• PLAN DI AKSHON
    MFK 2016
  • flag-curacao flag-holanda
Home Amerigó Thodé KOMUNIKADO di PRENSA

Movementu Futuro Kòrsou (MFK), djasabra 11 di òktober último a tene su Asamblea General konforme statutonan di e movementu polítiko.

Tur miembro a haña un invitashon pa partisipá na e Asamblea General, nos mester remarká ku mas ku dos tersera parti di miembresia tabata presente na e reunion i asina konforme statuto e Asamblea General ku presensia di e kantidat di miembro aki tabata legal.

E reunion a wòrdu habri pa presidente di MFK señor Amerigó Thodé, ku kanto di himno nashonal di Kòrsou interpretá pa Qushánnick Thodé (ex-Cache lead singer).

Señor Amerigó Thodé den su diskurso a mustra miembronan presente riba e vishon i mishon di MFK ku ta data for di inisio di e organisashon na aña 2010 i ku e movementu polítiko ta sigui riba e kaminda aki pa ehersé trabounan ku lo mester krea bienestar, salu i prosperidat pa pueblo di Kòrsou (Un pais Sano,Salu i Sigur). Kontinuando señor Thodé a proponé na sala kambionan den reglamentu doméstiko di MFK. E kambionan presentá a wòrdu aprobá pa aklamashon pa sala.

Señor Sithree van Heydoorn tesorero di MFK a presentá na sala e relato finansiero di aña 2013 i tambe e tesorero a presentá e proyekshon finansiero pa aña 2015.

Komishon di kaha a presentá relato di e trabou ku nan a ehersé pa ku kontròl di e sifranan di aña 2013. E Komishon di kaha a duna un konseho positivo den su relato i Presidente di MFK señor Thodé a proponé na sala pa bai di akuerdo ku e konseho i aprobá e relato finansiero di aña 2013. Sala pa aklamashon a aprobá e relato finansiero i asina tesorero i bestür a haña décharge pa aña 2013.

E kulminashon di e reunion tabata presentashon di e lider polítiko di MFK, señor Gerrit Schotte ku na un manera kla a splika presentenan e trayekto di Reforma, kon esaki a kana te ku awor i kiko ta bai ta e siguiente pasonan ku lo mester sigui pa ku e proyekto Reforma den nos demokrasia. Señor Schotte a duna un presentashon amplio di e posishon polítiko di MFK i a mustra riba e parti nan fuerte di e movementu polítiko pero tambe a diskutí amplio riba aspektonan ku meresé atenshon pa mehorashon.

Señor Schotte a informá miembronan riba e trayekto di preparashon pa elekshon ku resientemente bestür di MFK a enkargá un komishon bou di guia di lider polítiko pa reklutá siudadanonan i miembronan ku ta interesá pa subi riba lista di MFK pa e próksimo elekshon. Un gran parti di e miembronan presente a inskribí nan mes pa wòrdu evaluá i pa sigui kurso nan di formashon polítiko pa forma parti di e lista ganador di e próksimo elekshon.

E Asamblea General a terminá ku un resolushon final ku sala a aprobá, kaminda ta duna bestür di MFK diferente tarea ku mester wòrdu ehekutá pa fortifiká e posishon di MFK. Un di e aspektonan mas importante den e resolushon aki ta un dia di estudio kaminda miembresia lo bin huntu pa aktualisá e dokumentu “Un Kòrsou Sano, Salu i Sigur” kual ta un manual ku ta deskribí kon MFK mester atendé ku kada un di e nuebe (9) ministerionan di gobièrnu di Kòrsou.

Bestür di MFK ta sumamente orguyoso di e forma ku miembresia a partisipá den e Asamblea General aki, kaminda di un forma serio miembronan a trese puntonan dilanti ku lo yuda den kresementu di MFK. Di Parti di bestür di MFK nos kier a gradesí tur miembro tantu esnan ku tabata presente komo esnan ku pa motibunan konosí serka bestür no por tabata tei presente pa un eksitoso Asamblea General.

MFK lo sigui traha pa un Kòrsou Sano, Salu i Sigur, pasombra nos tur ta konsiente ku un “Mihó Kòrsou ta Posibel”.

Na nòmber di direktiva di MFK

 

Amerigó Thodé

Presidente

Kòrsou, 12 di òktober 2014

IMG_0025

 

Webmaster

Leave a Reply