• PLAN DI AKSHON
    MFK 2016
  • flag-curacao flag-holanda
Home Dokumentonan Rosaria di Partido PAIS a keda demaskará komo mentiroso i awor e...

Willemstad, 19 di sèptèmber 2014

Kasi un siman pasá henter pueblo di Kòrsou por a tende ku nan mes orea ku Alex Rosaria, lider di partido PAIS, no ta nada mas ku un mentiroso i un hasidó di polítika barata. Esei a sosodé ora sr. Age Bakker di e Kolegio di Supervishon Finansiero (CFT) riba pregunta di sr. Rosaria na su persona, ku si durante di Gabinete-Schotte tabatin wanbeleid (mal maneho) a kontestá sin lugá pa duda ku é, sea Age Bakker, nunka no a bisa ku tabatin wanbeleid den e tempu ei.
Ta opvio ku esaki no tabata e kontesta ku sr. Rosaria tabata ferwagt i spera. Sr. Rosaria a ferwagt i spera ku Sr. Bakker di Cft lo a konfirmá i respaldá lokual e tin 4 aña kaba ta kana grita manera disko ku a pega. Y esei ta ku Gabinete-Schotte a praktiká loke e ta yama Voodoo-Finance i wanbeleid i ku no solamente ta e tin e opinion ei, pero tambe Cft ta bisa meskos. Y awor e deklarashon klarito di Cft a buta Alex Rosaria di Pais den spotlight komo nada mas ku un mentiroso ku 4 aña a gaña ku su opinion tin respaldo di Cft. Awor pa henter Kòrsou a sali na kla ku ta polítika barata Alex Rosaria a hiba pa desakreditá partido MFK i pa kita atenshon di pueblo di su mes inkapasidat pa atendé, ni papia mes di resolvé, problemanan di nos pais manera desempleo, ekonomia stanká i kriminalidat. Despues di e reunion Alex Rosaria a purba na promé instansia di anulá e reunion, alegando ku sr. Thodé no ta miembro di e Komishon i konsekuentemente no tabatin quorum pa reuní. Esaki opviamente den un intento pa evitá ku ta sali un relato ku e deklarashonnan di sr. Bakker ku no ta favorabel p’e aden. E intento aki a frakasá ora frakshon por a prueba ku sr. Thodé sin niun duda ta un miembro legítimo di e Komishon.

E mentira i engaño di Rosaria a sali den publisidat, ora un emisora lokal a pasa un grabashon di lokual Rosaria a puntra sr. Bakker di Cft, ku ta si tabatin wanbeleid bou di Gabinete-Schotte i sr. Bakker su kontesta den kua e ta rechasá esaki“Geen sprake van Wanbeleid”. Na lugá di sali afó i pidi diskulpa humildemente na pueblo pa su mentiranan i politikeria barata durante 4 aña, sr. Rosaria huntu ku otro miembronan di su partido PAIS manera e presidente di Parlamento sr. Mike Franco, a kuminsá un kampaña feros pa haña sa ta kon e grabashon a bin resultá na e emisora en kestion. Un kaso klásiko di e ladron, ku no ta pidi diskulpa pa su ladronisia, pero ta buska pa ataká esun ku a denunsié komo ladron. Den su furia pasobra a demaskará, Rosaria a eksihí un investigashon inmediato di su amigu di partido PAIS i presidente di Parlamento sr. Mike Franco ku a obedesé i kumpli dirèkt. Na banda nos kier menshoná ku ora algu mas ku un aña pasá nos a pidi sr. Franco pa hasi un investigashon, pasobra tabatin tur indikashon ku sr. Rosaria, amigu di esnan di SMOC ku kier sera Refineria, a duna SMOC dokumentunan konfidensial i sensitivo di refineria trahá dor di Ecorys. Na e okashon ei sr. Franco a ninga redondamente pa hasi esaki, bisando ku e no por hasi denunsia basá riba petishon di un miembro di Parlamento so. Ta remarkabel ku awor ku esun miembro ta su lider polítiko, kon si e ta ansha pa bai hasi denunsiá dirèkt. Polítika partidista ta rosea di partido PAIS aparentemente.

Na mes momentu ku nan a hasi denunsia na Ministerio Públiko partido PAIS a kuminsá un kampaña masivo, insinuando sin ningun prueba ku ta MFK ta tras di lokual e emisora ya menshoná a divulgá. Y ayera nan a disidí di intensifiká nan kampaña kontra MFK dor di lèk un foto pa medionan di mi persona alehando ku mi lo tin un grabado dilanti mi i ku e insinuashon ku lo ta ami lo a graba den e reunion en kestion.

