• PLAN DI AKSHON
    MFK 2016
  • flag-curacao flag-holanda
Home Monique Felida Mester bin un plan pa rekuperá lèsnan pèrdí pa motibu dje novela...

IMG_9760

E dianan aki por a tende di tur skina opinionnan ku ta diferenshá bastante tokante ta ken tin falta ku no ta tur buki a keda repartí ainda, pa loke ta e proyekto skol liber.
Analisando henter e situashon i tambe komo konosedó di e materia nos ke proponé lo siguiente:

SSC mester asumí su responsabilidat awor. No tin espasio mas pa sigui buska falta aki i aya. Mester atmití ku SSC a balotá i sigur no a prepará ni a hasi un investigashon pa kon ta hèndel ku e asuntu di buki aki. SSC huntu ku skol i direktiva di skolnan, mester kuminsá traha un plan pa rekuperá e lèsnan ku a bai pèrdí dor ku no tabatin buki pa alumnonan siña/traha nan tareanan for di dje.

Durante reunion públiko na luna di yüni di e aña aki nos a indiká na Minister di Enseñansa ku bestèlmentu di buki nan nobo fo’i Hulanda a tuma lugá muchu lat. Nos tabatin informashon ku na fin di mei ainda skolnan tabata manda lista aden di buki nan ku mester a bestèl. Minister a kontestá nos pregunta ku e buki nan lo yega na tempu i awe por konfirmá ku nos tabatin rason. Te ainda tin buki ku no a yega.
Ta bon konosí tambe, ku hopi di e asina di yamá “boekenfonds” di e diferente skolnan HAVO/VWO no a duna e koperashon nesesario i tin ku asta a tene buki atras. Awe e mesun skolnan ei ta bisa mayornan ku SSC no a manda sufisiente buki i ku por akudí na e “boekenfonds” di e skol pa kumpra e buki nan ku falta.

Por a nota ku for di inisio tabatin hopi resistensiá di tantu direktiva i skolnan en partikular pa ku e proyekto aki. A entregá lista di buki nan ku no ta kompletu, tenementu di bukinan atras i mas ku tur kos no a duna e koperashon nesesario.

Di otro banda, SSC tambe a faya en grande ku e proyekto aki. A balotá e trabou, no tabatin sufisiente hende pa yuda i mas ku tur kos SSC no a hasi un investigashon propio i a konfia totalmente riba e informashon ku nan a haña di skolnan. I aki nos ke para ketu. Un investigashon lo a determiná kua ta e buki/métodonan ku skolnan mester usa. Ku esaki enbèrdat lo bo haña ku tur skol lo ta duna lès na e mesun nivel i usando e mesun métodonan. Minister Sra.Bitorina a indiká ku hasiendo esaki bo ta alkansá dos meta. 1.Bo ta baha gastu di buki dor di kumpra un kantidat grandi di e mesun buki/métodonan. 2.Mas ku tur kos bo ta eliminá e diferensia/nivel entre skolnan sekundario dor ku tur ta usa e mesun buki/métodonan. Ku esaki bo tin garantia ku tur alumno ta yega eksamen final hañando e mesun preparashon.

Ekspreshon manera:“E aña aki e repartishon di buki no a kana na satisfakshon, pero pa otro aña si lo sa kon pa hèndel e asuntu”, ta laga nos ku un smak amargo. Mi ta puntra mi mes, ta proefkonijn nos hóbennan ta? Ta tiradó di pará tin den enseñansa? Mester hasi fout pa despues koregí esaki den e otro aña eskolar? Ta di e forma aki ta manehá futuro di nos hóbennan? Gobièrnu ta realmente prekupá ku desaroyo di nos hóbennan?

Nos a tende direktiva di SSC ekspresá ku lo kuminsá kopia bukinan ku falta. Ta bon pa nos rekordá un i tur, ku ya kaba nos tin atvertensia ta kologá riba nos kabes di editornan di buki/métodonan, esta ku si nos sigui kopia buki nan lo tuma medida kontra esnan ku ta hasi esaki.

Finalmente mi ta enfatisá ku si realmente nos tin interes di e muchanan na promé lugar, mester bin un plan pa e muchanan por rekuperá e lèsnan ku a bai pèrdí. No por warda pa te na final di aña eskolar nos tin ku lamentá ku resultadonan di eksamen ta malu i/òf mester bai kònkel (lesa baha) ku normanan di eksamen. Basta di buska i tira falta riba otro miéntras ku hóbennan ta esnan ku no tin arte ni parte den e frakaso di partimentu di buki.

Webmaster

Leave a Reply