• PLAN DI AKSHON
    MFK 2016
  • flag-curacao flag-holanda
Home Amerigó Thodé MOSHON-SALBABIDA PA NAVARRO I KOALISHON

Despues di e shòk ku henter Kòrsou a sinti ora a bira konosí ku Luigi Florentina (‘Pretu’), ku tabata sospechoso den un kaso relashoná ku e asesinato di Raul (Bolle) Martinez (sospechoso asesinato Helmin Wiels), a muri den e sèlnan na Barber, tur wowo tabata dirigí riba Parlamento. Einan e Minister di Hustisia Sr. Nelson Navarro lo a bin duna kuenta i rason di kon kos por a bai asina robes, ku komo resultado un pèrsona asina klave pa e investigashon, no ta na bida mas.

Den wikènt kaba por a tende masha ekspreshon hopi indigná for di tur gremio di nos komunidat. Ya tabatin hopi malkontentu pa e echo ku despues di mas ku 4 luna ainda no tin klaridat den e asesinato di 5 di mei. Pueblo ku ta eksihí i tin derecho di haña splikashon i klaridat, no ta tende nada. Te hasta partidonan di koalishon a sali afó i manifestá nan malkontentu grandi.

P’esei pueblo a karga speransa ku porfin Parlamentu lo tin oido pa nan doló i ku no solamente lo bini ku eksigenshanan pa duna resultado den e kaso, pero tambe pa bin klaridat. Ademas pa obligá e Minister di Hustisia pa asumí su responsabilidat polítiko pa loke a pasa na Barber i pa e frakaso te ainda den e investigashon di e kaso- i konsekuentemente tene honor na su mes i tuma su retiro.

Pero pueblo un biaha mas a keda defroudá, ora úniko resultado di henter un dia di reunion tabata un moshon lali-lali ku e úniko meta pa mantené koalishon na bida i mantené e Minister di Hustisia riba su puesto. Sierto partidonan ku a sinti e preshon di pueblo a disidí ku Minister Navarro mester bai. Pero ora aparentemente e partido di Navarro, esta PAIS, a insistí ku si Navarro bai, Gobièrnu ta kai,  tur hende a spanta i laga tur eksihensha kai mesora manera un batata kayente. Imaginá bo ku nan lo mester bai kas nèt ora ku nan a kuminsá gusta e poder di Gobernashon, no por tòg!
Pa salba kara i hasi komo si fuera nan ta aktua, a disidí di sakrifiká e Alto Komisario di Polis, Sr. Wernet, mandando e kas.  Ademas a disidí pa bini, manera tabata di spera, ku un “komishon imparsial” pa bai ‘investigá’. Un akshon kompletamente suak , pasobra Gobièrnu mester tabata hasiendo su investigashon imparsial kaba for di e momento ku e insidente a tuma lugá. I tin mas: un komishon imparsial, nombrá dor di e minister, ku mester investigá e maneho di e minister mes tambe? No por! Ni sikiera a eksihí pa nan bin ku resultado den un tempu kòrtiku stipulá. I aki un par di luna, ora ainda e “komishon Imparsial” no a reportá, tur hende lo lubidá mes ku e ta eksistí. I miéntras tantu pueblo di Korsou si ta sigui ku su malkontentu i frustrashon tokante e kaso di asesinato di Wiels, paso no tin klaridat.

Pa kuantu tempu mas?

Webmaster

Leave a Reply