheid’ a keda duná né akordá pa min-pres Asjes di PS i min di hustisia Navarro di PAIS ku aprobashon di henter Konseho di Ministernan, inkluso esunnan di e partidonan PAIS, PS,, PNP i esun ku a hòrta asiento di PAR i ku aprobashon tambe di e lidernan politiko. inkluso sr. Rosaria ku ta i mester keda informá riba tur desishon di importansia ku e gabinete ku nan ta sostené ta tuma.

Awor, no komprondé nos robes, MFK ta pará 100% ainda tras di e karta di Gabinete-Schotte di ougùstùs 2012 ku e intenshon pa duna sr. Gumbs retiro. Un persona ku ta malusá su posishon komo hefe di VDC, ku mester ta imparsial i íntegro, pa aparentemente yuda un partido ku na 2010 kontrali na lo ke nan a spera no a drenta

Gobièrnu –p’esei mesun partido ta sali defendé Gumbs awe- no ta geschikt pa e posishon ei. No opstante ku den korte no por a prueba esaki totalmente, pasobra no por a usa ‘veiligheidsdossiers’, nos ta keda di mesun opinion. I esunnan manera Rosaria ku ta sali awe na defensa di Gumbs nos ta puntra: pakiko bo no a anulá e retiro di Gumbs? No ta bo minister Navarro di hustisia a co-firma e ontslagbesluit pa ongeschiktheid November 2013? No ta bo sobrá ministernan a aprobá esaki den Raad van Ministers ku bo konosementu?

Esta un hipokresía bo ta demonstrá awe.

I na Omayra ku a bula bai pidi minister van der Horst pa kambia lei nos kier bisa: puntra Minister van der Horst promé kon e a vota dia Gabinete-Asjes a bai di akuerdo pa manda un karta di retiro ‘wegens ongeschiktheid’ na Gumbs fechá 28 di november 2013. I tambe ta pakiko e a bai di akuerdo ku esaki.

Nan lo sigui grita: Gumbs ta integro i Schotte tabata robes. Puntra nan e ora ei: Si bo ta kere ku Gumbs ta íntegro, pakiko bo a manda un karta di retiro pe?

thode_parlamento_10april2014

Webmaster

Leave a Reply