• PLAN DI AKSHON
    MFK 2016
  • flag-curacao flag-holanda
Home Gerrit Schotte Presidente di Parlamento Franco tei pa defende su koalishon só

10380191_10152014573491021_3271126930765000251_o

E mal maneho di minister Dick di Enseñansa i di Minister Asjes di Deporte últimamente a kousa hopi disgustu i bin haña hopi resistensia den nos komunidat. Hasta sr. Asjes i sra. Dick a haña nan mes na kareda pa kanselá medidanan pa kòrta den enseñansa, ora studiante, maestro, sindikato, direktiva di skol i mayornan, hinter Kòrsou a lanta fuertemente kontra di e medidanan. Ku e kanselashon aki, e ministernan mes ta atmití i akseptá ku nan a hiba un mal maneho.

Tumando nota di e resistensia den komunidat, MFK a pidi un reunion públiko di Parlamento pa diskutí riba e mal maneho aki di sra. Dick i sr. Asjes, algu masha normal den un demokrasia. Pa nos gran sorpresa e presidente di Parlamento, sr. Mike Franco di partido PAIS a disidí riba su mes pa kambia e petishon di MFK pa papia riba e ‘mal maneho’ di e 2 ministernan den un punto di agènda pa papia riba ‘maneho’, mas ku kla den un intento pa laga e ministernan di su koalishon lusi mihó.

E derechi pa pidi un reunion di Parlamento riba e tópiko ku nan ta indiká, ta un derecho sagrado di parlamentarionan, ankrá den lei (Reglamentu di Órden). E ta di vital importansia pa nos demokrasia, pasobra asina un minoria den Staten por laga nan bos resoná riba tópiko di nan eskoho. Sin esaki ta simplemente diktadura di mayoria lo tin. Ta den e espíritu aki MFK, ora nan a tuma nota di e kambio partidista ku sr. Franco a bini ku n’e, a pidié pa koregí esaki i menshoná e puntonan di agènda manera nan tabata indiká den nos petishon.

Sr. Franco a ninga di hasi esaki, bisando ku Reglamento no ta oblig’é pa tuma over nos formulashon i ku papia di ‘mal maneho’ pa ku e ministernan di su koalishon ta un insinuashon suphetivo di nos parti ku e mester eliminá di e punto di agènda. Nos kier bisa sr. Franco: Si, nos ta di opinion ku sr. Asjes i sra. Dick a hiba un mal maneho, meskos ku eigenlijk hinter komunidat ta haña esei, pero eksepto aparentemente sr. Franco.

Den un demokrasia real nos tin e pleno derecho pa buta e mal maneho aki riba agènda di Parlamento, algu ku sr.Franco aparentemente no ta komprondé. Òf ta tópiko ku ta kunbiniente pa sr. Franco i su koalishon só por subi agènda?

Den e aña i mei ku sr. Franco a sinta komo presidente un kos ta resaltá, kon e ta uza i abuzá di su poder komo presidente pa stroba, frustra i opstakulisá trabou di oposishon pa ehersé kontròl demokrátiko riba e gobièrnu di e koalishon ku e ta parti di dje. E ta hasi i deshasí di un manera partidario, hasta kontra tur regla, sabiendo ku na final di dia e mayoria di betòn di koalishon lo sostené kiko e hasi. Un presidente di Parlamento mester ta un persona no-partidario i ophetivo, ku ta protehé derechinan i interesnan di un minoria den Parlamento tambe. Sr. Franco ta un bèrgwensa pa loke e posishon honorabel di presidente di Parlamento mester ta.

Loke a pasa aki ta un ehèmpel duidelijk kon partidista sr. Franco ke ta. E kier kulpa nos di a usa un insinuashon suphetivo ku e palabra ‘mal maneho’. Den pasado sr. Franco a akseptá den puntonan di agènda ekspreshonnan manera “situashon alarmante i penoso di kriminalidat” i “peliger den salubridat” sin kalifiká nan komo insinuashonnan suphetivo i sensurá nan. Asina tin hopi ehèmpel mas. Esmas, loke un persona ta konsiderá komo un palabra ophetivo i neutral, un otro persona ta hana suphetivo.

Ora presidente di Parlamento otorgá su mes e outoridat pa bai tornu na palabra di un parlamentario, ku su mes komo arbitre di kiko por i kiko no por, eksepto kaminda Reglamentu di Orden ta duné e outoridat ei, demokrasia por bien dobla warda numa. Laga presidente so papia na nomber di tur parlamentario: tesei nos kier?

Webmaster

Leave a Reply