• PLAN DI AKSHON
    MFK 2016
  • flag-curacao flag-holanda
Home Amerigó Thodé Ora baka hoga na pos, por bien dèmpel numa

Mi tin gana di sa kon Partido Nashonal di Pueblo (PNP) ke bin hasi “damage control” riba un lei ku nan mes a aseptá, ku e no ta bon i ku MFK a atvertí pa no pasa esaki paso l’é tin un efekto devastador pa e penshonadó. PNP huntu ku su aliadonan a disidí tòg pa kontra konseho di tantu SER komo Raad van Advies na pasa e lei i pa kolmo ku forsa retroaktivo di un luna. Di e manera aki ta bolbe masakrá penshonado i pueblo di Kòrsou.

Awor ku a mira e desaster ku e lei aki a okashoná, diripente Partido Nashonal ke kuri saka un komunikado pa hasi komo sifuera nan tin interes di pueblo na pechu, pero ora nan mester a para fuerte pa penshonadonan den parlamentu i vota pa defendé e penshonadonan, nan no a hasi esaki.

Ta e mesun Partido Nashonal di Pueblo, ku a vota PRO e lei, awe ke saka komunikado i bisa ku e lei di seguro básiko tei pa garantisá kuido nesesario pa tur hende.

Ora ku pueblo a reklamá i penshonado nan a manifestá, PNP dia 23 di yanüari último a vota pro i bisa ku ta oposishon a mal informá penshonadonan i ku penshonadonan no a komprondé e lei bon i ku ta polítika oposishon ke hunga dor di usa e penshonadonan i abusá di nan konfiansa. E dia ei Partido Nashonal di Pueblo a para ariba, pa pasa e lei paso e tabata bon pa e penshonado.

Awor ku baka a hoga na pos, awor PNP ke bòltu 180 grado, meskos ku su aliadonan i ta tira pieda i skonde man. Wèl wèl hende lo no kere kon un partido di mas di 60 aña di eksistensha manera PNP i ku pa kolmo ta un partido ku den su eksistensha a traha mayoria lei soshal, awe a hasi un fayo garafal. I awor ke purba suavisá e daño ireparabel ku nan a hasi pueblo i partikularmente penshonadonan.

Nashonal ban serio! Ta dje forma ‘ki ta tuma pueblo i penshonadonan na serio.
P’esei MFK a vota KONTRA dje lei aki, pues mihó no purba lapi nada, anto tira e lei maligno aki den ko’i sushi.
001_IMG_9371

Webmaster

Leave a Reply