• PLAN DI AKSHON
    MFK 2016
  • flag-curacao flag-holanda
Home Gerrit Schotte “GOVERNMENT SWEEP”

IMG_8722_close
Awe despues di 15 luna I 9 dia ku 2 miembro di parlamento a grita na pueblo ku nan ta bai salba KORSOU, wak unda nos ta ?

Awe despues ku riba 12 Desèmber 2012 a forma un Gobièrnu enfoká riba PAZ,TRANKILIDAT I PROSPERIDAT bo por sigui soportá e supuesto Pas I Trankilidat I Prosperidat ku nan ta brindando bo?

Medidanan desbalansa ku a wòrdu tuma durante aña 2013 a krea un efekto negativo riba nos ekonomia I e bida diario di práktikamente tur siudadano. Di e klase ménos pudiente te na e klase mas pudiente.

Negoshinan ta dal nan porta sera, aerolineanan a disparsé I otronan den problema bastante kritiko, hotèlnan a sigui nan tras, restorantnan awor ta “aan de beurt” , otro kompanianan ta baha trahadó pa mira ku ainda nan por salba nan operashon, den un palabra KOMERSIO ta paralisá. Y atrakonan ta na òrdu di dia.

Esaki no ta nada nobo el a sosodé den añanan 2000,2001 kaba kaminda Gobièrnu di e tempu ei a tuma medidanan desbalansa y okashoná ku 43,000 habitante a bai fe KORSOU bai buska un mihó futuro otro kaminda. Y esaki sin duda algun ta ripitiendo su mes un biaha mas.

Esaki ta e konsekuensia di e akshon di eks-Gobernador Frits Goedgedrag ku a disidí ku su último akshon komo Gobernador lo ta di instalá un gobièrnu interino (akto inkonstitushonal) pa asina salba KORSOU manera el a indiká na miembro di Parlamento di MFK pa kue asiento bai kuné pa asina por a logra esaki.

Nos tur ta di akuerdo ku no mester Brongosá un Gobernador pero tambe mester aseptá I respetá ku esnan ku ta Goberná ta esnan skohe dor di un pueblo atraves di un proseso demokrátiko. No por ta asina ku un Gobernador ta mete ku polítika I ta pretendé di keda “onschendbaar” òf na bon Papiamentu “ta tira piedra anto skonde man”

Alrededor di 2000 siudadano a pèrdè nan trabou kaba den ménos ku 12 luna di Gobernashon, hopi negoshi a dal nan porta sera, ekonomia ta stanka, no tin perspektiva ku kos lo drecha promé ku esaki bira aun mas pió tur esaki paso No tin Gobièrnu, No tin Gobernashon.

Tin un Gobièrnu instalá pero na final di dia tur hende ta riba nan tour i metanan personal, tur frakshon den koalishon ta riba un maneho di sobreviví I hasi tur lokual ta den nan alkanse pa logra e meta personal o di partido promé ku koroto yega na su fin tambe.

Bo por wet’é den e aktuashon di diferente Minister I tambe lidernan di frakshon den koalishon:

Alex Rosaria: Tin mas skandal I mal kontentu real den e komunidat awe, ku den historia polítiko den kualke 12 luna di un gobièrnu, sinembargo bou di su maskarada di ta para pa transparensha su Gobièrnu ta esun mas intransparente, inkonsistente, sin vishon sin boluntat I ku akshonnan ku kada dia di nobo ta muestra di Mal Gobernashon.

Sulvaran ku a kue asiento tambe bou di e supuesto kapa, segun su mes deklarashonnan, awe ta kreando fondonan manera semper el a hasi den Partido PAR pa kumpra simpatia i voto serka organisashon ku na final di dia den tur derechi di haña aporte sin tin nodi di pasa den proseso di mendigá pa ayudo. Un fondo pa deporte krea den Ministerio di Finansa, paso mester gasta plaka di pueblo atraves di modalidatnan manera Fundashon Bon Bibienda ku den pasado a kue sèn di Landsloterij manda pa un Fundashon ku ta resorta bou di prominentenan di Partido PAR, awe Sulbaran ta sigui ku e mesun forma di prosedé ku plaka di pueblo.

