• PLAN DI AKSHON
    MFK 2016
  • flag-curacao flag-holanda
Home Amerigó Thodé Pa MFK ta igualdat di siudadanonan den Reino ta konta

Manera ta konosí Minister-presidente Rutte aktualmente ta di bishita na Kòrsou ku un mishon komersial. E bishita aki ta importante pa Kòrsou i su ekonomia i MFK ta spera ku e lo ta eksitoso. Di nos parti nos lo hasi tur kos den nos alkanse pa kontribuí na e éksito.

Si nos di MFK a boga pa, durante e estadia di Sr. Rutte, trese na su atenshon un asuntu ku tin MFK hopi prekupá i ku ta kousa di bastante inkietut bou di nos poblashon. Ta trata aki di e prinsipio di tráfiko liber di persona entre e partinan di reino hulandes. MFK a disidí di entrega un karta na Sr. Rutte riba e asuntu aki.

Un miembro di Tweede Kamer, sr. Bosman, ku ta pertenesé na VVD, meskos ku Sr. Rutte, na yüni 2013 a entregá un inisiativa di lei na Tweede Kamer pa regulá establesimentu di entre otro yu di Kòrsou na Hulanda. Esaki ta e delaster den un seri di intento for di Hulanda durante e último 10 añanan, pa limitá entrada di yu di Kòrsou na Hulanda.

MFK ta keda di opinion ku hasi distinshon entre gruponan di hulandes ta diskriminatorio i ta impugne na Statüt, i diferente otro leinan i tratadonan internashonal. E punto di bista aki nos a duna di konosé na sr Rutte i e ta konsistente ku e punto di bista ku tantu Staten di ántes Antia komo e konseho Insular di ántes teritorio insular di Kòrsou for di 2005 a ekspresá den no ménos ku 8 moshon ku a keda aprobá kasi unánimamente.

Ademas tin palabrashonnan hasi ku i deklarashonnan hasi dor di (representantenan di) Gobièrnu hulandes. Minister Donner a deklará den pasado ku e dokumento tokante limitashon di tráfiko di persona no ta riba mesa mas. I Minister Leers a deklará despues di e Konferensha di Reino na fin di 2011, ku tráfiko di persona entre paisnan lo ser trata den gruponan di trabou. E konklushonnan di e gruponan di trabou lógikamente lo mester a ser diskutí na un próksimo konferensha di Reino. Un lei di inisiativa den un di e paisnan di reino no por kibra e palabrashonnan aki.

MFK ta di opinion ku Gobièrnu Hulandes i sr Rutte ta mará na e palabrashonnan aki i ta konfia ku sr Rutte lo hasi tur esfuerso pa retirá òf no ratifiká e inisiativa di lei di Sr. Bosman. Tambe nos ta konta ku sr. Rutte komo presidente di Rijksministerraad lo no akseptá ku Statüt i leinan i tratadonan internashonal ser violá.

Sr. Rutte a ekspresá optimismo tokante futuro di reino i MFK ta kompartí e optimismo aki. P’esei nos ta konta ku sr. Rutte lo distansha su mes fuertemente for di e inisiativa durante su estadia na Kòrsou, pa asina once and for all kita e inkietut reinante bou di nos pueblo riba e asuntu aki. Ta asina ta garantisá ku reino tin un futuro berdadero.

Palabra ta na sr. Rutte.
amerigo_parlamento_mei

Webmaster

Leave a Reply