• PLAN DI AKSHON
    MFK 2016
  • flag-curacao flag-holanda
Home Jacinta Constancia SRA. CONSTANCIA TA APLOUDI LEI PA KABA KU BASHAMENTU DI SUSHI I...

Sra. Jacinta Constancia komo parlamentario pa frakshon di MFK ta di akuerdo ku mester stòp di tolerá sushedat. E momento a yega i ku mester aktua hopi mas severo ku e sushamentu di Kòrsou.

Hinter aña tin kampana di konsientisashon ku ta kosta gobièrnu, Selikor i grupo (nan) di boluntario nan rònt Kòrsou hopi tèmpo i plaka. Práktikamente tur siman, tur wikènt grupo(nan) ta bai limpia den diferente bario i/òf área na unda hendenan sin eskrupulo ta basha nan porkeria i miéntras ku no atendé e situashon na serio Kòrsou lo keda sushi i  nos supsuela, nos playanan i e naturalesa ta wòrdu afektá. E lei ku ta den proseso pa kastigá bashamentu di sushi na sitionan ilegal na Kòrsou i un alternativa pa deshasí di awa sushi humano ta nesesario.

E proseso pa deshasí di awa sushi humano di barku (nan) den nos laman pero tambe e awa di fekalia ku ta ser depositá na Shut ta hasi daño na nos pais. E daño ta asina grandi ku e barku ku ta bin ku 3000 turista deshasí di e sushi humano den nos awa nan, ounke e turista kumpra 2 òf 3 suvenir i/òf produkto den nos pakus(nan) e ta keda ireparabel, nos no por wak so mas e kresementu ekonómiko pa turista basha bin i kaba basha bai laga sushi atras, nos mester tin forma nan adekuá i moderno pa garantisá un mihó medio ambiente pa nos pais.

Sra. Constancia a trese dilanti tambe ku e  planta di Waterzuivering ku nos tin i ku ta bou di maneho di DOW tin problema pa tuma e awa aki ya ku tin kímiko aden i ta krea tera den bòm ku no ta adekuá pa e instalashonnan karu di e  planta di Waterzuivering pasobra e awa aki por daña hinter e sistema di instalashon.

Komo parlamentario, Jacinta Constancia ta aploudí e inisiativa di Minister Whiteman pa bin ku solushon  pasobra a yega tèmpo pa kada empresa i persona(nan) asumí nan responsabilidat pa kumpli ku regla nan  di e pais aki.

Alabes ta di suma importansha pa Minister Whiteman traha mesora riba un alternativa kaminda den futuro di un forma responsabel i legal empresa i/òf persona(nan) por depositá e awa sushi legalmente, ya ku den kuadro di resiklá no tin ningun solushon na bista ainda na Kòrsou.

Ta imperativo pa Selikor bin ku algun inisiativa mas  pa atra’é  e poblashon pa bai Malpais ku regularidat i un solushon pa e mas di 1000 lugá(nan) ku ta tira sushi ilegal. Alabes ta na su lugá pa tantu Selikor i Gobièrnu kuminsá buska mas alternativa ku no ta solamente dera i/òf tapa e sushi so den Malpais.

Ta responsabilidat di gobièrnu pa buska un solushon adekuá  i alternativa real i ideal pa indiká unda den futuro e barku(nan) ku tin ku deshasí di nan sushi.

Un súplika tambe na  tur empresa ku ta paga shofùr(nan) di trùk  pa pidi komprobante den futuro pa sa si realmente nan ta depositá sushi na  Malpais i asina yuda kontribuí i garantisá ku boso sushi ta wòrdu depositá na e kaminda korekto.

Sra. Constancia parlamentario pa frakshon di MFK ta duna di konosé di lo hasi tur lokual ta nesesario pa yuda den e proseso pa haña un lei ku por sirbi Pais Kòrsou.

“Mi tin sigur ku e tim di Selikor, X  team,  huntu ku Minister Whiteman i e komishon di Salu i Medio Ambiente di parlamento di Kòrsou lo hasi nan máksimo pa minimalisá e problema aki i sòru pa un solushon kaminda e poblashon den su totalidat por biba kuné esta:

“ Un lei pa kastigá bashamentu di sushi ilegal”;

“ Un proseso hustu pa kunukero(nan) ku ta bira víktima di ladronisia i di bestia(nan);

“ Un paro na sushi humano ku ta wòrdu deshasí den nos awa nan (haf i Shut)”;

“ Proposishon pa un solushon i alternativa real i ideal pa depositá awa sushi humano/kloaka den futuro;

“ Un Pais aun mas konsiente i eduká pa depositá tur sushi solamente na Malpais” i kuminsá pensa riba resiklahe i otro alternativa nan pa futuro.

“Proposishon pa  drecha e infrastruktura i siguridat na shoot di tal forma pa persona(nan) ku mester laborá risibí e garantia ku ta un área safe den futuro.

Di e forma aki garantisá un Pais limpi i bunita pa nos mes i bishitante/turista(nan), sra. Constancia parlamentario pa frakshon di MFK ta finalisá bisando.

Atentamente,

Jacinta Scoop-Constancia

Miembro di Parlamento (MFK)

 

IMG_9758

 

Webmaster

Leave a Reply