• PLAN DI AKSHON
    MFK 2016
  • flag-curacao flag-holanda
Home Amerigó Thodé GABINETE ASJES DESPUES DI 18 LUNA A BOLBE LAGA TUR PENSHONADONAN NA...

Willemstad, 15 ougùstùs 2014

Ta un bèrgwensa kon Gabinete Asjes den persona di Minister Whiteman ta bolbe laga penshonadonan na kaya riba e lei ku aña pasa dia 1 di febrüari e koalishon di Pueblo Soberano Partido Pais, Partido Nashonal di Pueblo i esun ku a hòrta asiento di PAR bai ku ne a pasa pa masakrá tur e penshonadonan. Un lei kaminda nan mes a atmití ku esaki no tabata korekto i de paso a primintí ku nan lo bini ku un lei di reparashon, awe doodgewoon Gabinete Asjes den persona di Minister Whiteman a bini ku su man i pia Parlamento sin e lei di reparashon bin bolbe benta e lei aki atrobe te na un otro fecha indefiní. Klaramente por mira ku Gabinete Asjes den persona di minister Whiteman a neglishá tur penshonado, bin gaña pa saka su kurpa  pasombra e lei ku e mes i e koalishon di Pueblo Soberano Partido PAIS, Partido Nashonal di Pueblo i esun ku a hòrta e asiento for di PAR bai kuné a primintí e penshonado no por a logra trese esaki manera e mes a indiká ku no tabata korekto for di aña febrüari ora e koalishon aki a pasa e lei maligno aki. Na mes momento e mes un Gabinete Asjes aki tambe a primintí ku nan lo bai bini ku medidanan lateral (flankerend beleid ) pa asina suavisá e sla ku vooral e penshonado lo bai haña ku e medidanan inhustu ku nan a bini kuné. Aunke kuantu e penshonadonan i tambe oposishon a supliká, a roga, a hasi tur sorto di kos pa no pasa e lei aki, Gabinete Asjes a disidí ku nan ta pasa e lei aki tog kueste loke kueste, i masakrá penshonadonan te hasta dia di awe.

Resientemente den un kaso penal ku a tuma lugá aki na Kòrsou kaminda un akusado ku a wòrdu sera pa Ministerio Públiko pa 11 luna , un hues imparsial a tuma un desishon den e kaso aki di laga e akusado bai liber pasombra e hues en kuestion mes ta haña ku 11 luna pa sinta sera ta warda pa haña un huisio ta demasiado largu. I aki netamente un Gobièrnu di Gabinete Asjes den persona di Minister Whiteman si ta haña ku 18 luna no ta sufisiente i awor a pidi presidente di Parlamento pa dunele atrobe mas tempu pa e bin kontesta miembronan di parlamento  riba preguntanan hasi den e primera tanda di e reunion ku Frakshon di MFK a pidi.

Frakshon di MFK a ekspresá su desgustu dilanti pasombra klaramente bo ta mira ku aki juist e Gabinete di Asjes den persona di minister Whiteman no solamente a malinformá e Parlamento pero tambe e a demonstrá su inkapasidat di dominá e materia i tambe duna muestra ku hinter e Gabinete di Asjes aki no tin ni e noshon ni e kapasidat pa goberná henter un Pais. E gabinete aki a demonstrá ku su aktitut un biaha mas ku e no tin e interes di e penshonado na pechu i tambe a duna muestra ku nan lo bai den historia ku e Gobièrnu aki forma pa Pueblo Soberano Partido PAIS, Partido Nashonal di Pueblo i esun ku a hòrta e asiento for di Partido PAR bai ku ne ku lokual ku Gabinete Asjes en todo kaso a hasie ku e penshonado ta algu inkorekto, inhustu, inhumano, asoshal , falta di rèspèt i un abusu di marka mayor. Pa kolmo nan ta hasi esaki nèt kontra di e penshonadonan humilde ku no tin ningun sindikato of organisashon ku por Sali na defensa di su derechinan, ku den nan tempu ta nèt nan ku awe ta e penshonado ku a traha duru i a sòru pa nan ta loke nan ta awe.

Awor ku nan dia a yega pa nan haña e trankilidat, e kuido i trato nesesario ku nan tin derechi riba dje i ku nan meresé, ta nèt awor esnan ku mester duna e ehèmpel di demostrá i gradisí e grandi di tur loke e a nifiká pa nos komunidat ta nan awe ta bira lomba pa e grandinan aki i laga nan pa nan kuenta basta nan si keda sintá  konfortabel den nan posishon i nan stul.

Ta inkreibel di mira ku ta esaki ta e danki ku e penshonadonan ta haña di Gabinete Asjes ku tur dia di nobo tin nan boka yen papiando riba netamente e bienestar di grandinan.

Atentamente,

 

Amerigó Thodé

Miembro di Parlamento Frakshon MFK

Cell. +5999-526-0616

thode_parlamento_10april2014

Webmaster

Leave a Reply