• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas Ta biba den saku di Pueblo pa saka sèn

IMG_2120

Koalishon ta duna Asjes un biaha mas lus bèrdè pa sigui favoresé kompinchinan,

Djaweps 19 yüni 2014 a inisiá e reunion públiko di Parlamento pidí dor di frakshon di MFK, ku e petishon pa atendé e mal maneho ku ta hibando pa ku deporte na Kòrsou.

Manera semper nos frakshon tabata bon prepará i dokumentá i a hiba un debate na nivel. Nos frakshon mester a konstatá un biaha mas durante e debate, ku miembronan di koalishon no ta prepará pa e reunionnan públiko anto ta hiba un debate hopi bou di nivel. Nos frakshon a trese dilanti sigur e parti ku Promé minister enkargá ku deporte, lo ke favoresé kompinchinan dunando nan un tarea di 1.2 mion florin. Tambe nos a trese dilanti ku e konsultant ku a haña e trabou ta e mes ta direktor di su kompania DCG managment kvk numerá 59509 i alabes e mes ta miembro di bestür di e Instituto Nashonal di Deporte kvk numerá 132426.

Promé minister kontrali na lokual e mes a trese dilanti na luna di febrüari 2014 den medionan di komunikashon, ku ta 1.2 mion lo otorgá un konsultant pa traha un plan di maneho, awe diripiente ta bisa ku kontrali na lokual frakshon di MFK ta trese dilanti, no ta e suma ei pero 700 mil florin lo paga na e konsultant. E sobra 500.000 supuestamente lo wòrdu invertí den formashon di lidernan pa deporte.

Manera ta ampliamente konosí ya ta eksistí un plan di maneho pa instituto Nashonal di deporte ku a kosta mas o ménos 25.000 florin. Pakiko gasta un dineral pa traha práktikamente e mesun rapòrt.

Despues di tur deliberashon frakshon di MFK a entrega un moshon ku ta bisa den su dictum:

“Pa urgí Gobièrnu pa drei bek e desishon pa gasta míles i míles di florin innesesariamente na produkshon di un rapòrt ku ya ta eksistí i invertí e sèn aki den e nesesidat real di e diferente instanshanan deportivo i fasilidatnan. “
Nos a motivá pakiko nos ta bai di akuerdo ku e moshon i despues a bai over na votashon.

Grandi tabata nos sorpresa ku ta netamente un parlamentario a trata di defendé dikon e ta bai kontra e moshon, argumentando ku ya minister a splika tur kos kaba.

Mas argumento e no ta tin paso ta práktikamente imposibel pa bai kontra un moshon asina ei. Ora ku a kere tur sobra parlamentarionan di koalishon lo a bai motivá nan voto tur a keda ketu. Tabata di spera si, paso tur lokual promé minister hasi nan ta aprobá sin mas.

Na momento di votashon koalishon den su totalidat a bai kontra e moshon. Hasta frakshon di PAR, di kual un di nan miembronan Sr. Konket ta presidente di Federashon di beisbòl, i ku tur dia ta yora pa fondo pa organisá kampeonato, kontra tur espektativa a vota kontra. Kier men favoresementu di kompinchi ta bai riba kustia di Pueblo di Kòrsou i den e kaso aki prinsipalmente deporte.

Un biaha mas a keda komprobá ku lokual ya frakshon di MFK a trese dilanti: koalishon ta aprobá tur kos di otro basta nan keda sinta riba e stul.

Webmaster

Leave a Reply