• PLAN DI AKSHON
    MFK 2016
  • flag-curacao flag-holanda
Home Gerrit Schotte NO MAS !

No tin mas surdu ku esun ku no kier skucha, no tin mas siegu ku esun ku no kier mira. Pueblo di Kòrsou bo por ta sigur ku no tin malu ku ta dura shen aña.

Movementu Futuro Kòrsou (MFK) su parlamentarionan i direktiva, diariamente ta wòrdu aserka pa suidadanonan den tur gremio di nos komunidat ku gritu di ousilio. E gritu di ousilio aki pa e forma ku nos dushi Kòrsou ta wòrdu goberná. Na final di e kombersashon tur hende ta konkluí ku, “Ta Basta Awor” ku e gobièrnu aki i e mester bai kas.

MFK ku doló na nos kurason mester tuma nota kon un gobièrnu ta hinka un pueblo den tantu sufrimentu. Gobernantenan ku no a wòrdu skohe den e proseso di elekshon, ku no tin ningun konosementu di sufrimentu di un pueblo ta abuzando di nos suidadanonan. Gobernantenan ku semper a biba bon i no konosé pobresa i sufrimentu, ku no a kana den barionan di Kòrsou pa mira i skucha e pueblo su doló.

Gobernashon na promé lugá ta ku gobièrnu ta pone su pueblo na promé lugá i manehá Kòrsou di tal forma ku e pais por sali dilanti pa krea un pais Sano, Salu i Sigur pa kada suidadano di Kòrsou, tambe ta tarea di gobièrnu pa krea perspektiva i futuro pa nos yu i nietunan.

E situashon aktual ku nos ta biba aden ta ku;

  • Kriminalidat ta inkontrolabel, ni den nos propio kas nos no ta sinti nos sigur mas, pasobra atrakadónan no ta respetá bo propiedat mas.
  • Komersiantenan ta lamentá ku e pueblo no ta sobra sèn pa hasi kompra i nan tin miedu di pèrdè nan invershon i añanan di trabou pa por a konstruí loke nan tin awe.
  • Nos ekonomia ta den kuido intensivo, e gobièrnu aki a demonstrá ku nan no por pone ekonomia di Kòrsou na un nivel ku e por generá komersio pa asina tin moveshon finansiero pa ekonomia por krea sufisiente kupo di trabou pa nos pueblo.
  • Sindikato di enseñansa a deklará kaba ku enseñansa a fayesé, ta tristu pa tende esaki di esnan ku ta laborá tur dia den enseñansa.
  • Demasiado engaño i traishon di parti di e gobièrnu aki ku pueblo no ta dispuesto di sigui soportá.
  • Ta apliká tur sorto di impuesto riba e pueblo aki. Un pueblo ku no tin forsa mas pa kumpra i paga ni lo básiko ku e mester pa e por biba.

 

Parlamentarionan ku ta sostené e gobièrnu aki ku mester ta orea, boka i nanishi di pueblo a bira lomba pa nos suidadanonan i no ta skucha doló di e pueblo aki. Pa nan ta importante pa keda sinta riba e stul di parlamentario i laga pueblo i komersio sufri numa.

E parlamentarionan aki ku ta keda vota na fabor di leinan kual ta kastigá e pueblo aki ku pago di belasting.

A yega e momento pa e pueblo aki uni i huntu nos deklará “No Mas” na e gobièrnu aki. “Pueblo ke Boso bai Kas”, mester bin elekshon mas pronto posibel pa pueblo di Kòrsou skohe e gobièrnu ku e kier pa goberná Kòrsou.

MFK ta elevá doló i sufrimentu di nos pueblo riba polítika i lo ta na banda di suidadanonan di Kòrsou pa lucha huntu ku pueblo pa hustisia i un mihó Kòrsou. E momentu a yega pa nos pone demokrasia funshoná i pa pueblo di Kòrsou entamá akshonnan pa manda e gobièrnu aki kas.

Ta Basta Awor bèrdat pero ku bosnan!

No mas Violensia, No mas Engaño, No mas Impuesto, No mas Traishon, Pueblo ke boso bai Kas.

 

Gerrit Fransisco Schotte

Kòrsou, 4 di desèmber 2014

 

IMG_2307

Webmaster

Leave a Reply