MFK kier enfatisá ku sigun artíkulo 2:71 di nos Kódigo Penal, un partisipante na un kombersashon ku graba esaki, no ta kastigabel. Kastigabel ta terser partidonan ku graba sin enkargo di un di e partisipantenan. Di otro banda si bo saka potrèt den sekresía (‘heimelijk’) di partisipantenan na un reunion ‘besloten’ i publiká e potrètnan, esei si ta kastigabel sigun artíkulonan 2: 76 i 2:77 di Kódigo Penal. Sr. Franco a deklará ku e no sa ta ken a saka e potrèt di sr. Thodé ni e otro potrètnan ku el a bisa di a entregá na Ministerio Públiko. Si esaki ta bèrdat no por tin otro konklushon ku un òf mas persona a saka potrèt den sekresía (‘heimelijk’), kometiendo un delito penal. Nos ta eksihí ku sr. Franco hasi denunsia di esaki na Ministerio Públiko.

Nos ke para ketu tambe serka e ‘geheimhouding’ ku mester mantené sigun artíkulo 59 di Reglamentu di Órden relashoná ku ‘inhoud di vertrouwelijke stukken i gedachtenwisseling’. E dia despues di e reunion ku Cft a sali komunikadonan di e mesun partido PAIS, di sr. Koeiman di MAN i di MFK, siguí pa un kantidat di artíkulonan den prensa al respeto. Poko dia despues a sali komunikado di Cft mes, e.o. relashoná ku nan meeting ku e Komishon di finansa. Es mas, na mart 2014 a sali publikashon di reakshon di presidente di Cft, den kual nan ta bisa básikamente meskos ku nan a deklará despues den e reunion di 4 di Sèptèmber 2014. Ku otro palabra: hoezo geheimhouding? Bai den filenan di añanan bek i lo bo nota ku tur partido, PAIS na promé lugá, a sali hasi deklarashon despues di reunionnan di komishon no opstante geheimhouding.

I MFK ta di akuerdo. Kon bo por hasi bo trabou komo parlamentario, kon bo por ehersé bo budgetrecht si bo no por papia tokante loke e supervisor prinsipal Cft a bisa? Si nan a bisa p.e. ku mester subi ob den 2015 di 9% pa 20%, nos por i mester a keda silensioso? Hasta Cft mes ta akseptá esaki kaminda nan ta bisa ku resultadonan di overleg ku nan, sí parlamentarionan por usa den nan trabou di kòntròl. Wèl, resultado di e overleg resien tabata ku Bakker a bisa ku no tabatin wanbeleid bou di Gabinete-Schotte i pueblo, nos votadónan tin derechi di tende esei.
Tambe nos kier para ketu serka e hecho ku durante e reunion di e komishon, sr. Alison Manuel, kolaborador di e frakshon di sr. Rosaria tabata presente kontra tur regla di Reglamento di Órden pero ku pèrmit aparentemente di e presidente di e komishon, Alex Rosaria. Reglamento ta bisa klaramente ku ta miembronan di Staten só i niun hende mas no tin mag di tei. Mas leu ainda sr. Alison Manuel aparentemente a kana saka potrèt i/o graba imágen i sonido einan di tur hende sin ku tin mag i sin pidi pèrmit di niun di esnan presente den e reunion privá ei. No ta straño ku riba esaki no ta tende nada partido PAIS i ku no tin ningun denunsia serka Ministerio Públiko di parti ni sr. Rosaria ni di sr. Franco?

Awor referiendo na e potrèt ku a lèk di sr. Thodé. Di un manera kobarde nan a lèk esaki ku e intenshon pa insinuá ku ta sr. Thodé lo a graba algu. Nos ta bisa kobardemente, pasobra ta un táktika di tira piedra i skonde man. Nan no ta bisa ku tantu palabra ku ta su persona a graba, pero ta insinuá esaki si.

Di nos parti nos ta enfatisá ku lei ta permití un partisipante na un kombersashon pa graba esaki i ku nos ta warda trankil e investigashon di Ministerio Públiko pasobra no a kometé ningun akto kastigabel.

Movementu Futuro Kòrsou

 

Webmaster

Leave a Reply