• PLAN DI AKSHON
    MFK 2016
  • flag-curacao flag-holanda
Home Monique Felida Minister di enseñansa ta morde supla…

Minister di enseñansa ta morde supla…

Revoká desishon lo no suavisá e doló


Mas ku tres siman pasá nos a señalá ku tin un “wild wild west “ den enseñansa di Kòrsou. Esaki despues di analisá ku no tin maneho djariba (ministerio di enseñansa) te pa e liña di maneho sigui kore bin abou pasando pa direktiva di skolnan i yega den nos skolnan.

Tur hende ta tuma desishon òf ta keda sin tuma desishon ku ta di importansia pa ku edukashon di nos hóben nan.

Despues ku henter e suseso di Oranje school a bira públikamente konosí nos a tuma nos tempu analisá henter e situashon. E promé konklushon ku nos por saka ta ku pedagógikamente i sikológikamente deklarashon i desishon di Minister enkargá ku e kartera di enseñansa  a hasi un daño grandi na e muchanan, nan mayornan i henter e skol konserní.

Sin hasi un investigashon profundo a tuma e desishon ku mester laga e grupo di mucha aki traha EFO-toets di nobo. E resultadonan ta “muchu” bon i no ta kuadra ku e konseho ku mayoria di e muchanan a haña di nan dosente di skol. Tambe a argumentá ku por a tuma nota ku a güm hopi riba e blachi nan.

Pedagógikamente ta balotá e grupo spesífiko aki i mester tene na kuenta ku un prueba semper bai ta un “moment opname” den henter e aña eskolar  i ku hamas i nunka bo espektativa mester ta lokual ku e mucha ta produsí e dia i/òf e momentu ei. Ta demonstrá ku e konseho ku e dosente ta duna por varia for di e manera ku e mucha a traha su prueba.  I  di esaki si tin sufisiente prueba.

Sikológikamente tambe e daño kousá ta ireparabel. E mucha i/òf grupo di mucha huntu ku su mayornan i e tim di skol por a sinti ku pasó ta trata di “nan” skol a disidí ku mester traha e prueba di nobo. Asta por konkluí ku ya a stèmpel e muchanan aki komo persona nan ku un nivel di inteligensia abou i ku nunka nan lo por alkansá un nivel di HAVO den nan bida.

Nos ya por pronostiká ku e resultadonan di e EFO-toets ku e muchanan lo mester traha di nobo lo no por tin e mesun bon resultado ku esun ku nan a traha anteriormente.E motibu i e ambiente den kua nan lo tin ku traha e prueba di nobo i e preshon pa alkansá un bon resultado lo konvertí su mes den momentu nan di hopi preshon i ansha pa no frakasá.

Tambe ta bon pa remarká ku tur  prueba, sea ta EFO òf eksamen nan na tur otro nivel, ta un instrumento ku ta usa pa evaluá konosementu/inteligensia di un persona pero ku nos mester ta konsiente ku tin hopi otro influensia nan eksterno ku por presentá ku sea ta faboresé òf perhudiká esun ku ta keda eksaminá.

Mas ainda ora tuma nota ku e aña aki mes tabatin hopi krítika sigur pa loke te parti di matemátika (rekenen) ku segun hopi dosente e prueba no a konektá ku e método ku  ta usando den hopi skol di fundeshi. I ku e komishon di EFO-toets a regalá tur mucha 4 punto despues ku mester a eliminá algun tarea pa motibu ku a konstatá ku e tarea nan no tabata korekto i/òf tabata karesé di mas informashon.

Por último nos ta kere ku henter e kaso aki mester a lag’é den man di eksamen büró i despues di un investigashon i análisis profundo di profeshonalnan mester a hèndel e situashon ku esnan konserní i hamas bai den publisidat ku algu asin’aki.

Mayornan huntu ku e dosentenan mester analisá resultado di kada un mucha apart. Analisá kon e mucha su trayekto di skol di fundeshi tabata i tuma un desishon hustu ku ta kuadra ku kapasidat di nan yunan.
monique_parlamento_mei2013

Webmaster

Leave a Reply