• PLAN DI AKSHON
    MFK 2016
  • flag-curacao flag-holanda
Home Gerrit Schotte MFK TA KONTRA PA SIGUI SAKA OUTORIDAT OUTONOMO MANDA AFO

RECHASO UN BIAHA MAS NA FASTBALL DI GABINETE ASJES KONTRA NOS OUTONOMIA

Kòrsou, 22 di Yanüari 2015,

Manera por kòrda Gabinete-Asjes aña pasá bou di preshon di Hulanda a proponé pa kambia nos lèi di sanshon i hinka aden e obligashon pa nos Gobièrnu apliká tur sanshon ku Union Europeo aprobá. Hulanda ta miembro di Union Europeo, Kòrsou no. Bou di e lèi ku ta na vigor for di 1997 ta nos Gobièrnu ta outorisá pa disidí ku si òf ku no e lo tuma medidanan di sanshon. Opviamente ta interesnan di Kòrsou i di nos pueblo ta determiná si un medida ta kunbiní nos. Den e proposishon di Gabinete-Asjes ta na Den Haag i Bruselas lo a keda disidí dor di 27 pais europeo ku ni sa na unda Kòrsou ta keda, ku Kòrsou mester sigui nan medidanan di sanshon. Esaki ta un kitamentu konsiderabel di nos outonomia i Parlamento su mayoria a sigui MFK su tras ayera mainta i a indika ku lo rechasá e proposishon aktual atrobe presenta den Parlamento di Gabinete-Asjes.

Awor, despues di apénas un par di luna, Gabinete-Asjes ta bini di nobo ku un proposishon pa kambia e lèi di sanshon. E biaha aki nan ta bisa ku ta pa kumpli ku rekomendashonnan di Caribbean Financial Action Task Force (CFATF) i nan ta proponé pa hasi obligatorio pa Gobièrnu tuma over tur medida di sanshon internashonalmente aprobá, inkluso rekomendashonnan. Ademas ta proponé pa introdusí e posibilidat di sanshon den kaso di terorismo i tambe pa tuma sanshon no solamente kontra pais, pero tambe kontra personanan i organisashonnan privá.

MFK tin hopi problema ku e proposishon aki. Na promé lugá e lèi ta slordig hinká den otro. Di 15 fayonan ku Raad van Advies a siñalá i ku Gobiernu a bisa (gaña) ku nan a tuma tur over, en realidat 13 fayo te ainda ta den e lèi. Ademas no tin ningun motivashon duná, pakiko mester kambia di e régimen kaminda ta nos Gobièrnu mes ta disidí ta kual sanshon e ta apliká i kual no pa un régimen den kual di antemano bo ta asumí e obligashon pa apliká delaster un medida aprobá internashonalmente. No tin ningun motibu ni urgensia ni nesesidat pa un kambio asina. Awe, si Konseho di Seguridat di Nashonnan Uní (UN) disidí pa apliká sanshon ya kaba sin mas henter mundu inkluso Kòrsou ta mará na esei i asina mester ta. Pa otro medidanan di sanshon si nos tin i kier mantené nos outonomia i disidí pa nos mes, si nos ta di akuerdo si òf no. Pa kolmo e lèi hulandes ku nos a kopia, Sanctiewet 1977, tampoko no ta obligá e gobièrnu na Den Haag pa apliká sanshon, pero ta laga e desishon ei, meskos ku ta aktualmente e kaso na Kòrsou, na konsiderashon di e gobièrnu konserní, ku por tene kuenta ku interesnan di su pueblo.

Pakiko Kòrsou no por tin e mes outonomia ku Hulanda si ta reserva pa su mes? Nos no a entregá basta outonomia kaba ku tur e lèinan di konsenso ku ta pisa riba nos skouder?

Por último MFK ta kritiká e manera ku Gobiernu-Asjes a kore hinka terorismo komo motibu pa sanshon den nan proposishon. Pa no tin malentendementu: MFK ta kontra terorismo i ta di akuerdo ku mester kombatí i hasta eradiká esaki. Kisas si ta asina ku komunidat internashonal mester paga mas atenshon na kita kousanan di terorismo na lugá di tuma prinsipalmente medidanan di opreshon. Nos problema ta ku e proposishon ta bini ku e konsepto terorismo sin niun kaminda den e lèi a definí esaki. I ta ken ta disidí ta ken ta terorista, ta instansianan di aki òf eifó? I kon i na unda por apelá serka kual hues e kalifikashon aki? Pasobra no lubidá ku e kalifikashon di ta terorista tin konsekuensia grave pa e persona(nan) konserní.

Tambe nos ta pidi Gabinete-Asjes pa reflehá i konsiderá promé ku e sigui: nos héroe Tula, Nelson Mandela, Simon Bolivar, George Washington, ku tur den pasado den wowo di sierto persona o pais tabata un “terorista”, pero awe nan ta héroenan. Meskos por tin terorista den 2015 ku den futuro lo ta héroe.

IMG_0563

 

Webmaster

Leave a Reply