• PLAN DI AKSHON
    MFK 2016
  • flag-curacao flag-holanda
Home Monique Felida Minister Irene Dick ta haña benefisio di duda

Basta e pone plaka kaminda su kurason ta!

Ku hopi atenshon nos a sigui tur e disertashonnan ku minister di enseñansa, siensia, kultura i por parte deporte a hiba tur e dianan aki den su diferente presentashonnan. Ta opvio ku e flamante minister a pone énfasis riba e kuido i atenshon ku muchanan entre 0 pa 4 aña mester haña ku últimamente ta netamente e grupo aki a keda deskuidá. Nos tur sa ku krèsh i/òf skolnan di hunga ta esnan ku último añanan ta esnan ku mas a sklama pa yudansa i kasi bo por bisa ku no tabatin oido pa e grupo aki. E kantidat di mayornan/muchanan ku ta bin na remarke pa un supsidio pa bishitá e tipo di skolnan ei a keda redusí. Mester konsiderá pa inkluí yunan di kobradónan di ònderstant pa tambe bin na remarke pa un supsidio. Tambe ta bin aserka ku tur e tipo di skolnan ariba menshoná mester a kumpli ku diferente tarea pa sigui haña supsidio, ku e speransa ku na komienso di e aña aki nan haña un oumento di e sèn di supsidio.
Si nos tira bista riba loke nos por a mira den presupuesto pa aña 2014, nos no ta mira ku a presupuestá e oumento di supsidio aki. Esaki kiermen ku un biaha mas na fin di e luna aki e skolnan di hunga i krèshnan lo bolbe haña un desapunto ora ku e oumento aki no drenta na vigor. Nos ta spera di tende den e dianan aki ku enbèrdat e minister ta bai kumpli ku loke e mes a bisa ku e tin na su kurason, esta e grupo di 0 pa 4 aña, ku mester di mas atenshon. Mester hinka sèn den e skolnan ku ta kuida e muchanan aki pa asina nan drenta skol di fundeshi ku un base sólido pa sigui traha riba nan edukashon tantu kognitivo i sosial. Den e mesun rosea tambe apliká kontròl riba e skolnan aki pa mira ku nan ta kumpli ku e programa “kaleidoskop” i asina ta duna e enseñansa/edukashon manera mester ta. Nos a mira hopi minister bin i nos a mira hopi minister bai. Por sierto esaki ta e di 6 minister den 3 aña di tempu ku ta bai manehá e kartera pa Partido Pueblo Soberano kual kartera ta un di esnan di mas importante pa krea un fundeshi sólido pa un pais. P’esei nos ta spera ku e minister aki por haña espasio pa traha i kuminsá ataká e problemanan na nivel di maneho i no papia kada bes di kiko su deseonan ta pero trese kambionan struktural awor.

Problema di partimentu di buki ta algu ku pa nos ta “gepasseerd station” i ku tin kosnan mas importante pa e minister atendé kuné. Paso nos ta kere ku den e periodo aki ya tur problema di buki mester ta resolvé i ku e plan pa otro aña eskolar ya ta kla pa kon ta bestèl i parti buki.
Tambe nos ta spera ku e minister aki si por pone òrdu den DOS i ku pronto DOS tin un maneho struktural. Ta ora pa DOS haña un direktor permanente ku ta tuma desishonnan konkreto i introdusí un maneho struktural pa tur e skolnan ku ta kai bou di e Direktiva di skolnan públiko i no faboresé sierto grupo i/òf skolnan.
No tin duda ku e minister aki konosé e vèlt di enseñansa hopi bon i ku hopi hende a buta nan konfiansa den minister aki pa kuminsá traha awor i resolvé e problemanan, ehekutá tur e plannan ku a keda neglishá den e último 3 añanan a konsekuensia di kambionan di minister.
Nos tambe ke duna e minister benefisio di duda i lo sigui su pasonan ku wowo di falki. Pasó sigur e parti di enseñansa ta sklama pa un maneho struktural i ku kontinuidat.

IMG_3554

Webmaster

Leave a Reply