• PLAN DI AKSHON
    MFK 2016
  • flag-curacao flag-holanda
Home Monique Felida Ministerio di enseñansa, deporte, kultura i siensia maltratá Nabegando sin rumbo...

monique

Ta parse ku tin hende, partido polítiko i gobernantenan ku no ke atmití ku e rumbo ku nan ta hibando un di e ministerionan mas importante pa nos pais, esta e Ministerio di enseñansa, deporte, kultura I deporte, ta manera ora kapitan bati retirada for di un barku riba laman ganchu i lagando esaki ta nabega sin rumbo i sin kompas.
Nada otro nos no por konkluí despues ku den tres aña di tempu nos a konosé 5 minister di enseñansa i pa kuater luna kaba e ministerio tin un minister interino ku no ta bira kara mes wak e kartera aki.

E kambionan di Minister a pone ku kada bes e Ministerio a keda konfrontá ku kambionan drástiko pasó kada Minister kier a imponé su propio vishon pa ku e kartera aki.
Pa loke ta e aña aki e maltrato mas pisá ta e echo ku un Minister ta tuma retiro na luna di ougùstùs i te awe na luna di desèmber no por nombra ningun otro minister na su lugá . Ta pone un fecha tentativo ku ta bai anunsiá ken lo bira e próksimo minister di enseñansa, deporte, kultura i siensia pero ora ora sero yega no ta ni anunsiá ku ainda no tin un kandidato pa e ministerio en kuestion. Asta dia di enseñansa a pasa sin ku e ministerio a sa ken ta su próksimo titular.

Loke tambe ainda ta un trouma ta e entrega di buki ku a kana robes na komienso di e aña eskolar aki. Te awe tin skol/alumno nan ku ainda no a risibí tur buki. Ainda ta sperando riba un evaluashon di kon e resultadonan ta di e promé eksamen nan eskolar na nivel di VSBO, HAVO i VWO. Pasó manera nos tur sa esnan mas perhudiká ta e grupo di alumnonan ku ta den nan último aña i ku na luna di novèmber mester a traha nan promé eksamen nan eskolar i te ku luna di òktober nan no a risibí tur buki.

Servisio di enseñansa di skolnan públiko D.O.S. ainda no tin un hefe permanente i ta drei ku hefe interino ku no ta tuma ningun desishon duradero. Rekapasitashon di maestronan no ta tumando lugá i derechinan di maestronan di skolnan públiko ta keda trapá. Manera pago nan segun nan funshon, gratifikashon i sigur atendé ku problema i duna oido nan esnan ku ta kai bou di e servisio aki.

Pa loke ta kultura por konstatá ku ainda hopi trahadó di Kas di Kultura ta bibando den un inseguridat pa loke a keda anunsiá ku ta bai lanta un instituto di kultura i ainda no ta konosí si ta tur trahadó lo pasa pa e instituto aki. A laga traha un rapòrt pa skèn kiko ta e problema den KdK i te awe ni e servisio ni Parlamentu no por risibí e resultado di e skèn.
Ya ta bon konosí ku aparte di SEDREKO awor tei lanta otro fundashon pa yuda ku deporte.

Esaki sigur ta kuestionabel den un tempu ku Gobièrnu ta anunsiando ku ta bai stòp ku duna supsidio na diferente fundashon i mas ku tur kos ke pa mas i mas fundashon ku ta hasi e mesun trabou klùster i bira un. Un ehèmpel di esaki den e mesun ministerio aki ta ku Gobièrnu a hiba un maneho pa baha e kantidat di fundashon nan den e sektor di enseñansa.

Asina nos por sigui menshoná kon deskuidá e ministerio di enseñansa, deporte, kultura I siensia ta. No tin un maneho pa netamente e ministerio ku mester krea un fundeshi sólido den e komunidat aki. Esta derechi igual di enseñansa, krea hóben nan patriótiko ku pashon pa nos kultura i mas ku tur kos brinda oportunidat pa deporte pa tur mucha i hóben den e komunidat aki.

Nos ta spera ku durante tratamentu di presupuesto di aña 2014 nos por haña mas klaridat ta kua kapitan lo ta na timon di e barku aki i mas ku tur kos ku lo bai atendé na un manera serio i konfiabel ku e kartera di enseñansa, deporte, kultura i siensia.

Webmaster

Leave a Reply