• PLAN DI AKSHON
    MFK 2016
  • flag-curacao flag-holanda
Home Amerigó Thodé Ta bon pa den korte trese e brujo o medium ku por...

Si tin un kos ku semper Kòrsou ta (tabata) orguyoso di dje ta nos sistema hudisial ku pa gran parti a marka historia pa su imparsialidat, ophetividat i mas ku tur kos hustisia pa un i tur. Esaki sinembargo a konosé un otro rumbo den último añanan, kaminda nos a yega asina leu ku awor te hasta brueria ta usa pa pone man riba supuesto sospechoso. I si ta brueria ta usa, kisas por solushoná hopi kaso mas di asesinato di kual  famianan tambe ta pendiente pa haña hustisia i sa ta ken ta e kulpabel nan.

Movementu Futuro Kòrsou (MFK) ta lamentá inmensamente e desaroyo negativo aki pa nos partido i tambe pa Kòrsou i mas ku tur kos pa e hendenan ku ta keda someté na e grado haltu di inhustisia aki.

Detenshon di George Jamaloodin i tambe di su ruman Robby Dos Santos no ta nada otro ku e punto mas baho ku nos sistema hudisial a yega na dje, usando manera nos a bisa kaba brueria pa deklará nan sospechoso i detené nan.

Ku e detenshonnan aki tambe ke bisti Movementu Futuro Kòrsou e morto di Helmin Wiels manera kier a hasi for di 5 di mei 2013 dia di e krímen horendo aki a tuma luga. Kisas ta lubidá ku e propio defuntu Wiels a kalumnia lider di MFK Gerrit Schotte na numeroso okashon i si kisas awe Schotte lo tabata morto lo a asumí outomátikamente ku ta Wiels lo a laga mata Schotte?

E forma di arestá hende riba brueria ta duna un smak amargo i ta duna e impreshon bon kla ku e kaso di Magnus i Maximus ta unu di persekushon i destrukshon polítiko. Ku ki meta, esei kisas un dia lo sali na kla.

MFK ke enfatisá bon kla ku nos sigur no tin niun benefisio ku morto di Helmin Wiels i nos ta roga na Ministerio Públiko i henter e aparato hudisial pa tene kuenta ku henter e investigashon i detenshonnan aki ta kibrando henter un pais, ta hinkando miedu i tenshon den kada suidadano ku un dia tabata kana trankil ku nan boka yen di hustisia i awe ela konvertí den un sentimentu di inhustisia.

MFK ta spera ku gobièrnu i ministerio públiko ta tuma bon nota di e direkshon kompletamente robes ku e kaso aki a kue i si tin Kòrsou na pechu ainda ta bon pa bisa “ta basta awor”. Ministerio públiko mester stòp di aktua komo un organisashon polítiko i kuminsá apliká hustisia. Nos no por konkluí otro ku den e kaso di asesinato aki hustu lo bai paga pa pekador i pa evitá esaki lo ta bon pa durante tratamentu di e kaso den korte trese e brujo o medium ku por komuniká ku defuntu Wiels, pa asina defuntu Wiels mes duna deklarashon den korte.

Konkluyendo nos por bisa ku nos sistema hudisial ta hasiendo su mes ridíkulo, esaki probablemente pa desesperashon ku investigashon no ta kanando manera nan ke i di e manera ku e polítikonan na mando awe a primintí pueblo di Kòrsou.

MFK ta invitá ministerio públiko pa kuminsá funshoná a base di lèi i regla i no a base di polítika.

MFK

Webmaster

Leave a Reply