• PLAN DI AKSHON
    MFK 2016
  • flag-curacao flag-holanda
Home Monique Felida Miéntras ku enseñansa ta sklama pa solushon di hopi problema tin silensio...

IMG_6122

Hopi prekupá i molestiá nos mester tuma nota di e tantísimo problemanan ku atrobe ta lanta kabes den e ministerio di enseñansa sigur den e último dianan di e aña eskolar aki.

I ta manera ku ta tur hende i gremio ta prekupá ménos e Minister di Enseñansa, Siensia, Kultura i Deporte i e gabinete bou di asignashon di Promé Minister Asjes.

Na momentu ku bùs nan ku mester a transportá muchanan di skol no por a kumpli ku nan tarea pa motibu di pago, nos a spera ku Minister di Enseñansa, Siensia, Kultura i Deporte lo a sali na defensa i hasi un yamada na ministerio di SOAW pa kumpli ku e pago i evitá inkumbiniensha pa ku asistensia di muchanan na skol. Pero a reina un silensio di parti e Minister.

Ku asombro nos a tuma nota  ku a bolbe duna SSC e tarea di parti buki na skolnan sekundario relashoná ku e proyekto enseñansa liber. SSC no por a kumpli ku e tarea i mas ku tur kos no a finalisá e tarea tampoko mirando ku ainda tin skolnan ku no a haña tur buki òf material eskolar. I sigur esaki ta un punto di kuestioná mirando ku ora señora Irene Dick a asumí e puesto di Minister el a ekspresá ku e tarea di repartishon di buki lo kai bou di enkargo di Fundashon Material pa Skol (FMS) mirando e eksperensia amplio ku FMS tin pa ku repartishon di buki na skolnan di Fundeshi i ku tabata sosodé na un manera korekto. Nos pregunta ta awor; ta dikon ta bolbe duna SSC e tarea aki? No ta e aktual minister mes a haña ku SSC tin ku atendé ku finansiamentu di estudio i no repartishon di buki?

Otro pregunta ku ta kologá den laira ta si pa e aña eskolar entrante si a bestèl tur buki kaba pa nos hóben nan no mester pasa un aña eskolar ta siña i traha for di buki i dokumentu nan kopiá. Kopiamentu di buki i dokumentu sin outorisashon di e outor(nan)   ta kastigabel pa lei. Ki ehèmpel nos ta duna nos hóben burlando di tur regla i lei i ta manda nan bai kopia e material di skol ku nan mester. I sigur ora ta papia di “nation building” esakinan ta punto nan ku un gobièrnu ku ta respetá su mes i su pueblo mester tene kuenta kuné.

Pa loke ta unifòrm di skol  tambe te awe nos no a haña un klaridat kiko lo bai sosodé ku esaki. A sali anunsiá ku Gobièrnu lo bai traha un unifòrm general pa tur skol i ku lo yuda baha gastu pa ku unifòrm di skol. Te awe nada no a sosodé i ya kaba mayoria skol a saka nan formulario pa bestèl unifòrm manera nan a bin ta hasi pa hopi aña kaba. A duna mayornan un speransa falsu ku awor si lo bai tuma paso kontra esnan ku ta hasi di unifòrm di skol un negoshi lukrativo pa awor ripara ku aña eskolar ta bai terminá sin a tende kon ki plan Gobièrnu pa ku e asuntu di unifòrm aki.

Otro punto tambe ku Minister  a pone masha énfasis riba dje na momentu ku el a asumí e tarea komo Minister di Enseñansa, Siensia, Kultura i Deporte ta pa duna mas atenshon na muchanan di 0 te ku 4 aña. Te ku awe muchanan di 0 te ku 4 aña ku ta yu di mayornan ku ta kobra ònderstant no por bishita un skol di hunga/krèsh  paso nan mayornan no ta bini na remarke pa haña e supsidio aki. E úniko konklushon ku nos por saka ta ku si bo ta yu di un kobradó di ònderstant bo ta keda deskriminá i no ta haña oportunidat pa desaroyá manera otro muchanan ku si por bishitá u skol di hunga.

Asina nos por sigui menshoná muchu mas punto di atenshon ku nos a bin ta konstatá den e último dianan aki i ku tur hende ta komentando pero ku esnan mes ku tin ku duna kuenta i rason na pueblo ta kedando i ketu i laga tur kos bai pega numa. Mihó bisá: Tin silensio na paleis miéntras ku enseñansa ta sklama pa atenshon.

Webmaster

Leave a Reply