Asjes I konsorsio na final di dia ku tin e nesesidat di ta Promé Minister na kua kosto posibel, a lubidá promesanan ku e partido a grita tur dia despues di 10 di òktober 2010 ku kuponan di trabou na Kòrsou atraves di un lei 80/20 (Trabou pa yu’i Kòrsou, Punto!) lo tin ku wòrdu kuida. Awe ta “zwijg” riba esaki y a bira e Gobièrnu bou di mando di Pueblo Soberano ku Asjes na kabes ku a manda mas yu di Kòrsou (2000 hende) kas den e último 10 añanan.

PNP i su lider a para weta un aerolinea dal su porta sera paso simplemente segun nan no ta responsabilidat di Gobièrnu boga pa kuponan di trabou lokal den e Eks-aerolinea DAE. Awe na isla bisiña, Gobièrnu di Aruba si a sali bai Venezuela mesora pa wak kon por mitiga kualke perkansia den direkshon di Tiara Air i e kuponan di trabou.

Nan ta Gobernando meskos ku e kampaña ku ta tuma lugá den supermerkadonan ku ta wòrdu yama “Supermarket Sweep” esaki ta un kampaña kaminda e ganador tin 3 o 5 minüt pa kue tur lokual tin den rèki di e supermarket sin tin nodi di paga pa esaki na kaha. Wèl awe nos tin “Government Sweep” ta mané mundu tei kaba anto nan tin ku kue i deshasí di tur kos den un tempu rekòrt promé ku koroto dal abou.

Konklushon:

Ta lógiko ku un Gobièrnu forma abase di asientonan fia o hòrta ta aktua di e forma inmoral aki. Ta lógiko ku un Partido manera PAIS ta aktua di e forma aki paso nan no tin un lider, si no un kara/marionèt ku a wòrdu skohe dor di un grupo ku kier a traha un partido adishonal pa por a partner ku PAR pa goberná Kòrsou, pero ku na final di dia e plan a kai na awa. Esnan tras di kortina mester a yega na poder komo sea i esaki awe ta e resultado Pueblo Soberano , Partido Nashonal i un asiento hòrta anto e meta kumpli ku e boluntat di esnan tras di telon. Sulbaran, ku su karera polítiko ku a frakasá hopi aña pasa kaba, awe mester a kue poder di e forma aki anto awe sin partido sin un organisashon sin niun klase di responsabilidat ta goberná pa su propio interesnan I di otronan ku di mes ta probechá di situashon.

E resultado ta ku un grupo chikí ta keda kla manera semper ku lokual nan mester, nan propio benefisio anto e Pueblo ta esun ku manera semper ta paga (Oumento di prima di Seguro Médiko Básiko, Oumento OB di 6% pa 9%) pa esaki por sosodé. No duda ku na final di aña boso lo tende ku tin surplus di Miónes miéntras Ekonomia cq. Pueblo di Kòrsou a sufri hinter aña 2013.

Webmaster
2 replies to this post
  1. Komo un hoben mi ta mira hopi gobiernu tras di otro, for di prome ku kabinete schotte, durante kabinete schotte i e siguente kabinete nunka a duna ohido na proyekto maritimo ku nos a entrega pa asina por krea trabou pa hopi ju korsou studia riba e tereno aki. na opstante ku HAKIM kier a duna un man den esaki. otro partido a disidi di benta gobiernu abou. te asta dia di awe gobiernu Korsou no a jama nos pa evalua posibilidat di trabou maritimo den nos propio haf na korsou. pero si e plan ku nos a analisa tur e anja a keda warda den lachinan di KORPODEKO. asina ki si Korsou nunka por sali pa dilanti. Ban pa kambio. Ban pensa pa e yu di Korsou ku tin mester di TRABOU

Leave a Reply