• PLAN DI AKSHON
    MFK 2016
  • flag-curacao flag-holanda
Home Gerrit Schotte NO TIN KUESTION DI LIBERTAT KONDISHONAL PA SCHOTTE

IMG_6071

Ku ministerio públiko (OM) ta bai traha riba un dia di fiesta pa saka un komunikado di prensa kontra di Gerrit Schotte, riba su mes kaba, ta remarkabel. Pió ainda ta ku ta mal informá den esei, loke ta ta kompletamente reprochabel. Ta mas ku kla ku OM den e kaso aki ta buska publisidat pa trata na mobilisá e públiko pa sostené nan akshon kontra Schotte i e komunikado di prensa mentiroso aki ta e ehèmpel klásiko. Den informashon pa públiko OM tin e responsabilidat pa trese solamente e bèrdat. Nos mester konstatá ku OM adelantá ta trata na krea un ambiente negativo rondó di un suidadano. E intenshon ta pa maniobra opinion públiko den un sierto direkshon i pa purba influensha esnan ku eventualmente tin di husga ainda. Krea spektakel i drama riba emoshon barata. P’esei no ta nada straño ku riba medionan soshal tin un yagmentu orkestrá kontra e persona. E aktuashon aki no ta un insidente. Akinan ophetivamente por prueba ku OM konsientemente ta lansa mentira i nònsèns hurídiko den laria. E aktuashon bochornoso aki a bira algu struktural serka OM. Te hasta ora nan ta robes nan ke purba ‘score’. Korte Europeo pa Derechinan Humano ta desaprobá tipo di aktuashon asina. Spesífikamente den kasonan ‘high profile’ ta eksigí ku e informashon ta al kaso i, mas ku tur kos, korekto.

E komunikado di OM ta habri ku mentira kaminda ta stipulá ku Schotte ta den libertat kondishonal. Esaki ta duna muestra di un mentalidat dudoso. Lei no ta permití libertat kondishonal durante e promé 10 dianan. E úniko suspenshon òf libertat kondishonal ku lei konosé ta di artíkulo 111 di Kódigo di prosedementu penal. Esaki ta den un fase mas lat. Di libertat kondishonal durante e promé dianan niun hende a yega di tende. Esaki ta prueba ku konsientemente ta malinformá sosiedat. Nos legislador tampoko nunka a tende di esaki. Bèrdat ta ku Schotte, manera tur suidadano desente lo por hasi, for di e promé dia, a duna di konosé ku a ser’é pòrnada, pasobra por a djis invit’é i e lo a presentá pa splika.

Ku OM ta liber pa saka un órden di detenshon ta pará den lei bon kla kaba i por ta kontra tur hende. Por ehèmpel tambe kontra presidente di banko sentral. Innesesariamente e hues komisario a pone esaki den su desishon. Ku un órden asina por i lo wanta den e kaso spesífiko aki naturalmente ta otro kos. I meskos ku ta konta pa tur suidadano, no por obligá Schotte pa koperá ku niun investigashon kontra su mes. Lei no konosé komo base pa sera hende, ku e hende ta ninga di koperá ku un investigashon kontra su mes. Obligá un hende di koperá ku un investigashon kontra su mes ta te hasta ilegal. Esaki ta algu asta universal. Den asta pelíkula di krímen i polis semper e sospechoso ta keda informá promé ku tur kos ku e tin e derecho di no kontesta pregunta. Schotte, sinembargo, a duna di konosé ku e ta dispuesto di presentá komo hende di palabra, si invit’é di manera na drechi i ku rèspèt. E no tin ningun obligashon di koperá ku nada. Nos ta konsiderá tantu e ponensha di e hues den su desishon komo e posishon asumí pa OM den su komunikado komo chantahe, den sentido ku si bo no koperá ku un investigashon pa yuda sera bo mes, nos ta usa nos poder i serabu atrobe.

Den e komunikado tin mas mentira. Tin poné ku a skohe pa un detenshon di un máksimo di 10 dia. Aki tambe por bai gaña baka. Durante e tratamentu djamars atardi, fiskal Van Logten a duna di konosé bon kla ku e intenshon ta pa e siguiente dia mes entregá un petishon pa aresto preventivo ku segun lei ta sigui ku dos bes 8 dia i ku despues lo por prolongá ku 60 dia mas. Si hues no a intervení djamars último, OM lo a hasié tambe, pasobra e fiskal a bisa ku e petishon ta kla i ku e lo entregá mas dokumento, probablemente e atardi ei mes.

Finalmente e ponensia remarkabel ta ku mesora ku e investigashon ta kla, lo dagfar ámbos sospechoso. Normalmente ta asina ku ora kaba ku e investigashon ta sinta na mesa pa evaluá i disidí kiko ta bai sosodé. Pa Schotte i su señora aparentemente, sin ku e investigashon a ni finalisá, ya a disidí kaba ku ni maske kiko pasa òf resultá den e investigashon, ku OM mes ta indiká ku no ta kla ainda (p’esei e ke detenshon di Schotte) ta bai dagfar tantu Schotte komo su señora. Esaki ta bisa tur kos kaba den e kaso aki. Na lugá di Babel, mihó yama e kaso: ‘Barbertje’ …. moet hangen!

Kòrsou, 30 di mei 2014.
Sulvaran & Peterson

Webmaster

Leave a Reply